ZORAM PEOPLES MOVEMENT : Vawiin Dt.10th August 2018 hian Cultural Heritage Center, Venglai Lunglei-ah Tanrual Pawl (ZPM) Southern Hqrs. bul tumin "Hawh u, sawichhiat kan nih tawh loh nan i din thar leh ang u" (Nehemia 2:17) tih thupui hmangin Mizoram Din thar lehna beihpui (Operation Nehemia) Campaign khuhhawnna neih a ni.
He huna thusawitu Rev. K Thanzauva, Tangrual Pawl Hqrs. Vice. President chuan, "Kan Ram hi Kristian ram kan nih avangin Pathian malsawmna nasa takin kan dawng a, chuvangin hmanah kha chuan kan thenawm state-te chungah kan leng thin a, an entawn kan ni bawk thin a ni. Mahse, kan ram min lo hruai tawhtuten Pathian Tihna nei chung leh a thu anga Ram an kaihhruai thin loh avangin vawiinah hian kan ram chu a tlu chhe mek a ni." a ti.
Pu Zauva chuan, "Ram hruaituten Pathian tihna nena ro an rel loh avangin kan Hnam hian Pathian kan hlat hret hret a, chu chuan kan nunah nghawng thalo neiin kan Hnam lungphum (Foundation) a ti che a, zalenna dik lova min hruai luh bakah Thiangzau Culture 'Engkim thiang vek' a ngaihnaah min hruai lut a ni. Eiruk, Sex, Nau tihtlak, mahni anpui kawp etc.thlengin engmah pawiah kan ngai tawh lova. Chuvang chuan India rama state zinga eiruk hluarna ber, HIV/AIDS vei tam tamna ber kan nih tawh bakah , Rukruk tam lamah pakhatna kan ni a. Awmpuite awm khawlohpui tamna ber dawttu kan ni ta bawk a ni. Hengte hian kan Ram leh Hnam thawm a ti thang mawi lova. Amah kan trih thinna avanga Pathian min pek kan ram leh hnam zahawmna chu kan hlauh mek a ni. Khawvel zau zawka hnamdang te chu sawi loh, Vai chhia kan tihte leh Tuikuk leh Chakma-te takngial pawhin min zah tawh lo ani a; kan ram min sahthlak thensak an tum a, ramri min chuhpui a, kut te hial min thlak ngam ta a nih hi!! Chu bakah Central hnenah dawt tinrengin min hek a, an duh duh an phut (demand) ngam ta hial a, tih ngaihna pawh kan hre ta lo ani." a ti.
Pu Zauva chuan, "Kawng thenkhatah hmasawnna nei angin lang mah ila, Central hnenah vawiin ni thlengin kut kan zu dawh thin a, kutdawh zahawm an awm ngai silo. Kan Hnam kan lo zahawm leh theih nana kan intodelh theih nante, khawvela kan Hnam leh Ram thawm thang ri a lo mawi leh theih nante, kan hnam lungphum chim mek dinthar anih leh theih nante, kan zahawmna kan neih let leh theih nante, 'Hawh u I din thar leh ang u" tiin tanrualpuiah Mizo mipui zawng zawngte a sawm a ni
Pu K. Sapdanga, Zpm Hqrs. Gen.Secretary pawhin thu sawiin, kumin Mizoram Assembly inthlanpui lo awm tur hi Sakhua Indona tur a nih thu sawiin, India ram pum Hindu rama siam tumtu BJP leh an mahni thawhpui mai pawh hreh lo MNF-te leh Mizoram Congress-hote chu, kan Hnam leh Sakhaw venhim tumtu ZPM (Tangrual Pawl) te nena inbei tur niin a sawi.
Pu Sapa chuan, "Tangrual Pawl in kan ngaih pawimawh ber chu kan Hnam, kan Ram leh kan Sakhua Kristianna a him em? tih hi a ni a. Pathian zara kan lo sawrkar a nih pawhin kan ram, kan hnam leh Kan sakhua ti chhe thei tur chi hmasawnna reng reng chu kan do tlat dawn a ni." a ti.
"Kan kawngpui pan chhan ber chu ram hruaituten nawm chen nan mipui sum an hman nasat lutuk vang a ni a, an enkawlte kan retheih tulh tulh laia an ni an hausak thur thur chhan chu eirukna laka an fihlim loh vang a ni. Tangrual Pawl MLA-te chu mahnihmasialna leh Eirukna laka kan fihlim dawn bakah Sorkar hnathawkte eirukna hun siam sak kan tum lo a ni." a ti bawk.
Sd /-
SL Chhunga
I/c Information & Publicity ZPM, Southern Hqrs.
Lunglei, Mizoram
Post a Comment