PU TT ZOTHANSANGA’N HMUNHMELTHA HIGH SCHOOL BUILDING THAR A HAWNG
Border Area Development Project (BADP) sum cheng nuai 17 senga sak Hmunhmeltha High School Building thar chu vawiin chawhnu khan Champhai North bialtu MLA Pu TT Zothansanga’n a hawng.
Hawnna inkhawmah thusawiin Pu TT Zothansanga chuan ram hmasawnna tura pawimawh hmasa ber chu chakna leh theihna a khat Zirlaite an ni a, ram innghahna leh dinchhuahna kulhpui an ni, a ti a. Mithiam chhawrtlak chherchhuah hi hmasawnna rahbi pawimawh hmasa ber a ni, a ti a. Hmunhmeltha High School-in building thar tha tak a nei chu a lawmpui thu leh hruaitu hmasa leh thathawhtute chu fakawm a tih thu a sawi a. Hmunhmeltha khua chu kutthemthiam khua, miropui tak lo chherchhuak tawh thin tu anih angin Zirlai naupangte pawh chung mite sulhnu chhuia zuitu nih tum turin a fuih a. Tunlai chhanah inelna a sang tawh a, pass naran a tawk loh avangin zir zelna leh hna hmu tur chuan thiam bik nih a ngai tawh a ni, a ti a. Zirna chu hmasawnna bulpui anih thu leh Japan ram ropui tak din theihna pawh Zirlaitea intan a ni, a ti a. Zirlai nih laia hun tha taka hmangtute chu mihuaisen leh chak an nih thu a sawi bawk.
Khuallian chuan thalai zingah ruihhlo hluar avanga nunna chan an tam thu leh mipa bikah a hluar em avangin nunna chan an tam a, mipa an tlem tak thu a sawi a. Lehkhathiam thei apiang an hlawhtlin vek bik loh thu leh theihtawp chhuah thin mi leh teirei peihte chu a tawpa hlawhtlinna tlanga ding thinte an ni tiin, Zirlaite chu mi hlawhtling tlemte zinga mi ni ve ngei thei turin a chah a.
Pu TT Zothansanga chuan Zirlaite chu mit leh beng ti tlai thei hmuhnawm laka chin tawk nei tura fuihin, khawtlang leh kohhranahte pawh Zirlai tibahlah phah khawpa inhmang rih lo turin a chah a. Khawtlang leh kohhran hruaitute pawh Zirlaite hriatthiamna nena en thin se a duh thu a sawi a. Bialtu MLA chuan Hmunhmeltha High School tualzawl cheithatna tur Cheng nuai khat thuneitute hnena pek anih tur thu a sawi a. Zirlai kalkhawmte chu Nu leh pa leh Zirtitirtute thahnemngaihna thlawp tlata, zirlaibu hriatbel tuma, taihmakna leh tumruhna nena beia hlawhtling tum theuh turin a chah nghal a ni.
He hunah hian khualzahawm Pu C.Lalbiakzauva, DEO Champhai pawhin thusawiin Champhai Distrct chungah Education department in hmasawnna a hmuh thu leh thuamthat mek anih thu a sawi a. Hmasawnna ruhrel leh hmanrua tha tak tak te siam tawh niin, siam mek zel a ni, a ti a. Thalaite sukthlekah veng leh khua hmasawnna a awm thin thu sawiin, thalai rual thiamna nei tamna chuan hma a sawn thin a ni, a ti a. Zirthiamna chuan engkimah awlsamna leh theihna a pek thin thu sawiin, nu leh pate pawh zirna atana insen huam turin a chah a ni.
Vawiin High School Building thar hawnna hun hi Pu H.Liantluanga, VCP Hmunhmeltha chuan a kaihruai a. Pu K.Lalngaihawma, Chairman, Managing Board Committee, Hmunhmeltha High School-in report a pe a. Pu K.Lallawmawma, Headmaster, Hmunhmeltha High School-in lawmthu sawina hmangin hun a khar a ni.
Vawiina hawn tak Hmunhmeltha High School Building hi a dung feet 70 leh avang feet 18 a zau a ni a. He school hi kum 1992 a din niin, Zirlai 42 leh Zirtirtu 7 an awm mek a ni. -DIPR
Post a Comment