Mizo Idol 2018 Top 20 intihsiak ṭan a ni dawn ta Zaninah mi 12 zai dawn

mizo idol judges

Mizo Idol 2018 intihsiak boruak a sang chho zel a, a thiam zual 25 te chu zanin aṭang hian an intihsiak leh tawh dawn. Top 20-a tling mi 25 zinga mi 12 te chu zanin hian an zai dawn, naktuk zanah mi 13 an inlan bawk ang.

MIZO IDOL Top 20 chu


Third Round-ah mi 60 lai an la inlan a, intihsiak zui zel tura tling erawh a tlem zawk an ni. Judge ten ngun taka an ngaituah hnuah mi 25 te chu inelna hautak zawk hmachhawn zui zel turin an titling a, endiktute thutlukna hi mipuiin kan pawmpui em tih chu zanin hian a hriat dawn.

Top 20-ah hian mi 25 lai an tling a, judge-te'n an lakah beiseina sang tak an neih vang niin a lang. Judge te beisei ang hian an ṭha tawk em tih chu fiahin a awm dawn ta a, contestant te pawhin endiktute hrilhhai taka awm tir an tum hauh lo ang.

Zanina inlan tur te hi zaithiam zingah pawh a thiam bik thlan chhuah te an nih tawh avangin show pawh en a chakawm leh zual dawn a, Mizo Idol nih tum tak tak tan chetsual a thiang tawh lo!

Intihsiak boruak a sang tawh avangin hla thu theihngilh emaw sak chhuah theih lo tih vel a rem dawn lo. Midang te nena inel an nih avangin, an elpui te kuta innghat nih chu a thanat thlak khawp ang le.


Intihsiak neih tawh aṭangin thiam dan inang rau rauah mahnia 'style' nei an ding chang niin a lang a, mahni nihna leh thiam dan ang bera inlan a fuh dawn!

Feli Thangluah hoin


Third Round-ah guest judge Feli Fanai kan hmu a, Feli Thangluah hmel hmuh tur a awm lo thung. Zanin aṭang chuan Feli Thangluah kan hmu ve leh tawh thung dawn a, Robin Lalremruata leh Rinzauva Sailo te chu puipa turte an ni leh dawn bawk.

Feli ThangluahJudge te kutah show hmuhnawm leh hmuhnawm loh thui takin a innghat a, intihsiak boruak sang lutuk tur leh, nung lo lutuk vengtu tur an ni. Contestant zingah mipui hmaa zai ṭhang tak tak an awm tih a hriat a, chutih rual chuan camera hmaa zam deuh te pawh hmuh tur an la awm ve bawk avangin an pawimawh hle dawn a ni.

Top 20 intihsiakah hian track nen an zai tawh dawn avangin contestant te pawh an inbuatsaih ngawrh hle a, Mizo Idol nih ngei tumin theih tawp an chhuah a ni. Intihsiak hi dar 8:00 aṭangin Zonet Studio-ah neih leh tur a ni a, Zonet Zawlbuk-ah live-a pekchhuah leh a ni ang.

--Vanglaini

Post a comment

Powered by Blogger.