Sinlung Hills Council sorkar hnenah Sorkarin cheng nuai 300 a pe dawn

Sinlung Hills Council budget 2018-19

Mizoram sorkar chuan Sinlung Hills Council (SHC) interim sorkarin hma an lak lailâwkna atan cheng nuai 300 pek a remti a; mahse, sum hi SHC kutah a la lut lo.

Vanglaini palai zawhna chhangin SHC chief executive member (CEM) Lalṭhalien chuan, Mizoram sorkarin cheng nuai 300 pek a remtih thu a sawi a, "Tunah hian kan account-ah a la lut lo a, kan hman theih turin buaipui mek a ni. Sum kan la dawn loh avangin hlawh pawh kan la la thei loa, nuai 300 hi kan kuta a luh hunah hlawh pawh kan la thei ang," a ti a; department hrang hrangte an pek theih zat tur erawh an la hriat theih loh thu a sawi.

Lalṭhalien chuan, SHC ramri leh con­sti­tuency area tur an la tihfel loh thu sawiin, "September 6-7 chhung hian kan head­quarters Sakawrdaiah session kan nei dawn a, SHC ramri leh constituency area tur zir chianga siamfel tur commission leh sub-committee kan din ang a, anni'n an hna tur an thawh zawhah sorkar nena inráwn tlangin kan siam ang," a ti. 

Tarlan tawh angin, Mizoram sorkar leh HPC(D) inremna angin Sinlung Hills Development Council (SHDC) ṭhiatin, July 9 khan SHC interim sorkar din a ni. SHC sorkar hi thla ruk chhung atana din a ni a, thla ruk a zawh hmain SHC inthlan buatsaih tur a ni. 

SHC nihphung tlangpui


  • Mizoram sorkarin SHC area tana village council area hrang hranga bithliah tur huam chhung­ah SHC a din ang.
  • SHC chuan General Council leh Executive Council a nei ang.
  • General Council-ah member 14 awmin, chung zinga 12 chu mipui thlan tur a ni a, pahnih chu Council ráwn chungin sorkarin a ruat ang. Member 12 thlante aṭangin chairman, deputy chairman leh chief executive member (CEM) thlan a ni ang.
  • CEM-in member dangte aṭangin executive member pali (EM) a ruat ang.
  • General Council term chu kum 5 atan ruahman a ni.
  • CEM, EM leh Council member-te hlawh leh hamṭhatna dawn tur chu dan tesêp (Rules) hmangin sorkarin a la siam ang.
  • Sorkarin Sakawrdai emaw, Council area chhunga hmun dang emaw Council headquarters atan a la puang ang.
  • General Council-te chu thla li chhungin vawi khat tal an ṭhukhawm ṭhin tur a ni.
  • SHC headquarters-ah Secretariat a awm ang a, secretary leh officer dangte'n an vil ang.
  • General Council hian SHC huam chhunga hmasawnna hnathawhna lamah thuneihna zau tak an nei ang a, ram inpekna kalpui chungchangah Site Allotment Advisory Board (SAAB) angin hna an thawk ang.
  • General Council hian village council-te'n chhiah/fee khawn theihna an neihnaah sorkarin a bithliah angin fee/chhiah a la ve thei dawn.
  • General Council atana election kalpui dan tur Rules sorkarin a duang dawn.
  • Council tan sum báwm hran ruahman a ni a, chutah chuan state sorkar leh hmun dang aṭanga sum dawnte dah luh tur niin, Council inrelbawlna kaihhnawih leh a huam chhunga hmasawnna ruhrel dinna atante sum pek chhuah ṭhin tur a ni.
  • General Council hian anmahni inrelbawlna leh hmalakna turin kum tin budget a siam ang a, sorkar pawmpui turin an thawn ṭhin ang.
  • Sakhuana thil leh khawtlang nunphung bakah, hnam dan leh hrai khawih thei thil dang siam a nih dawnin state sorkarin General Council a ráwn ṭhin ang.
  • General Council din a nih hma chuan sorkarin a theih anga hmain interim executive council din turin executive member lailâwk turte a ruat dawn.
  • Mizoram electoral roll-a hming chuang kum 18 tling chinte'n SHC inthlan an chuh thei ang.
- Vanglaini

Post a comment

Powered by Blogger.