ZPM a sorkar chuan khawvel puma Zohnahthlak enkawltu tur bik Minister kan siam dawn a ni
Vawiin (dt.6.8.2018) Thawhtanni khan ZPM Chief Ministerial Candidate Lalduhoma chuan ZPM Office-ah Press Conference a nei a. Tunhnaia Myanmar a zin chungchang bakah Assam sorkarin NRC hmangin Foreigner mi nuai 40 chuang hnawhchhuah an tum mekah Mizoram sorkar chu kut kuangkuahin a thu mai mai a ni, a ti.
Myanmar a zin chungchangah Lalduhoma chuan, “Zohnahthlak inpumkhatna in khawchhak unaute a chiah hneh hle a ni” tiin, “Chhiatna leh harsatna a thlen a piangin kan in unauna a nasa zual zel a. Zohnahthlak zingah Hualngo leh Lushei inthliarna awm mek, zirlaibu thlenga zirlaibu hran an siam chu tha lo kan ti a, chumi suihkhawm hna chu kan thawk mek a ni” a ti a.
Myanmar Vice President Henry Van Thio nen an inkawmthu sawiin, border trade chungchangah Mizoram-in thla thum chhung chauh ei Buhfai kan thar a. FCI atangin a man to vin kan lei tho si a, border trade item-ah buhfai telh a tul thu a thlen thu te, khampat bungpui humhalh anih dan turte, kan hmun hming pawimawh Kawl tawnga an lo dah tawh Mizotawnga dah let leh anih dan turte, Zokhawthar-ah Imigration Centre dah a tul thu te a thlen.
MNF President Zoramthanga leh Mizoram Chief Minister Lal Thanhawla’n Myanmar an lo han tlawh tawh chungchangah Lalduhoma chuan, “Khawvel puma Zohnahthlak inpumkhatna ngaihtuah pha lo hruaitu kan nei thin hi a pawi a. ZPM a sorkar chuan khawvel puma Zohnahthlak enkawltu tur bik Minister kan siam dawn a ni” a ti
Assam sorkarin NRC hmangin Foreigner mi nuai 40 chuang hnawhchhuah an tum mek chungchangah Lalduhoma chuan, “Heng zingah hian MP pahnih leh Muslim MLA pali an tel a. Chung Foreigners-te chuan thenawm State-ah luh ruk an tum mek a. Manipur leh Nagaland sorkar te chuan ramri-ah Police an duty tir a. Meghalaya-ah pawh Khasi Students Union-ten ramri-ah Infiltration Gate siamin an duty bawk a ni” a ti a.
A sawi zelnaah ZPM Chief Ministerial Candidate chuan, “S.Kumar Khare, Joint Secretary, Department of Economics, Ministry of Finance chuan, PM Vision Report a thehluhah chuan, Hailakandi bial vela mi cheng 98% te chu dan lova Bangladesh atanga lo lut an ni a, 60% chu Muslim an ni a, 38% chu Hindu an ni tih a tarlang a. Assam atanga Foreigner hnawhchhuah turte hian Hailakandi-a an unaute belin, Zoramah lo luh an tum ngei dawn a. Chuvangin, Vairengte, Kolasib, Bairabi, Kanhmun leh Zawlnuamah te duty dah vat a tul a ni” a ti a.
“Tun thlenga kan sorkarin hma a la la miah lo hi pawi kan ti takzet a. Ramri buaipui tura din Core Committee lah chu MZP ten telna tlakah ngai lovin an chhuahsan ta bawk a. Kan sorkarna chelhtute hian sorkar hi an peih ta lo ni berin a lang. Hna hi an thawk peih ngang lo a nih chuan bang law law se, kan thatpui zawk ang” Lalduhoma chuan a ti bawk.
Post a Comment