Bru Chhungkaw 42 Chiah Mizoramah An Lo Kir

Tripura relief camp 6-a awm Bru hote lokir hun tur ruahmanna hnuhnung ber hun bituk chu vawiin khan a tawp a, August ni 25 leh vawiin inkarah chhungkaw 42 chiah Mizoramah an lo la kir.

Home department atanga thudawn danin Bru laklet hun intan hlim khan chhungkaw 3 chauh an lokir a, a hnu-ah chhungkaw 28 lokir lehin kar hmasa khan chhungkaw 11 an lokir leh a, tunah hian lokir duh nia insawi chhungkaw 3 an awm mek a ni. Tun dinhmunah chuan an lokir hun tura ruahmanna hun a tawp tak avangin Mizoram sorkar chuan Bru laklet hna hi a chawlhsan fel tawh niin Home department hotute chuan an sawi a, sorkar laipui lamin thu dang an rawn neih leh chuan la ngaihtuah tur a ni ang an ti.

Tripura lam atanga thudawn danin nimin piah khan North Tripura district-a Kanchanpur leh Panisagar sub division thuneitute chuan relief camp a tanpuina pek thin chu Thawhtanni, October ni 1 atanga tihtawp a nih dawn thu aurinna hmangin an puang a. Hemi avang hian relief camp-ah te hian boruak a sosang hle a, Mizorama kir duh leh duh lote an inthen phawk nia thudawn a ni. Bru chhungkaw tam tak chuan Sub Division pahniha SDM te hnenah hian Mizorama an haw duh thu sawi a, an hming ziah luh an tum a, kir duhlote hian na takin an lo vau nia sawi a ni a, SDM Pisa an kal kawngah an lo dang hlawm bawk a ni.

July ni 3-a Delhi a inremna an siamnaa hming ziah hnan vetu Mizoram Bru Displaced People’s Forum (MBDPF) hruaitute leh he inremna duh lova pawl hran – Mizoram Bru Displaced People’s Coordination Committee (MBDPCC) te chu an inep mek a. MBDPF hruaitute an ngawih reng laiin MBDPCC hruaitute chuan Mizorama kir duhte hi an dang a, an vau bawk a ni. October ni 1 atanga tanpuina an dawn tihtawp a nih chuan lungawi lohna lantirna’n kawng dan chah hial an tum thu MBDPCC te chuan an sawi a. Kanchanpur SDM Avedananda Baidya chuan an thutlukna siam chu thutawp a nih thu leh Bru hruaitute’n buaina an siam chuan khauh taka enkawl an ni ang a ti a. Police lam pawh inringin helai bialah hian Police tam zawk tirh luh belh a ni tawh a ni. - AIR News Aizawl