 |
| -Vanneihtluanga 12/8/2011 |
Vangkhaw màwitu, rualtin khumtu, kan kawmchhak nula -
Kan lungdumtu, nun tinuamtu, Nuihiauvi nun kan hril dawn e.
Zofate khua vel tapchhak záwlah chhíng zo an awm thei dawn lo.
Maian bai se, antam tlak se, iskut chauh pawh kang sela
A tui ber mai Aw! Tui ber mai!
Phuihnam bai se, dailuah kang se, behlawi chauh pawh bai sela
A tui lehzual Aw! Tui lehzual!
Zaiin kan hril, kan sawi ning lo, kan kawmchhak nula -
Khua tin thang chhuak, ei rel thiami, Nuihiauvi hming than zual sela
Tualchhunga val leh chhingkhual valten a pár zu thlum tlàn rawh se.
Zawngtah ziat se, Tumbu bai se, behliang meuh pawh báwl sela
A phak ngai lo Aw! Phak ngai lo
Baibing bai se, bapui chhùm se, telhàwng meuh pawh báwl sela
A thak ngai lo Aw! Thak ngai lo!
Chhak thlang chhim hmar válin an rïm, kam kawmchhak nula -
Hlim ten a chhàwn; vui an awm lo, Nuihiauvin rual kawm a thiam e
Rialnova thingpui no khat tui bik Valan a nghilh thei dawn lo.
Chhawhchhi déng se, vawk lú bai se, ar ril meuh pawh phiar sela,
A buai chuang lo Aw! Buai chuang lo!
Zo chhang ât se, vaimim rawh se, tungrung meuh pawh bai sela
A zäm chung lo Aw! Zäm chuang lo!
Kan chhuang ber mai, leng tin khumi, kan kawmchhak nula -
Khuanun húal se, Nun tinuaman, Nuihiauvi sumtual hmui sela
Zofate khua vel val zawng zinga val tha nuthaiah kan hual.
Rawtuai bai se, hmarcha rawt se, Hmar bai meuh pawh chhuang sela
A zei ber mai Aw! Zei ber mai
Bekang bawl se, pasi sawh se, aidu chauh pawh siam sela
A thiam ber mai Aw! Thiam ber mai!
Neih loh awt lo, neih sa hmang thiam kan kawmchhak nula -
Zuapa lungdum, hraichawi muantu, Nuihiauvi nunkhua nuam sela
Mi neiha buai lo, neih tawka lawm thinte run màwiah kan hual
Chaw thing ring se, bahra lai se, meialh meuh pawh en sela
A ngui chuang lo Aw! ngui chuang lo
Tàm kum thleng se, buhzem ruak se, chhuan hnih meuh pawh nghei sela
A vui chuang lo Aw! Vui chuang lo!
Kan Kawmchhak nula Aw! Nuihiauvi!
Post a Comment