SINGAPORE-A MIZO KAL TUM LEH AWM MEK TAN THU PAWIMAWH

SINGAPORE KAL TUM LEH SINGAPORE AWM MEK CHHUNGTE TAN THU PAWIMAWH

(FDW tan bik)

Singapore hi mizoten kan bawh ve ta hle mai. Kal a awlsamin ahlawk bawk a, facebook velah Singapore awm mek te thian tam tak kan nei bawk. Chutiang ho hmun fan leh len velna hmuh chuan kal ve chakna a tir a tum lawk lo te ah pawh a awm chawpchilh ve duh khawp mai. Heng ahnuaia thu te hi kan hre reng dawn nia.

Mi ina awm tur anih vangin hna a awlsam lo. Chhungkhat ngei ngei pawh inhauh chang a awm thin. Chutih karah Singapore ah chuan hmelhriat loh mai nilo mizo pawh nilo hnamdang chhungkua i hrawn dawn. Tawrh chhel angai em em dawn ani tih hre hmasa ila a tha awm e.

A hmasa berah i kal chhan a pawimawh. I kal chhan i chian angai. Chhungkaw harsatna hre ran a tumruh taka kal apawimawh hle.

I facebook thian te thlalak nalh tak tak leh tu te emaw tawngkam a tangin kal ve tum ngawt suh. Engpawh hrehawm hmachhawn huama Chhel taka chhungkaw tana bei turin chhungkaw chawm tum rana rilru luh lul turin in puah chah ang che.

Facebook lama i hmuh thin i thiante thlalak nalh tak tak a offday an leng ang hi rawn mitthla in hetiang hian rawn len tum ve ngawt suh. Heng i hmuh fo te hian hrehawm leh tah vawi engzatnge an paltlang sawi ngam anilo. Lokal thara hetianga awm ve tum ngawt ang chi na te hian hrehawm tuar a ti zuau thin. A kum a kum lo awm tawh thlan leh mittui nena loan rul zo a chhungkaw chawm mek te an ni. Hetianga leng ve tur chuan thla nga tal hrehawm huam ang che.

Awmna a fuh chuan hrehawm lutuk loin hun i hmang thei thung ang. Inthlahrung loin nuam takin i awm thei ang. mahse i awmna a fuh dawn em hriat lawk ani lo. Chu vangin nuam lam mitthla chunga i rawn kal anih chuan beidawngin i hawihai reng thei. I awmna alo nuam anih leh a lawmawm ting ani mai.

A va hrehawm awm ve tih zawhna alo piang nghal. Hrehawm kan tih hian tihduhdah emaw lam ani. Singapore ah hian kut inthlak phal anilo a, chaw ei loa inhrem phal ani loa, mut mu hmu loa insiam phal anilo bawk. Hetiang hi an lo awm leh zauh thin. Singapore sawrkar pawhin an pi leh pute an lo hrem tawh thin. Hei vang hian mut hun. Chaw ei hun leh hlawh lak ni an ngaipawimawh a, hrem tawk nih hi pi leh pu ten an hlauh vek avangin intihduhdah lam a awm lo. Hlawh lak loh a awm ngai lo bawk. Thui tak sawi tur a awm. Kan sawi seng lo ang. Hrehawm tuar huam tih hian i rilru ah hauh tawk turin, sawisel huam turin, nuam lam mitthla loin, hlawhtlin tumin lokal rawh ka tihna ani. A chiang ang chu maw.

A kal tawhte rawn hreh suh. Pakhat chauh rawn loin pathum tal rawn ang che. Awmna fuh loa awm thei thlawt lo haw leh i rawn fuh chuan singapore chu hrehawm lutukin a sawi ang. Awmna fuh tak mahni in ai pawha ei tha leh khawsa nuam i zawh fuh chuan singapore nawm zia a hrilh thung ang che. Hrehawm em em lo, hauh tawk zeuh zeuh i zawh fuh chuan tuar chhel turin a hrilh ang che. Chuvangin i mizawh te a zirin chhanna in ang lo i dawng ang. Pathum pali tal hnen a tangin thurawn la la. Chung a tang chuan thu lai i la dawn nia. Haw leh kan sawi hian hrehawm tuar thei lo chauh anilo, vanduai vanga haw leh ngai pawh an awm tih hre tel ila.

Awmna vanduai vanga haw leh ta, mahni veng leh thawnawm bakah thiante bula Singapore chu hrehawm lutuk anga sawi kan hre fo mai. Tam tak nu leh pa in lo hria in an fate an rawn ngaihtuah thar leh thin. Chu vangin a tawngtu a zirin anuamin ahrehawm thei. Mi thusawi ah inngat loin a awm tawh te ngei rawn kual na chang hria ang che.

