CHIN UNITY SEMINAR
A HUN : July 28, 2018 (9 am – 4 pm)
A HMUN : MYA CHAPEL, METHODIST CHURCH, MISSION VENG, TAHAN
RESOURCE PERSON : PU LALDUHOMA THUSAWI/PAPER
Pu Chairman leh unau duh takte u,
Thufing chuan, “Blood is thicker than Water” a lo ti a. Vawiinah hian ka unau, ka thisen zawmpuite ngei zinga ‘Special Guest’ leh ‘Resource Person’ chanvo min pe hi vannei ka inti a. Organising Committee leh in zaa chungah lawmthu ka sawi a, chibai ka buk a che u.
Khawchhak lama kan unaute hian harsatna tam tak karah in leh lo tha tak tak in din thei hi in entawntlak hle mai. Zirna lamahte, Infiamna lamahte leh Music lamah te kan hnam tihmingthatu in ni fo thin a. Thu leh hla lamah pawh Zirlai Bu-a sengluh tlak te in rawn thawh thin a, kan chhuang takmeuh che u a ni.
Myanmar sorkar hnuaiah pawh mi engemaw zatin sorkar hna thawkin sorkar kut leh ke pawimawh tak tak in ni hlawm a, a lawmawm khawp mai. Foreign-ah USA, UK, Germany, Norway, Malaysia, Singapore, Japan etc. ah te hna hrang hrang thawk, mi chhuanawm tak tak in awm bawk a. Chungte chuan in lama awmte’n hmasawnna an neih nan, in sumte ui lovin in rawn pe thin tihte kan lo hria a, in fakawm tak zet a ni. Chawhma lamah thusawi manhla tak tak kan ngaithla tawh a, mimal ang pawhin ka hlawkpui hle mai.
Vawiina kan Thupui ber hi “Inpumkhatna” thu a ni a. Hun chep tak karah insit tak chungin Paper ka han buatsaih a ni a. Hriat sual leh tihsual ka neih chuan in mi ngaihdam ka dil a. Sawihona lam atangin thu dik kan hmuhchhuah ka duhin ka beisei a ni.
1. HNAM (NATION) KAN NI:
Holy Bible (Acts 17:26) ah chuan, “Lei chung hmun tina awm turin thlahtu pakhat atangin hnam tin a din a, an tan hunbite a thliahsak a, an awmna tur rite pawh a khamsak a“ (New Version) tih kan hmu a.
Keini pawh hi Pathianin Hnamah min siam a, kan tan ramrite pawh min khamsak a, kan ram atana min pek chu:-
1) Assam lamah Hringchar (Silchar) bul Duarban thleng.
2) Bangladesh lamah Chittagong Hill Tracts thleng.
3) Manipur lamah tuna Territorial Council ina a huam chin tur thleng.
4) Myanmar lamah chhak lamah Chindwin lui thleng leh chhim lamah Teknaf Bay thleng.
5) Tripura lamah Longtoroi leh Sakhan tlangdung thleng.
Tunah hian ram thleng inzawm vekin kan la awm a. Kan delh chin ram chu 21 N – 25 N Latitude leh 92 E – 95 E Longtitude inkar a ni a, a zau zawng chu 1,45,600 Sq. Km vel a ni a. Population hi a zat chiah hriat chian a har a, 3-4 million chu kan ni tura ngaih a ni. Mak ve deuh chu kum 10 lek chhungin kan vaiin chanchintha kan dawng kim hman vek a ni!!
2. TAWNG (LANGUAGE)
Kan pipute thawnthuah chuan, savun lehkha an nei a, uiin a ei niin an sawi a. Hei vang hian mi thenkhat chuan, hmanlai chuan hnam changkang tak kan lo ni tawh ang a, harsatna engemaw avanga vak darhin hnam mawl tak angin bul kan tan thar leh a ni ang tihte an rin phah a ni.
