Mizo Zirlai Pawl chuan National Register of Citizens (NRC) a chuang lo Assam atanga raltlan lo lut thei dang tura August ni 15 ral hma a sorkarin ruahmanna a siam lo a nih chuan Assam ramri-ah check gate siam an tum thu an sawi.
MZP President L Ramdinliana Renthlei chuan, thenawm Assam State-in 'NRC final draft' a tihchhuah takah a leilung mite nilo an state chhuahsan an tam avangin Mizorama an lo luh loh nan inven a pawimawh hle tih an sawi a. State thenawm sorkarte chu lo inveng lawk a nasa taka hma an lak laiin, Mizoram sorkar a ngawi reng mai chu MZP chuan a hrethiam lo hle, an ti.
NRC hi kum 1951 khan neih a lo ni tawh a, kum 1979-ah Assam Bye-Election neih dawnah khan E-Roll ah mihring an lo pun tak vak avangin All Assam Students Union (AASU) te chuan dan lova pem te vang a ni tiin campaign protest an tan ta a. Kum 6 an beih hnu-ah 1985 khan Assam Accord ah AASU hruaitute leh India Sorkarin Assam Accord an ziak a ni.
He Assam Accord ah hian dan lova an state a lut te hnawhchhuah thu pawh a tel a. Assam state-a eng sorkar mahin hma an la tak tak duh lova mi thahnemngai ten kum 2006 khan Supreme Court ah zualko in rei tak chai a nih hnuah kum 2014 khan Supreme Court chuan National Register of Citizens(NRC) chu update turin a ti ta a, chumi kal zelah chuan tun dinhmun hi Assam Sorkar chuan a thleng ta a ni.
Assam BJP sorkar chuan an intiam angin National NRC chu a buaipui tan ta a, kum 1971-a an state-a awm hmante leh an thlahte chu khua leh tuia chhiar an tum a. Chuta lang ve lote chu foreigner an ni dawn ta a, thla hlui ni 30 khan NRC final draft chu a ti chhuak a. Assam state chhunga awm National Register of Citizens (NRC) a hming chuang lo mihring nuai 40 chuang an awm a, heng mihring nuai 40 chuang te hian Assam khua leh tui an nih loh avangin Assam an chhuahsan mek a. Assam state thenawm heng Megalaya, Tripura, Nagaland, Arunachal Pradesh, Manipur leh Mizoramah te an tlan khawm mek ni a hriat a ni.
MZP sawi danin, Meghalaya-ah chuan Khasi Students Union te chuan Assam leh Megalaya inrinna bula Infiltration Gate lo siamin Assam atanga luh tum thahnem tak an man tawh a, Nagaland te chuan Assam nena an inrina ah police force thanhem zawk an dah nghal a ni.
Hemi chungchangah hian MZP chuan Assam state atanga lo luh tum ILP dil an awm chuan NRC a chuang lo chu ILP pe chhuak lo turin thuneitute an ngen a, Mizoram chhung hnamdangte uluk lehzuala check turin sorkar thuneitute an phut bawk tih an sawi bawk.
Post a Comment