MPCC/Media/PR-2018/31 Dated : Aizawl the 4th August, 2018

PRESS RELEASE

NLUP a kal zel dawn

MPCC chuan tuin emaw Gauhati High Court-a NLUP dawngtu turte thlan dan dik lo leh thlan dan tur guidelines awm lo ang a Mizoram sawrkar an hek avanga tuna NLUP tanpuina dawng mai tur hrek khawtlai a, mirethei tete leirem an rah ve na tur leh nghakhlel taka tanpuina an dawn tur an hrek khawtlai hi pawi a ti tak zet a. Hemi thilah Pu Lal Thanhawla kaihhruai Congress sawrkar tihmualpho tumna leh sawrkar hmai tihmawk tumna biru tak a awm ngei nia a lan avangin NLUP tanpuina sem tih tawp lailawk a ni hi a pawi leh zual a ni.





NLUP dawng thei tur thlan dan chungchang hi NLUP kalpui dan tur a tir te a duan a nih khan duan tel vek a ni a. Hei hi NLUP Manual tia vuah niin internet-ah pawh hmuh mai tur a awm reng a. Hetiang guidelines awm reng chung si a sawrkar hek tuin guidelines awm lo ang leh NLUP tanpuina sem chungchangah thil langtlang lo a awm ni awm taka Gauhati High Court a hrilh hi a vanduaithlak hle a. NLUP dawng thei tur guidelines a ziah angin NLUP kalpui hma atang tawh khan Central YMA bultumin khua leh veng tina chhungkua zawng zawng zirchian a ni a. Rokhawlhna engemaw avanga CYMA a tel leh tak loh hnu khan Mizoram University chuan NLUP dawng thei tur endikna hi a kalpui ve leh a. Heng chhungkaw hming list hi NLUP Implementing Board Office-a theh luh vek a ni.

Kumte a lo vei a, a tira dawng thei tur list a awm lo, indan avang leh pem avangte hi tam tak an lo awm leh a. Guidelines-ah chuan chhungkuaa sawrkar hnathawk tuemaw an awm emaw, eizawnna ngelnghet nei, sumdawnna lam leh huan lo nghet neite emaw an nih chuan NLUP hi an dawng thei lo a. NLUP 3rd leh 4th Phase a dawng thei tur thlante zingah guidelines in dawng thei lo tur tia a lo sawi an awm a, report a awm chuan NLUP Implementing Board lam hian an lo paih leh hmak hmak zel a. Chutiang zel chuan dawng thei tur si, dawng tura thlan awm hliah hliah dawng lo report a awm pawhin NLUP Implementing Board lam hian a finfiah hnuah belh leh an ni thin a ni.





Miretheite dinchhuah ve na tur NLUP tanpuina hi opposition hian an haw em em tih chu Central sawrkar leh Court-a an khin an khin atang hian a chiang hle a. Mahse Pathian lam tang programme anih miau avangin heng heknate hian awmzia a nei ngai lo a. Tuna hekna pawh hi inkaihhruaina mumal a awm reng laia inkaihhruaina awm lo ang a sawi a nih avangin High Court a thubuai awm ang a lang hi awlsam taka chinfel tur a nih avangin miharsate tana programme kalpui hi Pathianin tih tawp a phalin MPCC chuan a ring lo. MNF party ten NLUP kumin a sem tur hnuhnung ber Stay anga an sawi hi High Court-in he NLUP chungchang hi kar 4 (li) hnu-a ngaihtuah leh huna chinfel mai theih tur a nih avangin NLUP hi sem chhunzawm a ni thuai dawn a, Mizoram hmun hrang hranga NLUP dawng tura thlan mirethei te lo lungngai lo tur leh chiai lo turin MPCC chuan a chah a ni.


(LIANHLEIA)
MPCC Media Department

Post a comment

Powered by Blogger.