THANGTHARTE TANA HRIATRENG TLAK :- REMNA ATANA CHAWTHLENG LEIHBAWTUTE
- Rothuama Sailo
June ni 30, Remna Ni a lo thlen a pianga Zofate’n kan theihnghilh tawh loh tur mi engemawzat zingah Pu Lal Thanhawla leh Pu Lalduhoma te pahnih hian faktu leh seltu an ngah ber awm e. Politician annih avangin an nihna dik tak piah lama seltu pawh an ngah ve ve a, chutih laiin Remna leh Muanna atana lungphum pawimawh tak an ni tih chu theihnghilh rual an nilo.
Lal Thanhawla:
Pu Hawla chungchanga vawiinni thlenga sawidan pahnih awm chu ‘Lal thutthleng a kian lo, a tawlhsawn hret chauh a ni? tih hi a ni. ‘Zoram Buai Lai Khan’ tih lehkhabu ziaktu C.Herman chuan hetiang hian a ziak- “June ni 25, 1986-a New Delhi-a MNF aiawh Pu Laldenga leh Congress (I) aiawh Pu Arjun Singh-a ten party level-a thuthlung an lo ziak tawh ang khan, Pu Lal Thanhawla chuan Mizoram Chief Minister a nihna atanga a banna Mizoram Governor Pu Hiteswar Saikia hnenah a thehlut thuai a. Mizoram lalthutthleng chu tihruahin a lo awm ta a..”
Interim sorkar an han siam ta a:
Chief Minister : Laldenga (MNF)
Deputy Chief Minister : Lal Thanhawla (Cong)
Cabinet Ministers :
1. Vaivenga (Cong)
2. R.Thangliana (Cong)
3. Sainghaka (Cong)
4. C.L.Ruala (Cong)
5. Rualchhina (MNF)
6. Zoramthanga (MNF)
7. Tawnluia (MNF)
MNF atangin Minister 4 an lut a, Congress atangin 5, Speaker Dr.H.Thansanga leh Dy. Speaker K.Sangchhum nen phei chuan 7 an lut a. Pu Hawla chu Dy. CM niin Finance a chang bawk a. Congress hian chanvo tam zawk an la chang ta tho a ni. Hei hi mi thenkhatin ‘a lalthutthleng a kian lo, a tawlhsawn hret chauh a ni’ an tihna chhan chu ani. Amaherawhchu, Pu Hawla hian a lalthutthleng namthlu lo se remna kan nei lo ang tih chu thudik, mitin hriatsa a ni.
August ni 21, 1986 ah Interim Government (sorkar lailawk) chu din a ni a. Hemi avanga nihna zawng zawng hlana chawthleng leihbawtu, a hmaa Minister hna lo chelhtute- Pu Rokamlova, Pu Hiphei leh Pu Liansuama te chu Congress lam atangin an ni a. MNF lam pawh an sorkara minister hna lo chelh lai, Pu Chawngzuala, Pu Rinchhana leh Pu Thankima-te chuan an chawthleng an leihbaw bawk. Hengmite hian hriatzui an hlawh lo hle. Remna Ni a lo thlen hian Zofate hian i hrereng fo ang u.
Lalduhoma:
A chanchin hmasa lam chu kan hre vek awm e. Amah Pu Duha ngeiin Mizoram Remna leh Muanna atana a chawthleng a leihbuak dan hetiang hian a sawi- “Ka chhungte hruai turin Delhi-ah ka kir leh a, ka nupui fanaute nen damchhunga mipuite rawngbawl turin December ni 23, 1984 khan Aizawl kan lo lut ta a, ka chawthleng chu ka leihbaw fel ta a ni. Kan chhungkua leh kan bungrua zawng zawng chu Jeep pakhatah kan leng vek a, a bak engmah khawvelah hian neih kan nei lo” tiin.
Remna Thuthlung ziah a nihlai khan “Zoram Buai Lai Khan’ tih lehkhabu ziaktu Pu C.Herman chuan tihian a ziak- “TV atanga kan lo hmuh dan chuan kha remna thuthlung ziaknaah khan thuthlung ziaka nemnghettute MNF President, Pu Laldenga; Union Home Secretary, R.D. Pradhan leh Mizoram Chief Secretary, Pu Lalkhama te bakah Mizoram Chief Minister Pu Lal Thanhawla, Pi Biakdiki w/o Laldenga leh veteran Congress Pu Zalawma te, Minister- Pu Rokamlova, Pu Vanlalnghaka leh midangte hmel a lang a. Nimahsela, Mizoram remna leh muanna atana kawng sat kawtu bulpui bera ka ngaih Pu Hrangchhuana leh Pu Lalduhoma-te hmel erawh chu a lang ve lo va; lang ve tura pawimawhna nei pawh an ni ve tawh lo va. Ka mitthlaah erawh chuan an lang chiang ber mai thung.” tiin.
Mizoram remna leh muanna atana Pu Lalduhoma hnathawh hi World Development Parliament pawhin a hriatpui a, kum 1987 India Republic Day khan Doctor of Phylosophy (Ph.D) an hlan nghe nghe a ni. Zoram remna a tana mahni inphata chawthleng leihbawtute hi vawiinni hian i hre thar leh ang u.
Post a Comment