History of MNF Mizo
MNF Thalai President Pu Lalrinawma MLA chuan sorkarin NLUP leh NEDP a kalpui mek hian ram ecomomy dinhmun a tih that phah lo niin a sawi.

Nimin-a MNYF Gen.Hqrs in fehchhuah programme Chanmari kawna a neihah Pu Lalrinawma chuan he thu hi sawiin, NLUP atan cheng vaibelchhe 2,800 an hmang tawh a, NEDP atan cheng vaibelchhe 2,000 an hmang tawh niin a sawi a. Avaiin cheng vaibelchhe 4800 hmang tawh mahse, ram economy a than phah chuang lo a, NLUP-a an hmalakna 100-a 90 chu Lo neih hna kaihhnawihah hman a ni a, mahse hemi kawng a thar chhuah a tlahniam thung niin a sawi.

Pu Lalrinawma chuan Kum 2010-11 ah Lo neih lama thawh chhuah chu za zela 20 vel a nih laiin chumi kumah vek NLUP-ah hmalak a ni a. Chuta tanga kum 5-na, 2015-16 a lo her chhuah chuan Agriculture lama a thawh chhuah chu za zela 18.80-ah a tla hniam leh si a ni a ti. Kum nga chhungin Agriculture lama thawh chhuah chu cheng khat leh pawisa sawmhnihin a tlahniam a, hei hi thu phuahchawp mai mai a ni lo va, budget-ah Finance Minister ngeiin a pharh micro-economic framework -ah chiang taka tarlan a ni a ti.

He hunah hian MNF MLA Pu Lalruatkima pawhin thusawiin, Congress sorkarin NLUP leh NEDP te a kalpui a, hei hi chithlummum, a fûnna mawi taka tuam ang chauh a ni a. Mipuite rethei takin siam ila, an retheihna denchhenin sum leh paiin vote kan lei mai dawn a ni tih hi an changvawn a ni a, chumi atan chuan NLUP an sem a, an hlawhtlinpui a ni, a ti a. Vawk note nuai chuang zet an sem tawh laiin vawksaah a intodelh em, vawksa man a tlawm phah em. Ar note nuai sawm chuang an sem tawh laiin arsaah a intodelh em, arsa man a tlawm phah em tih chhanna chu a la tlawm ngai reng reng lo tih a sawi a ni. 

Pu Ruatkima chuan, Nikum lawkah Sairang khuain nasa takin tuilian an tuar a, in leh lo eng emaw zat a chîm a. Chutah chuan tun thlengin sorkar atanga tanpuina pek mumal a la awm lo. Chutiang a nih laiin Kerala tuilian tanpuina’n cheng nuai 200 a pe a, chu bakah MLA-te chu an development fund atanga cheng nuai khat theuh thawh turin a ti bawk a.

Ramin chhiatna a tawh laia sorkar a ngawih reng laiin, Mizoram state aia hausa zawka chhiat an tawhin an phe leh vawn vawn si a. Zoram mipuite hian hmangaihtu leh thlavang hauhtu an mamawh hle tih a sawi a ni. (AIR CORR)

Post a comment

Powered by Blogger.