Mizo Zirlai Pawl (MZP): Vawiin 27th September, 2018(Ningani) chhun dar 12 :00 khan MZP Conference hall MZP Pisa Pui-ah MZP Executive meeting neih a ni a. Meeting hi Tv. L. Ramdinliana Renthlei President chuan kaihruaiin, Meeting-ah hian kum 2018 MZP khawmpuilian (MZP Assembly) Saitual a neih tura thupui tur chungchang; *Zirlaite Ni* hman dan tur; Kum 2018 a MZP Inter-High School Quiz neih dan tur leh Zophai buaina a hliam tuarte leh thilchhia rulhna tura Vehbur khawn pawisa tling khawm sem dan tur te rel a ni.
ZANGNADAWMNA SEM DAWN


Meeting chuan, Ni 24th-26th, October, 2018 chhunga Saitual a Mizo Zirlai Pawl(MZP) khawmpuilian leh rorelna neih turah thupui thlan bik neih tha tiin, thupui tur rawtna tam tak lut zingah. ‘‘Mizo Zirlaite : Kan ram leh hnam tan’’ tih chu hman nise tiin a rel a. He thupui hmang hian sawm bik leh ruat bik te'n Mizoram hmun hrang hrang a tanga zirlai, College hruaitu leh Hnampual hruaitu kal khawmte hmaah thu an sawi dawn a ni.

Kum danga an lo hman thin tawh ang in MZP Rising day Ni 27th October, 2018 (Zirlaite Ni) chu hman leh ngei tha a ti a. Ni 27th October, 2018 hi Inrinni a nih avangin Ni 29th October, 2018 (Thawhtanni) hian MZP huaihawtin Aizawl leh Mizoram hmun hrang hrangah Zirlaite Ni a nih angin, Zirlaite tana tangkai tur leh an zirna atana tha turin hun a hmang leh dawn a ni.

MZP chu Zirlaite tana ding a nih angin, Mizo zirlaite tan an zirna-ah result tha tak an neih theih nan MZP Inter High School Quiz a lo buatsaih thin chu ropui taka buatsaih leh tha a ti a. Kumin December thla hian MZP Inter High School Quiz,2018 chu zirlaite tan a buatsaih leh dawn a. He hunah hian Mizoram chhunga High School zawng zawngte tel turin leh zirlaite pawh lo inbuatsaih lawk turin MZP chuan a sawm nghal a ni.

Ni 10th March,2018(Inrinni) a Bairabi Zophai hmuna Pu Ch. Chhunga(L) Ex-Chief Minister chhung ten MZP te ram a peka Zofate Chawlhbuk sak a tum ni a Assam Police ten tlawmngaia thawk chhuak Mizo thalai tam tak vuak mai duh tawk lova Silai hiala a kah hliam a, Mizo thalai thawkchhuakte bungrua, thawmhnaw leh motor te an tih chhiat leh an hal sak, Mizoram Sokarin zangnadawmna leh thilbo leh chhia, hliam tuarte enkawlna tur dil tura a tih hnua a pek leh theih loh avanga MZP ten kan thiam ang tawka VEHBUR khawn leh mimal thahnem ngaite min pek tlingkhawm chu Ni 6th October, 2018(Inrinni) hian MZP conference hall-ah a sem chhuak dawn bawk a ni. He hunah hian Mizo mipui a duh apiang lo tel turin MZP chuan a sawm nghal a. VEHBUR a pawisa lo thlaktu leh mimal thahnemngaihna a MZP Account-a lo thuntu Mizoram chhung mai ni lo khawvel hmun hrang hranga Zofate chungah MZP chuan thinlung takin lawmthu a sawi nawn leh a ni.

Meeting chuan Zirlaite tan career awareness campaign buatsaih nise a ti a, Aizawl khawpui leh Mizoram hmun hrang hrang High School leh Higher Secondary school-ah zirlaite tan career awareness campaign hi neih tur a ni ang.

Sd/-
(LALNUNMAWIA PAUTU)
General Secretary

Post a Comment

Powered by Blogger.