Missionary te lo luh hma khan Tedim biala mi, Pau Chin Hau chuan Hawrawp (Script) a lo hmuchhuak tawh a. Chu Hawrawp hmang chuan 1931 khan British and Foreign Bible Society chuan Tlang chunga Isua Thusawi chu Tedim tawngin an lo chhu daih tawh a ni. (Kei pawhin he Hawrawp hi ka la kawl tha ve reng a ni). Pau Chin Hau hian ‘Laipian’ sakhua a hmuchhuak bawk a, tunah pawh Laipian sakhaw bia chu an la awm. Missionary te kha lo kal ta lo se kan vai hian Laipian sakhua hi kan vuan mai thei a ni (Ref. ZO History by Vum Son)
Tunah hian Bible Society of India hian kan hnam tawng chi hrang hrang 30 vel laiin Bible hi an letling tawh a ni.
Kan hnam zingah hian, mipa leh hmeichhe hming tawpa ‘A’ leh ‘I’ dah leh dah lo kan awm a. Entirna’n - A thenin, “Ginzalal” an tih chu a then chuan “Ginzalala” kan ti thung.
‘R’ Group leh ‘G’ Group kan awm leh a. ‘R’ Groupin “Zoram” an tih chu ‘G’ Group chuan “Zogam” an ti thung.
Thumal tawpa Consonant dah uar deuh leh dah uar lo deuh kan awm leh a. Mara Unaute hian thumal tawpah Consonant an dah meuh lo. Anni'n, “Pu Zakhu” an tih chu Duhlian unaute chuan, “Pu Zakhuma” an ti ang. Mara tawngah hian a tawpah Consonant kan dah chuan Duhlian tawng nen a inhrul hle a ni. Mara unaute hian ‘F’ hi an nei ve lo va, a aiah ‘S’ an hmang bawk.
Linguist-te chuan tawng hi hnam chhui nan an hmang thin. Kan hriat angin Sentence tinah hian Subject, Object leh Verb a awm zel a, chung Subject, Object leh Verb indawt dan inang chauh chu hnam khat an ni thei a, a indawt dan inang lo chu thlah thuhmun an ni thei lo an ti. Entirna’n - Saptawngin, “I read a book” kan tih chuan, Subject (I) a hmasa ber a, Verb (read) in a dawt a, Object (book) a hnuhnung ber thin a, a indawt dan chu Subject, Verb, Object (SVO) a nih chu. Tedim Unaute chuan, “Laibu ka sim” an ti ang a, Falam/Laizo unaute chuan, “Ca ka siar” an ti ang a, Hakha unaute chuan, “Ca ka rel” an ti ang a, Duhlian unaute chuan, “Lehkhabu ka chhiar” an ti ang. Chumi awmzia chu, kan hnam zinga chi peng hrang hrangte tawngah hian Object a hmasa ber a, Subject in a dawt a, Verb a hnuhnung ber thung a, a indawt dan chu Object, Subject, Verb (OSV) a ni daih thung a nih chu. Tichuan, Sapho SVO leh keini OSV te chu hnam khat kan ni thei lo tihna a ni a. Keini unauho erawh hi chu OSV vek kan nih avangin thlahtu thuhmun, thisen inzawm kan ni tihna a nih chu.
Awle, kan hnam hian Hnam Tawng kan nei em? Nei ta ila a eng Tawng ber hi nge tih zawhna kan rilruah a awm nghal awm e. Chu zawhna chu hetiang hian chhan han tum ta ila.
Aizawla Sap Missionary lo lut hmasate khan Lusei-ho zinga cheng an nih avangin Lusei tawngin A AW B te Dictionary te min siamsak a. Lusei tawngin Bible an letling a, Lusei tawng bawkin Hlabu an siam a. Lusei tawng chu a lo lar phah ta a ni. Lusei-ho chuan Mizo an intih tak avangin Lusei tawng chu Mizo tawng kan ti zui ta zel a. Mizoram chhung bikah chuan Mizo tawng chu Common Language a lo ni ta a. Amaherawhchu, tuna Mizo tawng an tih hi kan hnam zinga hnam peng pakhat Lusei tawng mai a ni a, kan hnam pum min huap zo lo va, hnam tawng anga pawm theih a ni lo vang. Mizoram chhungah te, Manipur-ah te, Myanmar-ah te tawng tualleng (Link Language) hrang kan nei a. A engamah hi kan hnam tawng an tling lo.
