ZOFATE LEI ARSI LIAN PI ZAITHANCHHUNGI A HER LIAM LEH TA

~James Ramdinmawia

Kum 1994 a ni a, Pu Sânga Sikul (Govt. Kawlkulh Middle School I)-ah Class V ka zir ve, Maradona lar vanglai a ni. 1990 World Cup kha chu en ve tho mah ila kan la te deuh a, ka hre mumal vak lo. Maradona hming erawh kan hre lar hle. 1994 World Cup-ah Maradona chu a rawn inlan leh ta ngei a, inkhel ai mahin Maradona kha hmuhnawm kan ti. Mahse damdawi hman phal loh a lo hman avangin an hrem a, World Cup kha a khel tluan ta lo. Heng thil hi ka sawi tum ber pawh a ni lo, Pi Zaithanchhungi chanchin a ni sawi ka tum zawk ni.

Kum 1994-96 chhung khan Govt. Kawlkulh Middle School I-ah Class V, VI leh VII ka zir a. Kan sikul chu motor luh theihna ni mah se motor a lut khât hle. Kan zirtirtute'n lirthei an neih loh chu thuhran, kan khuaa lirthei nei chhunte tan lah țul lova sikul tlânga rawn khalh luh chhenna chhan tur awm hek lo. Chutih laia a khât tawka Aizawl lam ațanga Gypsy-a rawn inkhalh lut fo chu Pi Zaithanchhungi a ni.

A hming kha kan ràlkhat hriat làr ve em em. A ram fan bu te kha ngaihnawm kan ti thei khawp mai. TV, Computer leh Internet te duhtawka kan hman theih hma kha chuan hetianga khawvel ram dang fanga ram fan bu ziak țhinte hi khawvel tukverha Zofate min dahchhuahtirtu an ni a, an hlu em em a ni. Middle School kan kàl laia hmaichhana Pi Zaithanchhungi kan hmu ve fo te kha kan intithei țhin hle.

Mizo/Zofate hi Identity Crisis nei nasa pawl tak kan ni ngei ang. Zofate insuihkhawmna leh inunauna buaipuiin nasa takin pawl hrang hrangin kan bei a, tun thleng pawh hian Zofa chi peng hrang hrangte'n kan pawm tlàn theih tur hnam hming "Nomenclature" pawh kan la nei mumal lo. Chuti khawpa kan Identity-a chiang lo chu kan ni. Chutiang karah chuan țhahnemngai taka Research beiin Pi Zaithanchhungi te'n kan țobul an chhui a, Zofate hi Israel thlah ngei kan ni tiin an chhuichhuak. A chhuichhuah dan hi chu kan pawm emaw, pawm lo emaw, kan țobul hriat duhna Mizote thinlungah a tuh a, midangte a cho chhuak zel a, Zofate "Lei Arsi Lian" pakhat a ni. Chu Arsi Lian chu nimin 13.7.2018 (Ningani) tlai lam dar 4:20 khan kum 79 mi niin Cancer natna avangin a her liam ta.

"Mizote hi Israel thlahte kan ni" tih hi nghet taka pawmtu ni mah se Thluthlung Hlui-a min kirpui a tum lo a, Juda Sakhua-a min hruai luh a tum hek lo. A thih nî thleng hian Lal leh Chhandamtu-a Isua pawmtu niin Presbyterian Kohhran member rinawm tak a ni.

"Àpi..." tia nel taka ka koh ve mai, Pi Zaii nen hian hmaichhanah pawh kan inkawm ve fo tawh a, a bengvarthlak țhin hle. Sap ram leh Ram Thianghlim te fanga mi changkang tak takte nena hun tam tak lo hmang tawh a nih avangin amah hi a hawiher, a țangkam, a incheina leh a che vel reng reng hi a bu ang thlapa felfai leh changkang a ni a, chutih rualin mi hniam ber thleng pawha pawh phak khawpin a nelawm leh si. An naupan lai hian kan khua, Kawlkulh-ah a pa Zirtirtu a nih avangin an rawn awm ve țhin a. Ka Pi Dengziki khan Pi Zaii u te nen an inkawm țhin thu min hrilh țhin. Nikuma Aizawl Civil Hospital-a ka Pi damlo ka awmpui lai pawh khan a rawn kan ve ngat a ni.

A pasal Pu LN Tluanga (CYMA President hlui leh Ex-MLA) kiangah an zalh ta.

Khawvel tukverha Zofate min dahchhuahtirtu, Identity leh hnam țobul chungchanga Zofate kaiharhtu, i hming hi hnam anga Zofate kan awm chhung chuan a dài tawh ngai lo ang. Nangmah ang hmeichhia hi Mizo Nu te hian hring țeuh se ka va ti em! Mangțha... Àpi...!