Home Minister Pu R.Lalzirliana chuan chanchinbumi thenkhat tun hnaia kawmtute hnenah tun dinhmuna sawrkarin district thar hawn tumna a neih loh thu te, District Reorganisation Committee chuan tun dinhmunah district thar din chu rem rih loa an ngaih thu te, Sub Division headquarters tihchangtlun an rawt thu te, chumi tipuitling tura sawrkarin theihtawp a chhuah mek thu te a sawi niin nimin khan chanchinbu pakhat chuan a chhuah a.
He Home Minister thusawi nia sawi, district thar siam chungchanga sawrkar lai dinna (nia lang) chuan a bik takin kum 2008 Mizoram MLA thlan dawn hnaia MNF sawrkarin district thar a puan Saitual, Khawzawl leh Hnahthial te tan chuan a beidawnthlak hle ang.
A leh lamah chuan kumin tawp lam maia MLA thlan tur dawn hnaih tawha district thar siam(belh) chungchanga sawrkar dinna puan a ni chu district thar siam chungchang sawrkar dinglaiin politics khelh nan leh vote zawn nan a hman lohzia a tichiangin a lang.
MNF sawrkar hun tawp lamin inthlan dawn hnaiha district thar a puan chu mipui tihlawm nan, an tlin leh nan niin a ngaih theih a. Mahse, chutianga a puan avang chuan district thar a puanna bialahte chuan MNF chuan an tlin phah chuang lo a ni.
Tunah, Saitual te, Khawzawl te, Hnahthial te chu Congress MLA-na vek a ni a, ruling member nia Congress kum 10 a sawrkar hnuah pawh hengtea district thar MNF sawrkarin a puan chu tihpuitlin an duh dawn tehreng nen, mahse, sawrkar chuan sum leh pai bakah harsatna a nei a ni tih a lang thei.
A hmasaberah chuan heng Saitual, Khawzawl leh Hnahthial khuaten district headquarters nih an duh avanga district thar nih an duhna chu an district-in a huam khuate atanga duh lohna a awm lian hle niin a lang.
Chubakah heng khaw pathum headquarters-a neiin district siam ni dawn ta se, district headquarters nih duha, district nih dil mek emaw la dil tur emaw an kuh fur mai niin a lang a. Chung zingah chuan Darlawn leh Tlabung pawh an tel ang.
District duh apiang pek chi a ni lo a, Committee pawhin a recommend lo. District tam tak siam pawh Mizoram pum tan a thatna tur a awm tehchiam pawhin a lang lo. Tuna awm zat district pariat chu a tawk hlein a lang. Mahse, boundary erawh siamfel deuh ngai a awmin a lang. Chu pawh lungawi vekna tur chuan Mizoram leilung avangin a harsa hle ang.
Sawrkarin a dinna a puang chiang chu a huaisen thlak a, chutih lai chuan district thar ngiata pawr leh chutiang huaihawttute chu thil hriatthiam tum lo a, sawrkar ep hrim hrimte an ni tlangpuiin a lang. A chunga sawi tak atangin district chungchang chuan inthlannaa tlak leh tlin a hril chiam lo a ni. (MIZO AW Editorial Dt.26.7.2018)
Post a Comment