Vawiin khan PRISM Party chuan Aizawl Khawpui pual manifesto tlangzarhin, Aizawl khawpui zauh an tum thu leh inhmun neilo te inhmun pein in nei lo te in sak sak a ni dawn tih a tlangzarhtu President Pu Vanlalruata chuan a sawi a. Khawpui awmsaa traffic jam tihreh anih tur thu sawiin, Zemabawk leh Kulikawn inkar kawngpui chu zauhin, kawngpui sir leh chungah mamawh phuhru khawp lirthei dahna siam a nih tur thu a sawi a ni.
PRISM Aizawl Manifesto-ah hian Aizawl Municipal Corporation hnena thuneihna leh mawhphurhna sang zawk pek a nih tur thu te; real estate leh housing corporation dina felfai taka Aizawl khawpui zauh dan tur te. Aizawl chhim lam atanga Sairang-a railway station pawh tura kawngpui thar siam dan tur te a awm bawk a. Public transport tha a awm theih nana hmalakna tur awmin khawpui chhunga taxi, auto-rickshaw leh two wheeler taxi-ah tlan thui zawng hriatna meter vuah tura ruahman a ni a. Aizawl atanga chhuak leh Aizawl-a lut transport motor tan kawtchhuah panga- Zemabawk, Hlimen, Lawipu, Sairang leh Sihphir lamah terminal siam tura ruahman a ni bawk.
He Manifesto-ah hian thil thar danglam tak a awm thu sawiin Pu Vanlalruata chuan Sairang leh Reiek kaia kum tina tuitla awm reng thin chu a hmunah tuitla veng leh chhar tur siam a nih tur thu leh Aizawl khawpuia la awm lo ruang dahthatna leh halralna lian tham siam an tum tih PRISM President hian a sawi a ni. Heng bakah hian Khawpui chhunga hmun hlauhawm zuala cheng te chu khawpui thar lama sawn tura ruahman a ni a. Khawpui tharah chawlhhahdamna hmun, hmun awl leh ngaw siam nasat tum anih mai bakah khawpui awmsaah pawh a remchang lai tiruaka hetiang hmun hi siam tum a ni a. Bawlhhlawh sawngbawl dan tur ruahman thar a awm bawk.
Khawpui kawtthlera hrui leh pipeline inzam hnawk thenfai tuma ruahmanna siam a nih tur thu leh hnianghnar zawka tui a awm theihnan khawpui chhunga tuihna hman tangkai tum a ni a, tui dahkhawlna lamah tan lak tum niin tui dahkhawlna lian tham siam tum anih bakah chhungkaw tinin tui dahkhawlna an neih that theihnan tui dahkhawlna hmanrua man tlawma pek tum a ni a. Khawpui lailia Assam Rifles awm te sawnchhuah tura tih a ni a. Khauh zawka building regulation kalpui tura tih a ni a bawk a ni. - Press Release
Post a Comment