Mizoram College Zirtirtu Post Ruak: MNF party ṭhalai hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkar college hrang hrangah zirtirtu post ruak 151 a awm tih sawiin, inthlan hma ngeia college zirtirtu post ruakte hnawhkhat turin Mizoram sorkar an phût.

MNYF vice president Lalremruata Chhangte chuan, Mizoram sorkar Higher & Technical Education department hnuaiah sorkar college 26 zingah T Romana College leh Kamalanagar College tih loh college dang zawngah assistant professor post awm sa hnawhkhah loh 151 a awm mek tih a sawi a, "College zirtirtu indaih loh vangin zirlai leh zirtirtute'n harsatna an tâwk nasa a, college tam takin an college sumin zirtirtu an ruai hial a; college zirirtu nghet la thuai turin sorkar kan phût a ni," a ti.




Mizoram College Zirtirtu Post Ruak

Lalremruata Chhangte sawi danin, kum 2017-18 academic session-ah Mizoram sorkar hnuaia college 26-ah zirlai 14,036 an awm a, kum tinin zirlai an pung zel. College 26-ah hian zirtirtu sanction post 832 a awm a, regular (a nghet)-a thawk 681 awmin, post 151 a ruak a ni.





MNYF Vice President chuan, college assistant professor post 151 a ruah avangin zirtirtu indaih lohna a nasa tih sawiin, "Contract leh part time-a thawkte vangin sorkar a la mualpho thui lo mai a ni. Congress kaihhruai Mizoram sorkarin zirna sang zawka zirna a ngaihthah hlein kan hria," a ti a; zirtirtu indaih loh vangin college hrang hrangin zirlai an la tam thei lo nia sawiin, sorkar chu a tih tur ti loah a puh.

Tun hnai kum nga chhungin sorkarin zirtirtu a ngheta a lak (direct recruitment) an hriat loh thu sawiin Lalremruata chuan, "Kum 2014 leh 2016 khan zirtirtu 11 contract basis-in an la a, part time-a thawk contract-a dah leh contract-a thawk dah ngheh awm mah se, zirtirtu indaih lohna a phuhrûk zo chuang lo," a ti.

Lalremruata Chhangte chuan, Rashtryia Uchchatar Shiksha Abhyian (RUSA) chu Mizoramin chhawr hle tih a sawi rualin, "Mizoram sorkarin 90:10 hmanga a tum ve tur college assistant professor post 70 chuang kum 2014 aṭanga tun thlenga a thar hlaka (direct recruitment) lak a ni lo hi kan hrethiam lo a, zirlaite ngaihthahna lian takah kan ngai," a ti a; RUSA hnuaiah assistant professor post 70 chuang pawh la thuai turin sorkar an phût tih a sawi.





MNYF Vice President chuan, Mizorama college hrang hranga principal nghet an awm lo tih sawiin, "Principal nghet an awm theih nan dân mumal leh rintlak tak siam turin sorkar kan phût. A ṭhena UGC Rules hman a, a ṭhena hman leh si loh awm tawh loin a tling leh tlakte ngei principal nghet atana lak an nih theih nan ruahmana siam turin sorkar kan phût a ni," a ti.

MNF ṭhalaite chuan, sorkar high school 198 zinga 89 (44%)-in headmaster an nei loh thu leh pawi an tih thu an sawi a; SSA hnuaia thawkte'n thla li hlawh an la tawh lo chu pawi an tih thu leh, MNF sorkar laia Thutak Nunpuitu Team sikula SSA kaltlanga computer 10 chuang pek, Congress sorkarin kum 2011-a a chhuhsak leh vek chu mak an tih thu an sawi bawk.
-Vanglaini

Post a comment

  1. Aspirants must have basic information about JEE Main exam pattern and its syllabus for making better preparation. Candidates should know that there are two papers in JEE Main. To read more blog about jee main 2019 exam schedule click here

    ReplyDelete

Powered by Blogger.