-Dr. C. Lalrampana
A KAMKEUNA:
Hmasang ata tawh khawizu hi khawvel hnam tinte hian an hmel hriat hneh hlawm hle a. Mihring hriselna thuam that nan leh induhsakna atante thlengin an hmang uar hle. Abikin keini Mizote phei chuan kan ngainain kan hmang tangkai em em a; tun thlengin a hming sawi rik ringawt pawh hian thin lai a luah hneh hle thin a nih hi!
Hetih lai mek hian amah hi a thlum em avangin-"Cancer vei tan thil thlum ei a tha lo" tih thawmte a awm thin avangin cancer vei mek tam takte'n an tihkhai deuh thin niin a lang a; chuvangin, cancer vei tan ei a hlauhawm reng em? tih tawitein i han belchiang chhin teh ang.
CANCER NEN ENGE A INKUNGKAIHNA CHU?
Cancer vei mek tam takin khawizu ei a pawi em? tih zawhna an zawt fo thin. He zawhna chhanna hi chihnih a awm thei awm e. Chungte chu:-
1. "Cancer vei tan khawizu ei a tha" tih leh
2. "Cancer vei tan khawizu ei a tha lo" tihte a ni.
Engvanga chhanna inkawlkalh tlat awm thei nge i han finfiah teh ang.
CHHANNA 1: Chhannate khi a dik ve ve thei a; mahse, pakhatna khi chhanna dik zawka ngaih a ni. A chhan chu khawizu dik tak engmahin a pawlhsawp loh (Natural Honey) a nih takzet chuan cancer vei tan ei ngei ngei chi zawk a ni. A thatna tlangpuite :-
1. Natna hrik pung zel tur a veng thei;
2. Pem leh hliam tihdam nan a tha,
3. Tihrawl chakna leh, thisen kal siamthatu a ni,
4. Natna lo dolettu a ni,
5. Pumpui pan (ulcer) tihdam nan,
6. Thluak tichaktu atan,
7. Vun natna laka vengtu atan,
8. Mit tichaktu leh khaw hmuh tifiahtu atan,
9 Mipat hmeichhiat hman kawnga mi tithathotu atan,
10. Hritlang awmna leh khawsik tiziawmtu atan,
11. Lung natna laka vengtu atan,
12. Cancer cell thang zel tur lo dolettu atan etc.
Heng bak pawh hi a thatna sawi tur tam tak a la awm a, sawi vek sen a ni lo.
Chuvangin, cancer veite tan allopathic medicince heng:- Chemotherapy leh hem etc. hmanga inenkawlna baka puitu complementary & Alternative Medicine (CAM) tha tak a nih theih avangin cancer vei mekte tan khawizu dik tak ei fo thin hi a tha em em a ni. Tin, Cancer la vei lo leh vei hnaih tawh takte tan pawh cancer mai tur laka vengtu tha tak a ni thei bawk. Chuvangin, dam tha lai reng tan pawh a khat tawka khawizu dik tak ei fo thin hi cancer leh natna chihrang hrang laka min vengtu a ni tih hriain hman tangkai tum thin ang che.
CHHANNA 2: chhanna pahnihna pawh hi chhanna dik tak tho a ni thei. A chhan chu khawizuah hian a suak, thil dang pawlhsawp leh a nihna tur baka sawngbawl danglam a tam em em a; tun lai ngat phei chuan Mizo zingah pawh vai fin aia vervek leh uchuak kan tam tawh hle niin a lang thei. Chuvangin, khawizu tak tlemte telha tel, giu leh chini chawhpawlh, kar khat lek dah pawha khawng bur nghal thei inbumna a tam em em a, tin, Herbal Medicines siamtu Company hrang hrangte'n a nihna baka an sawngbawl damlam tawh (readymade honey) rintlak vak si loh a bawm mawi tak taka siam tam tak a awm thei bawk. Tin, khuai khawitu tam takte zingah Chini tuia khuai chawm an awm thei bawk. Chini tuia chawm a nih chuan a khawizu kha a dik tak (Natural Honey) ni ve tho mah se, pangpar zu an tlan hmanga khawizu an siam a ni tawh lo tih hriain Cancer vei tan ei loh hram a tha mah zawk. A chhan chu chini tuia chawm a nih chuan chinia sulpher, Mizo tawnga kat (damdawi hlo chikhat) awm leh chini thlum kha khuaiin an ei tel reng avangin an zu siamah khan nghawng tha lo nei a tel zel tawh a, chu chuan thin thau bawh, lung natna, zunthlum, thisen sangte siamin cancer cell tipunluntu tha tak a ni thei a; chuvangin, Cancer vei tan chini atanga siam thlum lam chi ei loh tawp a him bera ngaih a ni.
Amaherawhchu, mihring taksain thlum lam chi a mamawh thin avangin thei hmin thlum lam chi etc. ei fo thin a tha tih hriat reng a pawimawh hle. Chuvangin, Cancer vei tan khawizu suak ei ai chuan thei hmin thlum lam chi ei uar a tha zawk.
A TLANGKAWMNA:
Cancer veite hian chakna an mamawh em em a, heng an taksa tlak chham phuhruk nan hian khawizu dik tak hi zan mut dawn apiangin 10ml ei thei thin se, an taksa a tichakin tihrawl a siam tha thei a, chau ngawih ngawiha an awm pawh a thuam chak thar leh zung zung thei a ni tih hriain Cancer vei mekte tan khawizu dik tak ei thin hi a tha hle.
Post a Comment