INZUT TUBOH (MASSAGE HAMMER) 

-Dr. C. Lalrampana
dr c lalrampana hriselna huang


Mihringte hi chhula kan awm lai atanga damdawi mamawh nghal kan ni. Nuin nau a pai laia vitamin chihrang hrang thlai leh thil dang a ei that loh chuan nautein a tuar a, nau sawngnawi leh hrisel lo tak a hring thei. Chuvangin, tun lai thiamna tam tak awm chinah Nu fel leh vengva chuan a pai lai ngaihtuah reng chungin a thil ei (diet) uluk takin a thlang thin. Nau pai laia nuin Ruih theih thil leh ruihlo tha lo tak tih a chin chuan a fain a tuar a, piansualna hial a thlen thei.





Pian chhuah hma pawha heti khawpa damdawi mamawh leh enkawl ngai kan ni a; pian chhuah atanga thih hma loh chu ei tur tha mamawh leh inenkawl ngai reng kan ni. Hmanlai mihring hmasate khan tunlai angin eitur tha nei pha ve lo mah se, ramhmul chihrang hrang lungthi, thinghnai etc. atangin an zawl tawka natna inenkawl damna chu an lo nei tha hle thin a. Tunah erawh damdawi chihrang hrang, changkang tak tak leh tha tak tak hmangin kan inenkawl thei tawh a, chumai ni lovin, kan natna dik tak hriat theih nan khawl changkang tak tak kan nei tawh bawk a, a inawlsam hleih tawh hle.

Heng kan inenkawl nan hian World Health Organization (WHO) chuan inekawlna thuang hnih a kalpui mek a, chungte chu:

1. Conventional Medicine & 
2. Complementary Alternative Medicine tea then a ni.

Conventional Medicine (CM) hi Western Medicine, biomedicine, allopathic medicine, scientific medicine leh modern medicine tiin a hming an vuah a, tun laia chemical hmanga damdawi chihrang hrang an siam chhuah kan hman mekte hi a ni.

Complementary & Alternative medicine (CAM) hi ramhmul chihrang hrang hmanga damdawi an siamte leh tidanglam lova a nihna ang anga natna tihdam nana hman thinte hi a ni a, Complementary and Alternative Medicine (CAM) hi ‘Natural medicine, non-conventional medicine & holistic medicine’ tiin hriat lar a ni. Heng inenkawlna chihnihte hi mihring hriselna thuamthat nan leh dam khawchhuah nan hman lai ata tawh tun thlengin tangkai taka hman mek an ni.





Mizoramah hian heng inenkawlna chihnihte hi enge an danglamna kan hre vak lo niin a lang. Mi tam zawk chuan Conventional Medicine chauh hi inenkawlna emaw kan ti niin a hriat theih. Ram hnufual deuh leh hnam chekhnawk zingah chuan mi 80%-ten Conventional Medicine an hmang uar a, Ram changkang leh hnam fingte chuan Complementary & Alternative Medicine (CAM) hi an hmang uar niin a lang. US-ah khuan mi 65%-in Complementary & Alternative Medicine (CAM) an hmang anga chhut a ni a, kan ramah erawh 99% aia tamin Conventional Medicine (CM) kan hmang mek niin a ngaih theih. Conventional Medicine (CM) hi kan hmang uar lutuk a, a sawhkhawk (side effect) tur ngaihtuah lovin Daktawr chawh (prescribed) si lohte’n mi sawi avang ringawtin huai tak takin damdawi kan leiin kan ei a; hei hian kan taksa peng dang a khawih pawi thei tih kan ngaihtuah si loh avangin natna dang kan vei belh phah fo thin niin a lang. Natna hriat chhuah a nih hma chuan eng damdawi mah hi ei risk loh a tha ber.

Complementary & Alternative Medicine (CAM) hi chuan sawhkhawk (side effect) a nei nep deuha ngaih a nih avangin hnam fing leh ram changkang zawkte chuan an hmang uar hle a, vawi khata dam thutna a ni lo nain zawi zawia thawkin hun rei tak a daih thung a, chuvangin, hetiang lamah hian kan thanharh a hun tawh hle niin a lang.

