Kan inngainain kan inthlahlel a ni satliah mai lova, kan in mamawh tawn ngawih ngawih a ni. A tel lovin khawi hmunah mah kal ka tum lovin, minzui lova lo awm mai mai lah a thei bik suh.





Mizo sex story
Mizo Model
          Engkimah kan inlungruala, a thlum a al kan ei dun zel ni mai lovin, keiin a tel lova ei ka thei hlawl lova, a tello chuan Buhhawp tak ngial pawh thial a harin lem a sak talh thin. A ni lahin eitur tha chauh lo pawh, eitur a hmuh phak ang zawng zawng chu ka tel lova mahni a ei bik a tum ngai reng reng lo. Kan inlaichin dan leh inzawm dan hi a thuk hle a, kan  inngai ngawih ngawih thin.

Evi kha Adama nakruh atanga din kha a ni a; a ni erawh hi zawng, ka nakruh bo satliah mai mai ni lovin, ka taksa a bet tel tlat, bo ve thei pawha mawi hlawl lo tluka ka tana rohlu; Khuanun`n ka lei taksa a din rual ruala ka kumkhaw kawppui tur, damchhunga lungrual taka a thlum a al ka ei pui tur. He ka lei taksa hi Famkhua lawi tura thlafam a chan ni pawha minzui ve zel duh tur hiala ka lo rinngam leh ka beisei hial kha a ni ve a sin maw le.

          Mahse, he lei anchhe dawng hi zawng. Damchhung  thurualpui atan keiin thlangin duh ngawt mahila, kan pahniha kan in duhtawnna kha a pawimawh zawk leh min inpawm ngheh tirtu tur zawk chu a lo ni si a. Aw, Fam ta Lalzova pawh khan a duhber chu ngai ngawih ngawih chungin di ngaih zunzam a lo phur ve bawk a nih kha maw! Mahse; keizawng, ka mamawh ngawih ngawih leh min mamawh ve ngawih ngawih thintu; ka taksa peng pakhat chu ka thenna tur Ni hi kawlah a rawn inher chhuak bik a sin, a va na em.





          THENNA NI CHU/DAMDAWI IN AH CHUAN: A dan pangngai te in Tur Nipui chu  chhaktiang kawlrawn ah a rawn tawlh chhuak leh bur bur a.Nidang ang bawk in chu ni chuan ka tan sar a rawn zam tir dawn tih erawh ka hre der si lo. A ni nen chuan hlimtakin thingpui te pawh kan la in dun a, kan la nui ve bak bak tho mai.Mahse, a thil tum ruk chu ka lo hre der si lo. A ni ka then natur ni tih ka lo hre miah lova, chutiang tur chuan ka suangtuah phal ngailo hrim hrim. Ni 05-Aug-2011 a ni a, breakfast puar elh awlha  kan ei dun hnuah mai chuan ka Duhlai ngawih ngawih chu Damdawi In ah tlan pui hlawk hlawk a ngai ta thut mai le. Aw, ka khua a harin ka rilru a va baihvai teh thut tak em. Dar 10:30am ah Damdawi In hial pan a lo ngai ta. 

          Damdawi In a Dental Department ah chuan kalin Doctor (Hmeichhia) chu ka va in entir a. Ka Ha-pui pakhat ka entir chu phawi a ngaih thu minhrilh a. Aw, kum 30 chuang lungrual taka a thlum a al ka lo eipui thin, ka taksa peng pakhat  chu kumkhua a he ka lei taksa a vul tawh lo tur hian lak bo sakin ka lo awm ta. Aw, engtinnge ka lei hringnun khawhar tak hi a ni tel lova ka chhiar chhoh ve tak ang le. Ha kim biaia mahni nupui fanaute chhuahsan kha, mahni in chhungah ngei mai ha bal-in ka luh a lo ngai ta. Aw; khuanu rorel dan tak hi chu, ka duhthusam ang ngawt chuan min rel sak dawn miah lo a lo nih hi a. Ka nupui lah chuan Pasal Ha bal a neih phah ta a, ka fa te lahin Pa ha bal an neih phah ta si a le. Damdawi In pan hmaa Ha kim biaia  chhungkua a thla kan lo la ho ta lo te kha; aw, ka lung a va chhe ta ve maw le.

(Ziah ni leh thla: 06-Aug-2011; dar 11:10 am. Suratgarh)

Post a comment

Powered by Blogger.