NU LEH PA LAM MAWHPHURHNA

Singapore ah hian kum 23 chin chauh hnathawka kal phal ani. Heihi hriat apawimawh tak zet. Pawisa kan duh luatah kan fate kum tling loin kan tir a, pumrua ah puitling uaih mahse kum naupang na na na chu hrehawm tuar an chak loa, an chhel tawk lo. An ruh ano a, an buai hma nge nge thin. Tih loh a tan a tha khawp mai.

Kum tling leh tling lo chu thuhranah dah ta ila, I fate chu eng agent atang in nge an kal hriatpui thlap ang che. Thenkhat chu fate thlathum vel be thei tawh lo mangang helai awm rawn be pawp tawp, khawi agent atangin nge an kal pawh hriatpui silo an awm thin. Heihi tih loh tawp tur ani. Awlsam taka intih mualpho theihna ani. Burma passport hmang turin Burma an chho anih pawhin an kal hma in an awmna agent leh harsat huna biak pawhtur inhrilh tir ngei ngei hi buaina pumpelhna pakhat anih ka ring.

I fate i be thei loa rei tak chanchin i hre tawh lo anih chuan i kalhmasak berna tur chu agent ani. Chu mi kha mi chu Singapore akala, kan be thei loa kan mangang hle tih vela post siam leh chawt pawh an awm thin.`Agentah kal la Agent chuan hma an lo lakpui ang che. A hmuna awm te hi chu kan in hre vek seng bik lo a, hetianga mi zawn neih hian kan phawklek vek thin. A theih chinah chuan fate kalna agent hriatsak thlap a, harsatna awmah pawh belh bul ber tur an nih vangin i biak hmasak ber tur chu agent an ni. An ni chuan a dam tha em tihte an lo hriatsak thei dawn che ani.

Tin engtik lai pawha rawn biak tum hi thil tha ber anilo. Kan fate kan ngaihsak lutukna lamah kartin biaka an chanchin hriat kan duh thin. Heihi a ram awmdan ngaihtuahin thil tul ber ani lem lo. Tin thenkhat chuan pawisa thawn angaih thin vang leh thawntur neih rih siloh vanga chhungte be hreh ngawih ngawih pawh an awm thei tih hriat tel a tha. Inbiak chhunah pawh pawisa chu ahnuhnung bera sawi niin an dam em? An hah em? An ei chakzawng te zawh hmasaka an rilru tih zangkhai hmasak hi chhungte tan chuan apawimawh hle

Rawn kal tir Thenkhat chu phone hman rem lohna hmunah te an thawk a, an hman chuan an pi ten an hau dawn tih hriatpui thiam a tha hle. Hna thawh hunchhunga mahni in ang maia phone khawih hi an ngaina teh chiam lo. Chuvangin phone pawh an laksak fo a, hnathawh zawhah te an pe leh thin. Thenkhat chu offday chauha pe chhuak te pawh an awm. An contract a zir ani.

Chuvangin an awmna hmun a zirin phone theih reng an niin an nilo thei. Thlathum min biak loh chuan kan mangang dawn a, kan inzawng mualpho ang tih ahlauhawm a. Phone i hmang thei ngang lo anih pawhin thiante hmangin emaw, i pi leh pute hmangin emaw min hriattir dan i zawng dawn nia tiin chhungkua thu fel tak in chah hi thil tha tak ani bawk ang.

I fate an rawn hlawhting ngei dawn em i hre lawk lo. Chuvangin chhungkua inrawn tlan hi thil tha tak ani. Loan in an kala. Pawisa sen hmasak angai loa. Kan intir liam leh tawp thin. Mahse vanduaina eng emaw vangin loan rul zo loin awm se la, awmna dang zawng loiin emaw awm thei tawh loin emaw haw duh ta se, a haw na ticket man sing chuang fe chu i sen a tul dawn. Inhlawh tuma kal khan i chawi belh thei. Chuvangin chhungkua ah in rawn ho na leh infuihna tha tak neia kal tir hi thil tha tak ani ang.

AGENT TE HRIAT A TAN

Hostel te siamin naupang kal tur kan awmpuia. Class te lain saptawng te kan inzirtir thin. Mizoram mai niloin khawvel dang nen an saptawng hi a dang lam tih kan hre theuh anga, English aiah English kaihlek Singlish an hmang. Agent siam chin chuan hre vek turah ngaih ani. What is your name tih satliah leh interview zawhna thiam tir deuh tawp ringawt lo deuhin singlish hrulah an duh leh mamawh sawi thei a zaizir nen in pawlh pawha sawi ngam thei tura train apawimawh. Saptawng an thiam tak tak lo Singapore hian. Chuvangin saptawng inzirtir satliah loin basic needs an tih tak tak ang, tawngkam leh zaizira sawi a hriatthiam theihtur talin kan zirtir apawimawh.

Tin English thiamtir ringawt hi anilo a. an mahniah Confidence kan neihtir angai. Helai an lo thleng a. Sap tawng a tawng alo huna Zam chhe nghal mai te, mahni duh pawh sawi ngam leh siloa rilru dawih em em te an awm thin. Heng hian buaina an tawk hma bika. An pi leh pute nen thu inrem loh an nei hma bik. Chuvangin mmahni inrawntawkna an thinlunga tuh thei tura hostel an awmchhungin in enkawl apawimawh viau. Hetianga i naute i enkawl chuan agent rau rau ah fak rawn i ni ngei ang.

