~ Vanneihthanga Vanchhawng
Inrinni hmasa khan Treasury Sqr bazar, Tennis court bul lam kawngpui sira pitar pakhat chu a chawhmeh tlem ka lei sak laiin a thil tawn min hrilh mawlh mawlh mai a, tunge ka nih pawh a hriat loh hmelin ka hria.
"Ka thin a rim lutuk! Tun tum chu hlawh engmah ka nei dawn ta lo a nih hi. Vai pakhat hnenah pawisa cheng 1900/- lai mai ka kir sual a, awi a hrehawm em mai! A thil lei tlem ka dawhkanah a hnutchhiah a, a rei tawh, hei tun thlengin a la reh vang vang mai" a tia. "A va zia lo em em ve aw! Engtia han kir sual nge maw i nih reng reng le?" tiin ka zawt a. A ni chuan "chawhmeh cheng 100 man lei a tum a, 2000 tlang rawn phawrhin min pe a, pawisa nawi chutiang zat ka neih loh thu ka hrilh a, 'a nih chuan lei lo mai ang' a ti a, a 2000 tlang chu ka kir leh a.
Ka rilru ka thlak a, kir theih hram dan a awm takin ka tia ka indap buai khawp mai a, cheng 1900/- ka pe a, a 2000/- ka pek kir leh kha ka hre tawh lova. A ni lah chuan 'ka thil lei sa hi tah hian awm lawk se, ka rawn lam leh ang' a tia, a kal ta a. A kal hnuah chuan ka tih sual chu ka hre chhuak ta chauh a ni. Hei tun thlengin a rawn lang leh ta si lo, darkar tam tak a liam tawh a, a beidawn thlak khawp mai. Nizanah ka thu tlaivar tawh a, vawiin chu hlawh engmah ka nei dawn lo a nih hi" a ti chuai raih mai a.
A thil tlem ka lei sak hnua in ka thlen thleng chuan ka awm a nuam thei reng reng lo mai a. Pitar te chuan Zirtawp zan atangin tlaivarin hna a thawk tawh a, ni sensa hnuaiah tun thlengin kawng sirah chawhmeh zuarin a la buai hle a, a hlep tur zawng zawng a han chan mai tur chu ka ngaihtuah thin a, ka awm a nuam thei lo a ni. Kan MSR chairty hi hetiang hun hi a ni dawn lawmni kan hmanna hun tur chu ka ti rilru a.
Ka inbual fai tete-a pitarte chawhmeh zuar hmu tur chuan ka va chhuak leh ta a. "Ka Pi vaipa chuan a chawhmeh chu a rawn lam tawh em? Pawisa chu i hmu kir ta em?" ka ti a. Pitarte chuan "A la reh hmiah mai. A rawn lang tawh dawn lo a niang. A thil lei tlemte ai chuan 2000/- kha a duh zawk a niang" tiin vaipa thil hnutchhiah chu a rawn phawrh chhuak a, polythene bag chhungah chuan an hnah tel hnih vel leh bawkbawn etc tlem leh vawksa kg chanve vel ni awm tak hi a awm a. "Engzat chiah nge i kir sual?" tiin ka han zawt leh a, cheng 1900/- a nih thu a sawi rual chuan ka iptea cheng 1900/- ka ah lawk sa chu phawrhin "Ka Pi, hei Pathianin i tih bo zat chiah a pe che aw" tih pahin a chawhmeh zawrhna dawhkanah chuan ka theh phei a, a lawm lutuk mak ti bawk si hmel kha ka mitthlaah hian a la cham reng mai. Min biak thui hmaih ka bike ka hmet nunga ka tlan san ta a ni.
Post a Comment