Chutichuan, hmanlaia kan pipute hla hlui te, thiam hla te, hladote kan en chuan, tawng hi an lo inhman pawlh nasa hle tih a hriat a. Kan chenna ram a hran avangin kan tawng pawh a lo hrang ta hret hret niin a lang. Chutiang bawk chuan, tunlaiah Global Village-a cheng kan lo nih tak avang hian, sakhaw thilah te, politics-ah te, sumdawnnaah te leh Culture etc. ah kan inpawh leh ta tual tual mek a, tun aia nasa hian kan la inpawh zel dawn a ni. Engtikah emaw chuan Lengpui (Aizawl) Airfield leh Yangoon inkarah hian International Flight te pawh kan la nei ve ang a. Kan tawngte pawh kan la inthiamsak tawn zel dawn a. Chi peng hrang hrang tawng atang hian amah leh amah (its own course)-in kan vaia kan pawm tlan tur Common language hi a lo la piang mai dawn a ni.
Khawvelah hian tawng hi a tlem tual tual a, a chhan chu tawng tenau an thih zel vang a ni. Lehkhabu siamtute pawhin Tawng tenau hmangin Lehkhabu an siam duh lo, a market a that loh avangin. UNESCO-in a zir chiannaah chuan kan hnam tawngte hi tawng boral tur zingah an chhiar tel tawh a ni. Chuvangin, kan tawng hrang hrangte hi inzahsakin, humhim ila, min khaikhawmtu tur HNAM TAWNG chu a lo piang mai ang a, a mawi deuh leh lam awlsam apiang hi a dam khawchhuak (survive) mai ang. Chu hun thlentir thuai tur erawh chuan rilru zau tak kan put a ngai a ni.
3. HNAM TOBUL CHHUICHHUAH
Kan hnam tobul chungchangah hian mithiamte hriat dan te, an lehkhabu ziakte pawh a inang lo hlawm hle a.
Lusei-hoin ‘Chhinlung’ chhuak an inti a; Hmar leh Hualngo hovin ‘Sinlung’ an ti a, Tedim-hoin ‘Khul’ an ti a; Kawm-hoin ‘khur’ an ti a. Hming pakhat, lam dan hrang mai niin a lang. A thente erawh chuan Israel thlah kan ni tiin huai takin an sawi bawk.
A enga pawh chu lo ni se, kan vai hian Lal nei hnam, nula rim thin, hmeichhe man nei, dawhkanga in sa, lungthu pathum nei, meilam sat thin, mi lu la thin, Hlado chham thin, Zawlbuk nei, hlo thlawha inlawm thin, khaw tina puithiam nei, Maichama inthawi thin, pialral ngaihdan nei, mitthi phum thin kan ni.
Kut hmang thin hnam kan ni a. Lusei leh Hmar Unaute’n ‘Favang Kut’ an tih chu Thado unaute chuan “Chavang” an ti a. Lusei unauten Mimkut an tih chu Tedim unaute chuan ‘Khawdo’ an ti a, Halkha unaute chuan ‘Tho’ an ti a, Sim unaute chuan ‘Fanger’ an ti a.
Kan thawnthute pawh a inzul hle hlawm. Liandova te unau thawnthu te, Thlanrawkpa khuangchawi thawnthute kan nei hlawm a. Lusei hoin ‘Chhurbura’ an tih chu Tedim unauten ‘Penglam’ an ti a, Halkha/Falam unauten ‘Tenglam’ an ti a, Thado unauten ‘Benglam’ an ti a. ‘R Group’ hovin ‘Lalruanga’ an tih chu ‘G Group’ ho chuan ‘Galngam’ an ti a. Kan inanna lai sawi tur dang tam tak a la awm.
