Asian Games hockey khel tur Mizo hockey player Lalremsiami

Sports Council-in Asian Games hockey khel tur Siami a chhuang

Tunhnaia che tha tak Mizo hockey player Lalremsiami chu India aiawha Asian Games khel tura thlan a ni a, Mizoram State Sports Council chuan duhsakna a hlan.

Kolasib player Siami hian London, England-a khelh zawh tak hmeichhe Hockey World Cup-ah India tanpuiin kum 40 hnua a vawi khat nan quarterfinal an lut. Ireland hneh lovin penalty shootout-ah vanduai mah se mi malin a che tha a, Asian Games khel tur India hockey team zingah thlan zui nghal a ni.

Kum 18 mi India forward hian Italy an khelh tumin goal hmasa ber a thun a, Player of the Match-a a thlan a ni. Si thum faiin India an cha a, 1978 hnua a vawi khat nan World Championship-ah quarterfinal an lut.

Ranking tharah India hmeichhe hockey team-in hma an sawn a, pakuanaah awmin Asian Games-ah medal la thei turin beiseina an nei sang hle.

India team enkawltu Dutch coach Sjoerd Marijne chuan ranking-ah hma an sawn avangin phurna an neih phah a, Asian Games-ah rilru paukhauh zawka an inlan theih ngei a beisei.

Mizo beisei Siami'n 2010 atangin hockey coaching a zawm tan. A bei nasa a, hma a sawn a, thiamna leh theihna a neih that avangin India junior camp atangin senior team-ah khelhtir a ni a, rinrawlah an hmang mek.

Pu Lalthansanga leh Pi Lalzarmawii te fanu Siami hian kum 11 a nihin 2011 khan Thenzawl Hockey Academy a zawm. 2016 November khan National Hockey Academy, Delhi-ah lut lehin heta tang hian hriat a hlawh zui hle.

Kumin April khan India aiawhin Gold Coast, Australia-ah Commonwealth Games a khel tawh. India team zinga naupang ber niin Mizo zinga Commonwealth Games hockey khel hmasa ber a ni nghal a ni.

Mizoram State Sports Council Secretary Pu C Laltlanthanga chuan naupang tê ni chunga India senior team-a rinrawl ni thei Siami hlawhtlinna leh hmasawn dan a fak. A a tumruhna leh a taimakna rah chhuah a ni a, Olympic Games thlenga khel thei turin hma lam hun êng tak a nei a ni, a ti.

Mizo infiammite inpui Sports Council chuan Olympic Games tih lova inelna sang Asian Games-a tel thei tur Mizo tleirawl Siami hlawhtlinna chhuanawm a ti hle a, tha taka a khelh ngei theih nan duhsakna a hlan a ni.

Asian Games hi Indonesian khawpui lian pahnihah nghah a ni a, August 18 atanga September 2 chhungin Jakarta leh Pelembang-ah neih a ni ang. ~ Thang Khuma T-a‎