GOVERNMENT J BUANA COLLEGE LUNGLEI AH MYC-ALS ONLINE IAS COACHING HAWNG

mizo newsMizoram Youth Commission leh Govt JB College ten tangruala an din ALS Online IAS Coaching chu Commission member, Prof J.Zorema, Principal, JB College chuan nimin khan Lungleiah a hawng. Tunah hian IAS coaching kal lai 27 an awm mek.

Khuallian Prof J.Zorema chuan MYC hi a hming chauh kan hre thin a, Pu Joseph Lalhimpuia, Chairman MYC kaihhruaina hnuaiah Lunglei thalaite pawhin an chhawr tangkai mek a. M.Y.C coaching avanga hna hmu an awm nual ta mai a ti a. IAS coaching kal te chu fuihin Mizo society ah chuan khawtlang leh Kohhranah thalaiten mawhphurhna tam tak kan nei a, mahse IAS coaching kal tan chuan heng zawng zawnga tel hi a rem lo, theihtawp chhuah ula in tlin hunah Kohhran leh khawtlang tan in tangkai zawk dawn a ni a ti.

Khualzahawm, Pu Lalrintluanga Khiangte pawhin Coaching kal lai te chu fuihin tunlaiah chuan tih tak takna nen, tum mumal, tum sang tak neia beih a tul tawh. Kan thalai te zingah hna mumal neih loh avanga thil thlir dan pawh kawi tlat mai tam tak kan awm tawh a, mi thatna hmu thiam lo, mi hnathawh that appreciate thiam lo thalai kan pung zel. Nangni erawh chu khawthlir dik tak nen, hlawhtlinna chang turin theihtawp chhuah ula, a hlawkna chu ramin a tel dawn a ni a ti.

Pu Lalmuanzuala, Youth Commission Officer, Southern Mizoram Zone chuan inkhawm kaihruaiin M.Y.C hmalakna hrang hrang a tarlang a. Tunah hian Lungleiah IIT-JEE & NEET Online Coaching ah naupang 150 an kal mek a, SSC/MPSC & IBPS coaching kal lai mekah mi 180 kalin an zinga mi thenkhat chuan hlawhtlinna an hmu tawh a ni a ti. SSC CAPF leh Army GD atana coaching buatsaih mekah thalai 150 vel bawr zing tin Physical training leh coaching an kal a ni a ti.

Nimin IAS coaching hawn tak hi Govt J.B College, RUSA Hall ah nghah a ni a. Hall thar hlak niin hun rei lo teah Air Conditioner pawh bun leh thuai tum a ni. - DIPR

Post a Comment

Powered by Blogger.