SOCIAL MEDIA AȚANG RINGAWT NI LO, A TAKA RAM LEH HNAM DINCHHUAHNA TUR KAN VEI TLAN A ȚUL

Lunglei President Thusawi

Social Media hrang hranga lar leh mite hriathlawh niha, a taka che chhuak țhinte ka hmuh hian ka lawm țhin. Chungho chuan dinhmun țha pawh chang se ka ti. Tun hnaiah kan dai loh ram leh țhahnemngai taka a tak taka lo thawk tawhte selna leh diriamna lam hawi thu post chhiar tur awm ta fo hian inenfiahna tur kan ngah zia a ti lang.




Mi vannei chungchuang an awm, a taka tha leh zung an thawh hriat loha lar ta leh mite hriat hlawh. Chungho chuan social media kaltlangin engkim an ti a, an sawi a, an sel bawk. Mahse, ngun taka ngaihtuah chuan chungho chuan kan ram damna tur emaw kan hnam dinchhuahna tura tha leh zung an sen ve tawhna sawi tur a awm meuh lo.

Tuna kan politician ni mek zingah hian a taka hna lo thawk tawh leh țhahnemngai taka ram lo vei tawh țhin țhahnem tak an awm. Tun hnaiah hmasawn kan duh luata kan sel nat lutuk leh kan diriam zui fo mai hi thil țha a ni lo, kan inenfiah a ngai takzet a ni.

Zir mekte leh zir zo tawh țhalaite hian Mizo Nationalism te hi kan tuipui thar ava'n hun em. Hnamdang huat leh diriam hi nationalism a ni lo tih pawh kan intuhngheh a ngai. Hnamdang min chiahpiahtu zawng zawngte aia zir thiamna kan uar te, ramin a mamawh avanga inthlahpun leh chhungkaw enkawl zawh te hi a ni zawk.




Thil țha duh avanga sorkar nawr leh nek a ngaih changa social media a pawr em em, a taka che chhuak chuang si lo kan țhahnem zia te hi kan inenfiah a ngai. Tlawmngaia thil țha duh avanga ke pente nuihsawh leh nuihza siamnana hman ching kan la awm te hian, thil țha beiseina kawnga kan țanrual loh zia a ti lang țhin. Chuvangin, social media ațang ringawt ni lo, a taka ram leh hnam dinchhuahna tur kan vei tlan hi a țul a ni.

Biaksiamtluanga
President
MSU Regional Headquarters, Lunglei

Post a comment

Powered by Blogger.