Eng pawh ni se, kan Party chuan hnam tobul chhui chhuaktu tur, mi thiam rual, sorkar sensova thawk tur Commission din hi kan Policy a ni a. Tunah hian kan chi leh kuangte ni si, kawl leh Naga etc. te’n an chimral hi an awm nual tawh a ni. Mahni ngaihdan, finfiahna tha tawk awm mang si lo kan vuan tlat hi a fel lo hle a. Kan zavaia kan pawm tlan theih tur kan hnam tobul chhuichhuaktu tur Commission din vat hi a hun ta hle.
4. HNAM HMING (NOMENCLATURE)
Hun leh hmun hrang hrangah sorkar hrang hrang hnuaia awm kan nih avangin hming hrang hranga koh kan lo ni ta a. Mizorama chengte chu Saphoin ‘Lushai’ min ti a. Kum 1777 khan Chittagong ah ‘Anglo-Kuki War’ tih record a lo awm tawh a, kan pipute leh British indona thu a ni. Manipura chengte chu Bengali leh Assamese hovin ‘Kuki’ min ti a, Myanmara awmte chu kawlhoin “Chin” min ti a. Heng hming hrang hrang kan neihte hi kan pianpui leh inthlahchhawnna atanga kan hming dik tak, Generic Name nge an nih hnam dangin dik lo taka min kohna tih hi kan chian a hun ta hle.
Mizoramah hian ‘Lushai’ pakhat mah kan awm lo, saphoin Lusei-ho an kohna, hming dik lo a ni. Manipur-a kan Kuki unaute pawh hi pi leh pu atanga Kuki an nih ka ring lo. Vaihoin an kohna mai a ni. Kuki tih hming hi an lo pu rei tawh a, nausen tam tak Kuki tih hmingin an lo piang tawh a, chungho chuan Kuki hnam niin an inhre tlat tawh mai. Kan hnam hming dik tak, Generic Name hi kan zawnchhuah vat a tul hle. Chuti lo chu hnam hrang emaw kan inti mai dawnin a lang.
Tunlai hian Manipur-a tlangmi, kan unaute chu India sorkarin Territorial Council pek a tum mek a. Kuki National Organisation (KNO) te chuan ‘Khul Territorial Council” tih an duh a. United Peoples Front (UPF) te chuan ‘Zalengam Territorial Council” tih an duh a. A hming turah an la inrem thei lo va, a pawi hle. Meitei-ho nena an intihbuai lai khan a hmunah ka va kal ve a, Tlangmi ho zawng chu lungrual taka Council pakhat hnuaia awm turin an inkarah ban ka va phar ve a. Thuziak (Citation) mawi tak, “Champion of Manipur Tribals” tih min hlan ve nghe nghe a. Vawiin thlenga an Council hming tura an la inrem theilo hi pawi ka ti takzet a ni.
Hnam hming chungchangah hian Mizoram chhung bika a taka thil lo thleng han tarlang ila:-
Khawchhak atanga thlangtla, tuna Mizorama inbengbel ta te zingah hian a tirah chuan ‘Mizo’ inti tumah an awm lo va, ‘Mizo’ tih hi engtik atanga lo awm nge tih thuah ngaihdan inang lo a tam hle. Kum 1870-a Bengkhuaia’n Mary Winchester a man khan a hmingah ‘Zoluti’ an ti a. Kum 1898-ah “Mizo leh vai Thawnthu” tih leh “Mizo Thawnthu Laisuih” tih bu a lo chhuak a. Zosapthara (Missionary) hlaah “Mizo kan nih lawm ilang” tih kan hmu leh a. Hengte hi ziaka ‘Mizo’ tih kan hmuh hmasakte chu an ni mai awm e.
