Tripura relief camp-a Bru chhungkaw awmte Mizorama hruai kir vek tura ruahman a nih avangin October thla chawhma lam hian relief camp 6 te hi khar vek tum a ni.
Zirtawpni a Tripura a Dhamcherra khua a Joint Monitoring Committee (JMC) thukhawmnaah he thu hi Ministry of Home Affairs-a Special Secretary (Internal Security), Rina Mitra chuan sawiin October chawlhkar hmasa berah relief camp zawng zawng hi khar vek tur a nih thu a puang a. Relief camp a awmte thil dawn leh chhawmdawlna zawng zawng pawh tihtawp vek a nih tur thu a sawi a. Bru hote hian Mizoram Bru Displaced People’s Forum (MBDPF) emaw pawl dang kaltlangin emaw thil ngiat thar an nei leh a nih pawhin ngaihtuah a inremna siampui turin an biak tawh dawn loh thu a sawi a. Tripura atanga a hma lama lo let tawh Bru chhungkuate chu let turte hamthatna dawn tur ang an dawn ve theihna atan sorkar laipuiin a ngaihtuah dawn a ni a ti.
JMC inhmuhkhawmna hmasa berah hian August ni 14 leh September ni 10 inkar chhunga Bru chhungkaw 5,407 hruai kir tura ruahmanna chungchang thlir ho a ni a. Relief camp awmte’n Ration Card, Aadhaar Card leh bank account te an buaipui theihna hun pe-in August ni 25 atanga hruaikir hna hi tana September ni 25 a zawh fel hman tura ruahman a ni ta a.
JMC inhmuhkhawmaah hian Rina Mitra bakah Ministry of Home Affairs a hmarchhak changtu Satyendra Garg te, Mizoram leh Tripura home secretary leh MBDPF aiawh 3-te, Bru Coordination Committee (BCC) chairman leh central YMA president te an tel a. July ni 3-a Delhi a Union Home Minister hova Bru hruai kir chungchanga inremna an siam bawhzui a tihpuitlin dan tur an rel a ni.
MBDPF hruaitute chuan July ni 3 a inremna chu an pawm chungin relief camp a mi tam tak chuan an pawm loh thu leh Mizorama an kir duh an rin loh thu an sawi chhuak a. An thil phut langsar zingah khaw khata chhungkaw 500 aia tlem lo inbenbel tirte, Bru Area Development Council dinte a la tel thu an sawi a. Satyendra Garg chuan inremna ziah fel a nih tawh avangin an thil ngiatte hi sorkar laipuiin tihhlawhtlin a tum tawh loh thu a sawi a. Inremna anga hruai kir hna hi thawh a nih tur thu a sawi bawk.
Hei bakah hian an ngiat anga chhung tin bank account a cheng nuai 4 dah chu Savings Account a dah a rem loh thu a sawi a. Hamthatna dang an dawn turte pawh relief camp chhuahsana Mizorama an awmna tur khua a an awm phawt loh chuan pek an nih dawn loh thu a sawi. Insakna tur sum chhungkaw tinin cheng nuai khat leh singnga an dawn tur, installment 3 a pek chhuah tur chu installment 2 a pek dan zawn a nih tur thu a sawi bawk.
July ni 3 inremnaah khan chhungkaw tin bank account a cheng nuai 4 thun leh insakna atana cheng nuai khat leh singnga pek bakah kum 2 chhung chhungkaw tin Rs 5,000 pek leh kum 2 chhung vek a thlawna ration dawn tir remtih a ni a. Hei hi relief camp a awm Bru mi thenkhatin duh lovin Naisingpara relief camp chhunga MBDPF office an hual a, MBDPF president chu he inremna a a hming ziah hnukdawk turin an nawr lui a ni.
(AIR News Desk)
Post a Comment