Complementary & Alternative Medicine (CAM) treatment chikhat China siam tunlaia an zawrh mek inzut thiam rawih kher ngai lova mahni inzut (massage) chawp theihna ‘Massage Hammer’ dolphin ang taka siam hi a thatzia i hre lo a ni mai thei. He hmanraw hmanga inenkawlna hi thil namai a ni lova a, taksa a fan (vibrate) tha hle a ni. Tin, hman dan bik a awm a; Inzut thiam lovin kan taksaa nerve awmte hi an hmeh sual/zut sual palh chuan piansualna leh thihna hial a thlen thei tih i ngaihtuah ngai em? Chuvangin, Massage Hammer pawh hi hman reng rengin Kut hmawr leh Ke hmawr lam pan zawng zelin nawr thin tur a ni. Mihring chhip atanga ke ler/hmawr leh kut hmawr inkarah hian hriatna thazam (nerve) hi Pathianin awmze nei taka hna thawk turin 7,200 zet a zam chhuak vek a, A let zawnga nawr chuan kan thisen leh nerve kal loh lam zawngin a nawrlet tihna a ni a, chuvangin nerve a tichhiain thisen function a tibuai thei a, fimkhur tak leh a sakal zawnga nawr tur a ni. Nitin a hun takah minute 15 chauh hman thin a tha ber. A khawl a hah ve theih avangin a tlin lo chung chung hman luih loh tur a ni bawk. Khup, kiu, kaiza leh hnungzang nawrna tur bik cap chihrang hrang a keng tel a, i nawh tur azirin thlak kual zel thin tur a ni bawk. A thatnate hetiang hian i lo thlir teh ang:





1. Chauhna,
zawina leh kulchona (fatigue) a tiziaawm thei;

2. Hnaptui leh hritlang a tidam thei;

3. Zangruh na leh kham ut ut (Cervical vertebra Pain) a chhawk zangkhai thei;

4. Thisen sang leh thisen kal tha lo (Hypertension) a tidam/ziawm thei;

5. Mutthilh theihlohna (Insomnia) a tikiang thei a, muttuina a thlen thei;

6. Chakna thahrui (Energy improvement) siamtu atan a tha;

7. Zang zaw/Baw tla thei lo leh pa thei lo (Impotent premature ejaculation) a siamtha thei;

8. Tisa chakna nei tha thei lo (sexual dysfunction) atan chakna thlentu a ni thei;

9. Nghawng/ring herh leh khawng (Neck stiffness) tihdam nan a tha;

10. Thawhah (Asthma) neite a chhawk zangkhai thei;

11. Kut ze/mu leh zate (arm numbness) bakah kut mu churh churh a siamtha thei;

12. Dar herh na leh kham ut ut (Shoulder periathrities) a chhawk zangkhai thei;

13. Pumna/nuam lo (stomachache) a tidam/chhawk zangkhai thei;

14. Tuanmuanna/chet tual tualna (Acute or lumber muscle pain) a tiziaawm thei a, tihrawl a tichak thei bawk;

15. Awm ruh leh ruh chuktuah (Chest & joint paint) na a tidam thei;

16. Kawthalo (diarrhea) a tiphui/tidam thei;

17. Ek harsatna (constipation) a tiziaawm thei.

18. Thatawm (sciatica pain) avanga chet that theihlohna a tidam thei;

19 Zunkawng tha lo (Enuresis) avanga zung tha thei lo a tidam thei.

20. Keruh chuktuah na (leg arthritis)/ ke za/ke sa (foot burning) a tidam thei;

21. Tai (pile) na/tha lo (Hemorrhoid) a tireh thei.





Mihring taksa na chihrang hrang 21 lai a tidam/tiziaawm thei a; hman thiam chuan a tha hle tih a chiang mai awm e. Heng Complementary & Alternative Medicine (CAM) Treatment hmanga inenkawlna chihrang hrangte hian taksaah a chhe zawnga sawhkhawk (side effect) a nei ve meuh loh avangin hman uar hram hram hi tum tlang ila, Conventional Medicine (Allopathic Medicine) ei anga dam nghal vut vut chi erawh a ni lo tih kan hriat reng a tha hle.

Post a Comment

Powered by Blogger.