VANGCHHIA A PIPUTE SULHNU: Vawiin chawhma khan MJA Press Club, Aizawlah INTACH Mizoram Chapter leh Archaeological Survey of India(ASI), Aizawl Circle te tangkawp chuan Chanchinbumite an kawm a. He hunah hian ASI hotute chuan   tunhnaia Pipute Sulhnu laihchhuak chungchang chu a lem nen an sawifiah a, zawhna leh chhanna hun pawh neih a ni bawk a ni.

VANGCHHIA A PIPUTE SULHNU HMUHCHHUAH

Vawiin a Press Conference hi Pu P. Rohmingthanga, Convener, INTACH Mizoram Chapter  chuan a kaihruai a. Thuhma neiin Chanchibumite an kawmna chhan te sawiin INTACH Mizoram Chapter hmalakna hrang hrangte sawina hun tawi a hmang a ni. Hemi hnuah hian ASI, Aizawl Circle buatsaih lehkhabu pahnih - " A Brief Report on Excavation & New Discoveries at Vangchhia, Mizoram" leh "Centrally Protected Monuments of Aizawl Circle" te chu tlangzarh nghal a ni.





Chanchinbumite leh Pipute Sulhlu humhalh lama tuimi te hmaah  Dr. Sujeet Nayan, Dy.Superintending Archaeologist, Aizawl Circle a Head Office Incharge ni mek leh Director of Excavation chuan Powerpoint Presentation hmangin an thil hmuhchhuah te a pholan bakah a sawi fiah nghal a. ASI in Vangchhia a Pipu Sulhnu thil a laichhuah tarlan te chu - Mithi phumna(Burials), Lungrem(retaining wall), Lung Kailawn(Stairs), kawthler  leh khawchhung kawng( Street or Pathway), Lung tian(Bund), Lungpher  kerkuak ( Water Pavillion), Ralvenna bang( Defence Wall), Lung ker mawi/ Lungphuna milem ker( Menhir), Lungpui/ Lungtum sakhat a inthawina leh sakhuana lam kaihhnawih milem ker ( Petroglyphs), Hlumbel, Ruhro, Thir bel( Iron Casket) leh Thir hriamhrei chi hrang hrang( Weapons) bakah kuaite(Pipe), kawrkilh niawm tak tak te leh thil tenau dang te a ni.





Dr. Sujeet Nayan chuan Vangchhia hmuna ASI in a hmuh chhuah chu Mizo Culture leh Mizo te History tobul chhuina atan thlenga thil pawimawh a nih theihna te a sawi a. Indus Valley Civilization pawh tuna Pakistan ramchhung, Harappa hmunah hmuh a nih avangin Harappan Culture tih a ni a. Chutiang deuh bawk chuan Vangchhiaah hian Mizo thlahte ni ngei a ASI in a rin te hnuhma liantham chu hmuh hmasak leh zirchian a ni a. Vangchhia a Pipute sulhnu ang hi Khawbung RD Block chhung hmun tam takah hmuh chhoh mek a nih leh zel avangin heng lai hmuna Pipute sulhnu zirchianna hi "Vangchhia Culture" tih mai theih a ni a ti. Vangchhia a ASI in a laihchhuah atanga thil chiang chu heng lai hmunah hian "Civilization bo( The lost Civilization)" a awm ngei in a lang a. "Civilization a nih chhan chu heng lai hmunah hian changkang tak chu ni lo mahse, mipui vantlang khawsaho leh sawrkar tenau in a mamawh ang thil engkim a awmkim vek a, awmze nei takin a inrem khawm vek bawk a ni", a ti. Thil hmuhchhuah zingah lungpher a kerkuak, tui khuah tlinna nia ASI in a ngaih(water Pavillion) chu Mihring awmna(settlement) an haih a piangah a awm deuh ziah a. ASI chuan mimal tui dahkhawlna niah ngai mahse thilmak tak leh la chhuichhuah loh a la ni tho a ni an ti.

ASI chuan Khawbung RD Block chhunga khaw 28 zinga khaw 25 chu Pipute sulhnu awmna hmunah a ngai a. Heng zinga khaw 15 chu zirchian a ni tawh a. A tahtawla hmalak zel tum a ni. Birbal Sahni Institute of Paleobotany(BSIP), LUcknow, UP a Vangchhia a thil laihchhuah kehthem an lo zirchian zinga upa ber chu 600 Common Era(CE) anga upa a chhal a ni. - DIPR

Post a comment

Powered by Blogger.