Khitiang khi kan lo tih thin leh tih mek anih phei chuan thu lawmawm tak ani ang

KA ZIAK SENG LO

Ziak chuan sawikim ahar hle, pawimawh tih tam tak ziak loh ka nei. Mimal ang pawhin inrawn hreh lo ila. Zoram mipui hriata tawngkam ngeia sawi chhuah a sawi hona hun te awm thei se a tha ngawt mai. Thalai kal an tam si. Sorkar tan pawh singapore a tanga thlakhat sum lolut hi chhut chiana ngaihsak ahun. Vanduaina tawk tase chhawmdawlna hial an siamsak theih hun a nghahleh awm. Mi 1000 dawn kan awm mek. Mi 300 hian sunday tin 10000 thawn ang pawhin chawk ruali la, sunday vawikhatah nuaihsawmthum mizoram kuta lolut a tling daih. Thlakhatah phei chuan vaibelchhia a tling. Hei baka Sorkar pawisa chawkluhna tha hi avang teh ang chu. Hei pawh a tlem ber a ka chhut dan ani. Sorkar tan pawh ngaihven ahun ani.

Ka sawitak te khi harsatna tawk kan lo buapui tawh te atanga ka rilru a thu lo lut ani. Pawl thuchhuah ani lo a, mimal thu ziak ani. Chuvangin a tul i tih chin zawm la, tul lo itih chin pawh sawi zau theih bawk. Nu tling fate ngaihtuaha tap ri ka hriat hian ka na ve fo thin. chu vangin ka rilru ah ka hriat ang ziak ila tiin ka rawn ziak chhuak ani.

MIZORAMAH PAWH THAWHTUR A TAM NEN

A tawp berah chuan Singapore emaw ram dang emaw kal kher angai lo kan ramah pawh thawhtur atam, duham lutuk tur anilo ti pawl an awm. Heng ho hian changkan an hlat khawp ang tih leh an ngaihtuahna a tawi hle ani tih hi ka rin dan ani. A date ka chiang ta lo, Vanglaini chanchinbu ahchuan Master of commerce tan hna ruak ka hmu, ahlawh chu 13000 ani. Singapore kal te hi Pawl sawm thleng zir angin hrut rual ta ila, M.Com hlawh pawh 13000 aniih chuan Mizoram ah 5000 an hlawh phak ang em tih alo ni ta. Hetah chuan 20000 chunglam hlawh lo an awm lo, an tan hian atha teh asin. MA val hlawh phak lo thlatin an hlawh phak tlat, an charity vanga tam takin malsawmna an dawn te hi chipchiara sawi a va chakawm em.

Anhlawh chu chhuan tur em ni? Ni lo e, Lehkha thiam ten khiti zat an hlawh laia an ni hna angah 20000 an hlawh hi an lawmpui awm em a ka sawi mai ani. Mahni ramah hna chu an thawka lawm, Mizoram an awm laiin an awm mai mai biklo, Mahse Hausa te pekbelhna leh rethei te chanai laksakna ramah an ni ang tan nitin ei hmuh ahar tawh si, an dam khawchhuah nan kawlva lenchham chu chhungte ngai emem in mittui nen an pana, an chhungte tan chuan chhandamtu an ni. Mizoramah zirna sikul tha tam tak a awm laia Kan Mihausa ten an sum leh pai senga Phaiah fate an dah chhan chu Zirna tha zawk leh nakin zelah an fate chu chhawr tlak anih theih nan pawisa sengin risk an la ani. Mizoram school a chhia tihna anilo a, Mizoramah school a awm lo tihna anilo. Chu tiang bawkin Singapore an kal hian Mizoramah hna thawh tur an hmu lo emaw an thawk peih lo emaw anilo, An chhungkaw tan, an fate leh pasal tur te tan risk an la ani. An ni chuan an sum an seng loa, An chhungkaw dam khawchhuah nan ke an pen ani.

Ziak tur ka ngah, incheina chungchang te, Facebook group thenkhata kan singapore mizo hmeichhia hmusit leh diriam taka fiamthu aia sang hreta an bei fo thin te hi chhanna ziak ka chak thin.Mi sangchuang awmzingah i mit tlung lo palh te chu an awm thei e, chu mi vanga tam zawk te nu leh pa rilru ti hah zawng leh an unaute rilru ti nuam lo zawnga tawng erawh afuh ber lo. Singapore mizo te tanrualna a tha, tanpuingai an tanpuina te, zoram tana an hnathawh te chen hian sawi ka chak. Mahse a thui tawh si. Ti hian duhtawk phawt mai ang aw. ~ Awmpuia Fanai Felfeli Pa