JAMPUI MIZO ZIRLAI: Nizan khan YMA Hall, Behliangchhipah MZP Behliangchhip Headquarters bultumin Jampui Mizo zirlai hlawhtlingte chawimawina hun buatsaih a ni a. He hun hi Pi Vanlalawmpuii Chawngthu, Co-Operation, Sericulture, Fisheries Minister/Hrangturzo bialtu MLA ni bawk chuan khuallian niin a hmanpui.

Khuallian chuan  Jampui Mizote chu hnam dang kara awm an nih angin ram darthlang an nih thu a sawi a. Ram darthlalang an nih angin aia upa zahna te, inngaihtlawmna leh tlawmngaihna nen Mizo nun ze mawi chawinung zel turin a chah a. Zirlaite chu tumruhna leh taihmakna nen zir zel tura chahin an thiamnate chu tuma laksak theih an nih tawh loh thu a sawi a. Mizote chu hnam dangin min chung en a, min zahna tur leh min ngaihsan theihna tur chuan lehkha kan thiam lehzual a ngai a. Tharum thawhna tel lovin, kan thiamna, kan finna leh theihnate hmangin ro kan rel ang a ti bawk. Social Media chu thalaite thanmawh bawk a ni tiin zirlaite chu an zirlai puitu atana hmang tangkai thiam turin a chah.





JAMPUI MIZO ZIRLAIPi Vanlalawmpuii chuan zirlaite chu chhungte tana phurrit ni lo tura chahin a hautak lo thei ang bera awm tur leh an theihna zawn zawna mahni intodelh tum turin a fuih a. Tripura Mizote chu an chenna Sawrkar thu zawm thiam tura chahin State Sawrkarin Reservation kawng hrang hrang a siam chu hmang tangkai a, tan la zel tur leh Mizo hnam chawisan nana hmang turin a chah a. Mizoram chu Mizo hmun hrang hranga awmte In pui ber a nih angin hmun hrang hranga Mizo awmte nen Pu Lal Thanhawla kaihhruaina hnuaiah kan inlungrual a. Pu Hawla kaihhruai Sawrkar chuan Mizo hmun hrang hranga awmte thlavang a hauh tlat dawn thu a sawi bawk.





Zirlai hlawhtlingte chawimawina hunah hian Pu Biakthankima, Guest of Honours, MDC, PU L. Ramdinliana Renthlei, President, MZP General Headquarters, Tripura Group YMA, Richard Zongte, Guest of Honours, TCS, Lalentlingi, Guest of Honours, TCS, MHIP Jampui Block, Dr. Zairemthiama Pachuau, Hillcrest Medical Center, Behliangchhip, Lalthlanchhuaha, President, YMA/Dy.IS, Behliangchhip te'n zirlaite fuihna thu tha tak tak an sawi bawk a ni.

Jampui Mizo zirlai hlawhtling an chawimawite hi Class X zirlai 28 leh Class XII zirlai 38, an vaiin zirlai 66 an ni. He hun hi Lalduhsanga Thangluah, President, MZP Behliangchhip Headquarters-in kaihruaiin Jampui Mizo zirlai, nu leh pa leh khawtlang hruaitu thahnem tak he hunah hian an tel a ni. -DIPR

Post a Comment

Powered by Blogger.