Chuti chung chuan Mizoram-a chengte chuan ‘Mizo’ an la inti mai chuang lo. 1901 chhiarpui hmasa berah chuan Mizo pakhat mah an la awm lo. Lusei 36322, Ralte 13827, Hmar 10141, Paihte 2870 etc etc an ni. Mahni chi bing hming vekin an la inziaklut a ni.
Zawi zawiin ‘Mizo’ inti an lo tam ta tial tial a. 1946-ah Mizo Union a lo ding a. Lushai Hills tih pawh chu Mizo Hills tia thlak a ni a. Young Lushai Association pawh Young Mizo Association tih a lo ni ta zel a ni.
Kum 60 a lo liam meuh chuan Mizorama cheng tam berte chuan Mizo an inti a. 1961 chhiarpuiah chuan Mizo 213061 lai an lo ni ta a. Lusei inti leh Paihte inti phei chu pakhat mah an awm tawh lo va, Ralte inti 109 lek an awm a, Hmar inti pawh 3118 chauh an lo awm ta a. Mizorama cheng zawng zawng tih theih chuan Mizo an inti ta vek a. Hei hian Mizo hnam bik a awm lohzia leh hnam hrang hrang hming khaikhawmtu Nomenclature mai a ni tih a ti chiang hle.
Chumi hnu kum 20-ah 1981 chhiarpuiah chuan a hmaa Hmar leh Paihte te, Mizo lo inti tawhte zingah khan Mizo inti duh lo an lo tam leh ta hle mai a, Paihte leh Hmar chu an lo pung leh ta phut mai a. Mizo inti chu 365203 an la awm a, an la tam ber nain, a punna hi a tlem ta hle a ni.
Chumi awmzia chu - Ram hruaitute, NGO hruaitute leh Kohhran hruaitute’n hnam inpumkhatna rilru an put lai chuan mahni chibing hming kha paihin Mizo an inti deuh vek mai a. Hruaitute’n inpumkhatna rilru an put loh hunah Mizo inti duh lovin mahni chibing hmingah khan an kir leh thin tihna a ni. Hei hian kan hnamin hruaitu rilru zau tak pu mi kan neih a tulzia a tichiang hle.
Inpumkhatna atana mi thahnemngai tam tak kan awm a. A bik takin thangtharte rilruah a awm nasa tial tial a, a lawmawm hle. Chung mi thahnemngaite chuan kan pawm tlan theih tur Nomenclature hi an vei hle a. Rawtna chi hrang hrang zinga pakhat han tarlang ila, chu chu ‘ZO’ tih hi a ni.
AD 862-a Indo-Burman chanchin ziaktu, Chinese Historian Fan Cho chuan kan pipute khan hnam pum huap hming atana an lo hman thin chu ‘Zo’ tih hi a ni a lo ti a. (Ref:- Chin Hills Linguistic Tour, 1954, University Project by G.H. Luce and Journal of Burma Research Society XLII, June, 1959).
