Chief Minister Pu Lal Thanhawla chuan vawiin khan Kolasib a Govt. C. Zakhuma Higher Secondary School chu sawrkar school puitling a hlankai lawmnaah khuallian niin a hmanpui a. Kolasib bialtu MLA Pu P.C. Zoram Sangliana leh Tuirial bialtu MLA Pu Hmingdailova Khiangte an tel bawk.






GOVT. C. ZAKHUMA HSSChief Minister Pu Lal Thanhawla chuan C. Zakhuma Hr. Sec. School provincialised a ni ta chu a lawmpui thu sawiin, zirna lama hmasawnna thlentu a nih a, zirtirtuten tang zawka an zirlaite an enkawl phah a beisei thu a sawi a. Ram hmasawnna atan zirna pawimawhna leh zirlaite chu ram hmasawnna innghahna rohlu an nih thu sawiin Chief Minister chuan sawrkar pawhin kawng hrang hranga zirna tihmasawn tura hma a lak thin thu a sawi a; graduate zat tam lam aiin mithiam chhawr tlak leh mi tangkai tam belh a pawimawh zawk thu a sawi. Competitive exam chi hrang hrangah Mizo an thleng sang tawklo thin in inziak tling an tamlo thin chu hmasawn tulna lai tak a nih thu sawiin, thahnemngaihna leh tumruhna neih a pawimawh thu te, 'exposure' neih tam a hnamdang mite ningkhawng hriat te ch rilru tizau a ngaihtuahna tha zawk siamtu a nih theih thu a sawi bawk.




"CHIEF MINISTER IN GOVT. C. ZAKHUMA HSS PROVINCIALISATION LAWMNA A HMANPUI"

GOVT. C. ZAKHUMA HSS PROVINCIALISATION LAWMNAChief Minister chuan zirtirtute hi kan zirlaite tan "role model" nih kan tling tur a ni tiin zirtirtute chu kawng engkimah - awmdan mawi leh inthuamna thlengin entawntlak an nih theih nan fimkhur turin a chah bawk. India ram hi tunah khawvela thalai ngah ber a ni mek a, reiloteah khawvel ram dang zawng aiin kan thalaite hi kawng engkimah, ram rorelna thlengin an pawimawh dawn a ni, tiin khuallian chuan zirlaite chu ram innghahna tlak nih ngei tumin an zirlai ah thahnemngai taka bei thin turin a chah a. Chutihrual chuan hriselna tha an neih theih nan thianghlimna vawng a, ei leh in fimkhur a zuk leh hmuam laka fihlim a, nun uluk reng turin a chah bawk.

School hlankai lawmna inkhawmah hian Pu P.C. Zoram Sangliana, bialtu MLA chuan kalkhawmte lawmna thu sawiin, C. Zakhuma Hr. Sec. School chu school tha tak leh thalai mithiam leh hmantlak siamchhuaktu a lo nih zel a beisei thu a sawi a ni. School Principal Pu Lalnghilhlova Chinzah hnen atangin report ngaihthlak a ni bawk.





Govt. C. Zakhuma Higher Secondary School hi kum 1999 khan khawtlang mipui thahnemngaite hmalak naa din a ni a. A din tirh chuan Kolasib Morning College tih a ni a, a hnuah donor hming chawiin C. Zakhuma College tih a ni zui a. Hun a vei a, Kolasib ah Hinger Secondary School mamawhna a tam avangin leh College tha tak dang a awm tho avangin C. Zakhuma Higher Secondary School tiin thlak tak a ni. Kum 2008 khan Adhoc Grant in Aid a hlankai leh niin, kumin June ni 12-a Council of Minister thukhawm chuan sawrkar school a hlangkai tura rawtna awm chu a pawm ta a ni. Tun dinhmunah zirlai 212 an awm mek a, principal bakah lecturer 12 leh non-teaching staff mi 3 an awm a. MBSE examination hnuhnung berah khan pass percentage chu 84% a ni. -DIPR

Post a comment

Powered by Blogger.