Vawiin khan Kolasib Saidan veng ah School Education Minister Pu H. Rohluna chuan kolasib ah DIET Institutional Building a hawng.
Khuallian Pu H.Rohluna chuan District hrang hranga DIET Instituional Building hawn theih a peihfel ani chu thil lawmawm tak ani tiin DIET chu zirna hmun pawimawh tak ani a, DIET a thawk zirtirtu te chu hna pawimawh tak chelh anni a, an zirtir chhuah trainees te quality ah Mizoram a zirna chuan thuitak a innghat a, inthladah a thianglo ani a ti. Minister chuan Sawrkar in a phak tawkin zirna hmunhma leh kalphung tha a kalpui a, zirna quality titha tur chuan DIET atanga bul tan a ngai ani tiin zirtirtu quality tha nei turin DIET chu a pawimawh hle a hemi avang hian Sawrkar chuan District hrang hranga DIET bakah sikul hmunhma te a cheibawl chho mek zel a, kuminah pawh Sawrkarin NEDP atangin Educational Infrastructure (zirtirtu quarters leh school Buildings) thawmthat nan Crore 10 a dah thu a tarlang a ni.
Khuallian chuan North East a a hmasa ber ni turin Aizawl leh Lunglei DIET ah B.ed zirna hawn a nih thu a tarlang a hei hian zirtirtu training na kawng ah nasa takin hma an sawn chhoh a beisei thu a sawi bawk a, Education Minister chuan DIET Building hawn thar chuan zirna kawngah rah tha tak a chhuah a beisei thu tarlangin Ram leh Hnam siam that chu a chhunga chengte mawhphurna ani tiin chhuan lo la awmzel tur te tan Mizoram chu ram nuam leh ram hmasawna kan siam a ngai ani a ti.
He huna Khuallian tawiawm tu Kolasib A/C bialtu MLA Pu PC Zoram Sangliana chuan Education Department hmalakna pawimawh tak hmuh theiha a awm chu thil chhinchhiah tlak ani tiin DIET Instituional Building hawn thar chuan Kolasib District chhunga zirna kawngah hmasawnna nasa tak a thlen ngei a beisei thu a sawi bawk a ni.
Kum 2015 March thla a sak tan kolasib DIET Institutional Building hawn thar hi cheng nuai 223.46 senga sak ani a, a zau zawng (Total floor Area) hi 736.78 sq.mt niin zopa chhiar a chhawng thum a ni a, Pi Liankungi (contractor) Saitual khua sak a ni, DIET Institutional Building hi Siaha leh Lawngtlai ah hawn tawh niin District dangah pawh hawn theih a peihfel anih thu tarlan a ni.
Hawnna inkhawm hi Pi Esther Lal Ruatkimi, IRS, Commissioner & Secretary, School education Department in a kaihruai a, kolasib khaw chhunga Department hotute bakah tlawmngai pawl hrang hrang hruaitute leh Media mi te an kalkhawm a, Pi Laldawngliani Chawngthu, Director SCERT in lawmthu sawiin hun a khar a ni. - DIPR
Post a Comment