1783-ah Catholic Father, Vincent-a chuan, “A description of the Burmese Empire” tih a ziakah pawh ‘ZO’ tih hi kan hming a ni a ti bawk. (Ref:- V. Sangermanoi: A description of the Burmese Empire, Editted by John Jardine, Rangoon, p 43)
1891-ah Northern Chin Hills Political Officer, Rundall chuan, “Chin hming lo intanna ka hre lo, kawl tawng a nih ka ring, Chin ho pawhin a awmzia an hre bik lo, ‘Zo’ an inti mai a, pakhat aia tamah chuan ‘Zote’ an inti leh mai” a lo ti ve bawk. (Ref: F.M. Rundal: Manual of the Siyin Dialect in the Northern Chin Hills, Rangoon, 1891, p 20)
Chin Hills awptu hmasa ber Carey leh Truck-a te chuan 1895 khan, “Chin ho zawng zawng huapa an inkohna hi chu ‘ZO’ a ni” tiin an ziak bawk. (Ref: B.S Carey and H.N truck: A history of the people, our dealings with them, their customs and Manners, and the Gazetteer of the Country, TRI, Aizawl, 1976 p 23)
1871-72 a sap hovin Mizoram an run tuma an hotupa Thomas H. Lewin (Thangliana), Mizoram leh Manipur-a rei tak sorkar officer lian ni zui ta chuan 1912 ah khan “Hengho tobul hming chu ‘ZO’ a ni” tiin a lo ziak bawk. (Ref: Thomas H. Lewin: A fly on the wheel or How I helped to govern India, TRI, Aizawl, 1912, p 248)
1894-a Mizorama Missionary hmasa ber J.H Lorrain (Pu Buanga) khan 1940-ah Dictionary a siam a, chutah chuan “Zo tih hi Luseite leh an vela hnam dangte hming a ni” a ti bawk. (Ref: J.H Lorrain: Dictionary of the Lushai Language, 1940, Calcutta, Asiatic Society, Aizawl, TRI 1982 p 560)
Burma sorkara kan unaute zinga Ambassador hmasa ber, Vun Ko Hau chuan, “Chin Hills Gazetteer-a Zo (Chin) an tih leh Kuki an tih chu Burma, E. Pakistan leh Assam rama ZO hnahthlak zawng zawngte hming dik tak ‘Zo’ tia thlak ni sela chuan engkim hi a fel then tawh tur” tiin a ziak bawk. (Ref: Vum Ko Hau: Profile of Burma Froutierman, Bandung, 1963, P 297)
Chin Affairs Minister Zahreliana pawhin, “Chin hi Kawlin official-a an hman a ni a, nimahsela, anmahni chuan he hming hi an hmang ngai lo, ‘Chin’ tih hi Chin-ho thumalah a awm lo reng reng a ni” a ti. (Ref: Chin Dictionary and Grammar by M. Jordan, Paris, 1969, Forwarding p2)
Ka Source pakhatah chuan, Chindwin lui hming hmasa hi Talawadi a ni a, 1200 AD vel khan Chin hming chawiin Chindwin tih a ni ta a ni. Chuti a nih chuan Chin tih hmanna hi a lo rei viau tawh tihna a ni thei tho bawk. Historian thenkhat chuan ‘Chin’ hi kan hming dik tak ve reng a ni an ti bawk.
Kan Party kan din tirh hian a hmingah ‘Mizoram’ tih leh ‘Zoram’ tih kan buk a. ZORO te pawhin ‘Zo’ tih hi lungrual takin an lo hmang tawh a, keini pawhin Mizoram kan tih chuan Mizo ho chauh a huap dawn si a, zau zawk a huap theih nan Mizoram ni lovin ‘Zoram Nationalist Party’ ti ang u kan ti ta a ni.
‘Zo’ tih chungchang ka sawi avang hian kan hnam hming atan ka sawimawi emaw, ka rawt emaw tihna a ni hauh lo. In ngaihtuahna chawk thotu atan leh in Home-Work atan entirna pakhat angin ka han tarlang mai a ni. Rawtna tha tak tak han ngaihtuah teh u. Keini chuan kan lungrualna apiang kan pawm thei e. Engpawhnise, khawvelah hian hnam tih tham tak leh ropui taka kan dinchhuah nan hnam hming pakhat leh Common Language kan neih vat hi a tul a, chu chu kan Agenda pui ber lo ni rawh se.
