DIET LUNGLEI B.ED COURSE A HAWNGVawiin khan Mizoram Youth Commission Chairman Pu Joseph Lalhimpuia chuan DIET Multipurpose Hall-ah Mizoram chhimlama Bachelor of Education (B.Ed) zirna awmchhun ni turin DIET Lunglei B.Ed Course 2018 a hawng. He hunah hian Mizoram University (MZU) Vice Chancellor Prof. K.R.S Sambasiva Rao chu khualzahawm a ni.

Pu Joseph Lalhimpuia chuan DIET Lungleiin  B.Ed Course zir theihna tur atana Provisional Affiliation a hmu chu a lawmpui thu sawiin Mizoram history-a mellung thar pawimawh tak leh hlawhtlinna ropui tak a ni, a ti a. Kan rama zirna kan siam that dawn chuan DIET-ah bul kan tan a tul a ni tiin B.Ed Course zirlaite chu thahnemngai taka thawk tur leh ram leh hnam hmasawnna kawnga an mawhphurna a san zia hre nawn turin a chah. Pu Joseph Lalhimpuia chuan zirlaite mamawh hmasawnna ruhrel changtlung tak buatsaih na turin NABARD atangin cheng Vaibelchhe 24 hmuh tawh niin NLCPR sum cheng vaibelchhe 10.4 hmanga Mizoram School Education Department hnuaia hmun khata project lian ber Teachers Training Complex, Lunglei Electric Venga buatsaih a nih tur thu a sawi a. Mizoram University Southern Campus Lungleia nei thei turin sawrkarin theihtawpa hma a lak thu leh amah ngeiin hemi chungchanga UGC Chairman leh MHRD Secretary a hmuh thu te a sawi bawk. 




Mizoram Youth Commission  hmalakna sawiin MYC Chairman chuan thalaite hmasawn nan  theihtawp chhuah a hma lak mek a ni a, tun hnaia sipai lak tur atan pawh Mizo thalaite a tam thei ang ber lak an nih theihna turin MYC kaltlangin inzirlawkna Pre-Recruitment Training District tinah buatsaih a ni dawn a ni, a ti.  SSC Coaching, NEET leh IIT-JEE exam coaching, IAS Coaching leh IELTS Training-te hlawhtling taka kalpui mek a nih bakah thalaite zirna lama chawk phur turin hmalakna hrang hrang Youth Summit and Road Show, Young Achievers Award te buatsaih a nih thu a sawi a. Tun thla ni 21 atangin Aizawl leh Lungleiah IAS coaching tan tura hmalak a nih tur thu sawiin Mizo thalai a tam thei ang ber IAS nih tir tuma tan an lak thu Pu Joseph Lalhimpuia hian a sawi bawk. 

He huna khualzahawm Mizoram University (MZU) Vice Chancellor Prof. K.R.S Sambasiva Rao chuan DIET Lunglei hlawhtlinna chu a lawmpui thu sawiin Mizorama khaw pawimawh berte zinga mi tlawhna hun remchang a nei thei chu lawmawm a ti a. MZU Vice Chancellor hna a chelh hnua a hmalakna hrang hrang te tarlangin Massive Open Online Courses (MOOCs) hnuaiah Skill Development hmalakna thar Employment Linked Skilling Programme (ELSP) kalpui mek a nih bakah MZU-a tan theih turin course thar 15  UGC ah dilna a thehluh tawh thu a sawi a. Mizoramin zirna kawnga hma a sawn zel theihna turin theihtawp chhuah zel a tum thu a sawi. Mizoram University Southern Campus Lungleia hawn theih ngeina tura hmalakna a kal zel thu sawiin VC chuan hemi chungchang hi Mizoram Chief Minister zahawm tak Pu Lal Thanhawla leh MYC Chairman Pu Joseph Lalhimpuia ten vawi tam tak an sawipui thu leh sawrkar laipui  Ministry of Human Resource Development (MHRD) leh UGC-te an dawr reng thu a sawi. Mizo thalaite chu thiamna leh theihna tam tak an nei a, hun lo la awm zel tura hmasawnna an neih theihna atan Mizoram chhuahsan a eizawnna kawng dap turin a chah bawk.




Hawnna inkhawm hi DIET Lunglei Principal Pu H Lalzirliana’n a kaihruai a. HATIM Principal Dr Rema Chhakchhuak in hunserh a hmang a. DIET Lunglei Principal hmasa ber Pu ZD Rongura’n thusawina hun  hmangin Pu Lalthansanga Chinzah, Sr Lecturer, DIET Lunglei chuan lawmthu sawiin hun a khar a ni.

DIET Lungleia B.Ed Course hawn theihna tur hian kum 2015 atang khan ngawrh taka hmalak tan niin 21st December, 2016 khan Eastern Regional Committee (ERC), National Council for teacher Education atangin endiktute an rawn kal a. 28th May, 2018 khan B.Ed Course tan phalna Provisional Affiliation an hmu thei ta a ni. DIET Lunglei hi kum 1974 ah Undergraduate Teachers Training Institute (UGTTI) a bul tan niin tun dinhmunah zirlai 224 an awm mek a, B.Ed zirlaite hi mi 50 an ni. -DIPR

Post a Comment

Powered by Blogger.