September beihrualKumin 2018 Beihrual thla chu dan pangngaiin nimin September ni 1 atang khan hman tan a ni a, tun thla pum a awh ang. 

Presbyterian kohhran chuan naktuk atanga Pathianni inkar chhung khian 'Ramthar Hapta' an hman ang a. Sept. 24 - 29 chhung hian 'Kristian Chhungkaw Hapta' hman a ni ang a. Sept. 30-ah 'Nu leh Pa Ni leh Kristian Chhungkaw Ni' hman a ni bawk ang. Beihrual hi kum 1918 June thla atanga hman tan a ni a, kum 1925 atangin September thlaah neih thin a ni ta a, kum 1947 atangin Nilai Zan Thupui Bu leh Beihrual Thupui hi bu khata siam tan a ni. Kumin hi Beihrual Kum 100 na a ni a, Beihrual Centenary hman dan tur ruahmanna hetiang hian siam a ni a. Synod chuan hetiang hian hun hman dan tur a duang a.

Beihrual tan zanah Beihrual kum za tlinna puala lawm thu sawi tawngtaina hun hman a ni a, beihrual chanchin ziah chu chhiar chhuah a ni. Chhungkaw tin tlawh chhuak zawnga hma lak ni se. Ni tin chhung inkhawm nei tur leh sawma pakhat pe tura tan lak te, Pathian biak inkhawm ngai pawimawh tura tan lak te, min nektu boruak hrang hrang - politics chungchang te, kohhran ngaih pawimawh leh a dangte inzirtir theih ni se. A ti thei chuan Bial leh Kohhanah Street Preaching neih ni se.

Kristian Chhungkaw Ni chawhnu inkhawm hi kohhran member inkhawm kim hram tura tan lak ni se. Beihrual Centenary lawmna ruai emaw thingpui ruai mahni kohhran theuhah a thei chuan mahni remchan hunah kohhran tinin buatsaih ni se. Synod-in Beihrual Centenary hriat rengna siam se, kohhran tinin, a thei chuan mahni kohhranah thiam angin Beihrual Centenary hriat rengna siam ni bawk se, tihte a ni.

Mizoram Baptist Kohhran pawhin kum danga a lo hman thin angin nimin, September 1 atang khan Beihrual Programme a hmang tan a. Kum danga tih thin dan ang bawkin Beirual thuzir hi thla chawhnu lam, September 21 atanga zir tan turin buatsaih a ni.

Thla chawhma lam September 1 – 20 chhung hian Tualchhung Kohhran hrang hrangin anmahni remchan dan angin – Crusade/Camping/ House Fellowship/House Church leh Home Visit Programme te an hmang leh dawn a. Kumin Beirual Thupuiah “Pathian ram” tih thu mi hrang hrang ziak zir a ni ang.
(AIR Desk)

Post a comment

Powered by Blogger.