Chu hun a lo thlen hma chuan kan awmna ram theuhah hian unau kan ni tih hi inhre phawt mai ila. Mizorama kan awm chuan Mizo ni mai ila, Manipura kan awm chuan Kuki emaw Zomi emaw inti mai ila. Myanmar-a kan awm chuan Chin ni leh mai ila. The Chin Hills Vol-One 1983-ah pawh, “These Chin Tribals Called Mizos in India” tiin min dah mai a. Myanmar-ah hian hnam hrang hrang te’n Code No an nei theuh va. Chin Code No chu 400-na a ni a. Chin hnuaiah hian chi hrang 53 kan awm a, Lushei chu Code No 440-naah, Chin Code chhungah dah a ni a. Mizoramah chuan Hualngo hote chu a inti Lusei berte an ni a,Lusei ho chuan Mizo an inti ta tih thu kan sawi kha. Duhlian tawng leh Mizo tawng chu thuhmuna ngaih a ni. Chuvangin Lusei tihte, Mizo tihte leh Duhlian tihte hi sawi hran chi niin a lang lo. Nomenclature pawm tlan theih kan neih hma hi chuan, a inla hrang zawng ni lovin, kan awmna hmun zel min hriat lar ber hming hi lungawi takin pu thei ila, a lawmawm ngawt ang.
5. INTHENDARHNA LEH A NGHAWNG:
Ram ni tla seng lova roreltu British Sorkarin min tukdawl tak hnu khan, kan hnam chungchang ngaihtuahin, Fort William, Calcutta-ah ni 29.1.1892 khan 'Chin-Lushai Conference' an ko ta a. Chuta telte chu-
1) Lt. Governor of Bengal
2) Chief Commissioner of Madras
3) Chief Commissioner of Burma
4) Foreign Secretary
5) Military Secretary
6) Quarter Master General of India te an ni. He Conference hian hnam khat kan ni tih hriain, kan vaiin Assam Chief Commissioner hnuaia awm turin thutlukna an siam a. Vanduaithlak takin heihi tihpuitlin a nita lo va. British Policy ‘Divide and Rule’ hmangin sorkar pathum – Bangladesh, India leh Myanmar hnuaiah thendarhin kan awm ta a ni. Kum 126 lai a lo liam tawh nain, ZORO chuan he ni champha hi kumtin an hmang thin a ni.
Sorkar 3 hnuaiah thendarhin kan awm mai pawh a ni lo va, kan awmna sorkar-ah pawh Administration khat hnuaiah dah kan ni lo va. Kan remtihna emaw, kan hriatpuina emaw tel hauh lovin ramrite min siamsak zui ta zel a. Kei pawhin, 'Barhluih Ramri' tih Bu ka ziak ta nghe nghe a ni. Chuvangin, kan tawng te a lo danglam hret hret a, mahni chi bing chu kan hnam hmingah kan pawm nghet ta tual tual a, kan inkarah “Unau Hmelhai” a lo thleng ta a ni.
Kum 2003 (MNF sorkar lai)-a Burma mi hnawhchhuah chiam a nih khan, an thlavang hauh ngam chu mi 3 chiah kan awm a. Mizoram Journalist Association khan, ni 26.7.2003 khan, mahni kuta thuneihna inpe a, Dan lekkawh kha tha an tih loh thu leh, Dan chu thuneitute kuta dah ni se an duh thu an chhuah a. ZORO President, Pu R.Thangmawia (RIP) pawhin huaisen takin an thlavang a hauh bawk a. Inthlan a hnaih tawh avangin, kan unaute thlavang hauhtu nih kha a hunlai boruakah chuan a tih chi loh hle chungin, kan Party chuan, huai takin, ni 5.8.2003 khan an thlavang hauhna Resolution kan pass a ni. Inthlana tlak phah pawh huama kan unaute thlavang hauh ngam awmchhun Party kan nih thu hi, vawiin hian sawi lo thei ka ni lovin ka inhre ve tlat a ni.
Ni 26.3.2007 khan MNF sorkar chuan, Burma leh Mizoram inrina Tiau luia Ramri hung (Fencing) turin Official Resolution an pass leh a. Hei hi keini chuan hnam phatsannaah ngaiin, a pass-naah tel duh lovin, kan chhuak tau (Walked out) bawk a ni.
Hetiang bawk hi kum 2013 (Congress sorkar laiin) a lo thleng leh a. Ka bial chhunga mi Kohhran Upa leh Kohhran Chairman ni lai Upa F. Vanlalenga te, kan Local Council Member ni lai Pu Lalbiakchhuma te thlengin hnawhchhuah an ni leh bawk.
Tunah erawh chuan, khang lai hunte khan mual an lo liam ta a, kan hliam hluite pawh dam se, hmalam hun i thlir tawh zawk ang u. Vanduainate hi Malsawmna inthup a lo ni fo thin a. Khawchhak lama kan unaute’n Tuilian in han tuar a, Kohhran, NGO leh Party te, hmun hrang hranga mite’n chhawmdawlna thilpek an hlan a. Manipur-a kan unaute leh Meitei-ho inkara buaina a chhuah khan, hmun hrang hranga awm unaute’n an support zia an lantir a. Mizoram leh Assam inkara ramri buai, Zophaia a lo thlen khan, khawvel hmun tina kan unaute chuan an support zia an rawn lantir vek bawk a. Harsatna kan tawh apiangin unau kan nih zia a lo lang thin a, awareness kan lo nei ta hle hi a lawmawm takzet a ni. Inpumkhatna thinlung hi thangtharte hian an rawn chhunzawm zel dawn tih hi a chiangin ka hria.
6. KAN AWMNA RAM LEH SORKAR-AH KAN RINAWM TUR A NI:
Tunhma lam khawvelah khan ‘Might is Right’ tih policy an kalpui thin a. Tunah erawh chuan, UNO zarah awpbeha awm thin Colony tam takin zalenna an lo nei ta hlawm a. Amaherawhchu, Tualto Hnam, Indigenous Peoples an tih, khawvel sorkar 70 lai hnuaia awmte erawh chuan zalenna kan la nei famkim lo. Chung Tualto Hnamte chu 370 Million lai kan tling a, chu chu khawvel mihring 6% lai a tling a ni.
Chung Tualto hnam (Indigenous People) chuan zalenna kan neih ve theih nan kum 2007 khan UNDRIP (United Nations Declaration on the Rights of Indigenous People) chu UNO General Assembly chuan a lo pass ta a.
He UN Declaration Article 3-na leh 4-na chuan, mahnia ro inrel theihna (Self Determination) min pe a. Article 36-na chuan Tualto Hnamte chu sorkar hrang hnuaia awm an nih chuan, sakhaw thilah te, Culture lamah te, Economic leh Politics thilah te kan awmna ramri kana kan intawhkhawmte min phalsak bawk.
ZPM (Zoram People's Movement) hian kumina inthlan lo awm turah hian, Pathian zara kan lo sorkar a nih chuan, Act East Policy hnuaiah Border Trade changtlung tak neih kan tum dawn a. Zokhawthara Land Custom Station hi tihpuitlin thuai kan tum dawn a. Tunah hian ZPM Policy pui ber pakhat chu sawhthing Kg 1 Rs. 50/- a lei a ni a. Myanmar leh India sorkar thuneitute hriatpuinain, khawchhak lama kan unaute'n Sawhthing in tharte chu Border Trade item zingah telh ve ngei kan rawn tum ang.
A tawp bera ka sawi duh chu, UNO in Right min pekte hi kan awmna ram sorkar inpumkhatna tichhe zawng emaw, an ramrite tidanglam zawng emawa hman tur a ni lo tih Article 46-na hian chiang takin a sawi a. Kan awmna sorkar do zawnga kalpui tur a ni lo va, sorkar nena inberawn a, kan remtih tlan chin ang zela a tahtawla kan neih tur a ni. Chuvangin, kan awmna ram theuhah kan rinawm tur a ni a, khua leh tui tangkai tak nih kan tum tur a ni. Kan awmna sorkar nena lungrual taka inbiain, Administration pakhat hnuaia awm tum phawt ila. Sorkar pathum hnuaia thendarha awmte hi rorelna pakhat hnuaia kan awm hun tur erawh chu Hnama min dintu Pathian kutah i dah ang u.
Ka lawm e.
Post a Comment