Mizo Hnam Dan (Mizo Customary Law) Published by Law & Judicial Department, Government of Mizoram. 1st Edition 2006. As published in the Mizoram Gazette Extra Ordinary No. Vol. XXXIV Aizawl Wednesday 6.4.2005 Chaitra 16, S.E. 1927 Issue No 66.

Mizo hnam dan

BUNG - 4  NUPA INTHEN CHUNGCHANG


Mizo zingah Nupa Inthen Dan chi hrang hrang a awm. Chang 75 MA/MAK Mipain a nupui duh lova a then hi Ma a ni.

Tupawhin a nupui a mak chuan, a nupui chu a pasal laka thisen pal a ni emaw ni lo emaw, a man ba zawng zawng a tlak vek tur a ni. A nupui chuan a bungrua leh thuam zawng zawng a chhuahpui vek thei. Nupa an neih chhunga an thawhchhuah dun In leh Lo leh bungruate chu chhungkhat lainaten awm an tih ang angin an sem ang a;annin an sem theih loh erawh chuan khawtlang roreltuten an semsak ang.

Hmeichhiain a in lam pan nan sum sen ngai sela,mipain a tumsak vek tur a ni. Nupa la indang lo, nu leh pate nena la awm chu, an thawhchhuah dun pawh Pa angchhunga la awm an la nih avangin Pa ta vek a ni a, insem theih a ni lo.

Chang 76 SUMCHHUAH 

Hmeichhiain a pasal a duh lova, ama thua a then chuan ‘Sumchhuah’ a ni. Sum a chhuah chuan man pek tawh zawng zawng chu man eituten an pe kir leh vek tur a ni. Man atana tangka aiah bungrua pek ni sela, chumi ngei chu pekkir leh tur a ni. A awm tawh loh chuan a tira an pawm dan ang hu tawk an pe kir tur a ni. Hmeichhiain a thuam leh ama pual a bungrua a chhuahpui thei.

Nupui nei laiin nula ngai sela, a nupuiin a pawm duh loh a, a chhuahsan nghal chuan, sumchhuah a ni lovang a, a bungrua mipa ina a luhpui ngeite chu a chhuahpui thei bawk ang. Man bat a awm chuan pek tur a ni.

Nula ngai tih emaw tlangval ngai tih emaw hi nula kher emaw tlangval kher emaw ni lovin hnmeichhe mutpui emaw mipa mutpui emaw tihna a ni.

Chang 77 SUMLAITAN 

Ngam leh ngama nupa inthen hi ‘Sumlaitan’ a ni. Man zawng zawng pek tlak hnua sumlaitana inthen an nih chuan man eituten an man ei atangin a zatve an pekir leh tur a ni. Mipa chuan man zatve pawh a la pe lo a nih chuan, man zatve tlinna tur a pe ngei tur a ni. Sumlaitan ni mahse, bungrua leh thuam hi then chi a nih ve loh avangin hmeichhia chuan a chhuahpui vek thei.

Chang 78 PEKSACHANG 

Man pek tawh zawng zawng chhuak leh tawh lo tura inthenna hi ‘Peksachang’ a ni. Peksachang tih cvhuan man atana pek sa chauh a kawk a;hmeichhe bungrua leh thuam a huam lo va, hmeichhia chuan a chhuahpui vek thei.

Chang 79 KAWNGKA SULA MAK 

Nupui pawm lai neiin hmeichhe dang nupui atan a hruailuhin emaw, nupui thlakna tura hualsa nei emawa a nupui pawm lai a mak chuan, ‘Kawngka sula mak’ a ni. Kawngka sula mak hmeichhia chuan buhbal leh bungbel hmun thuma thena hmun khat a chang thei. Buhbal tih hian ei leh bar leh eizawnna tur a an lo thawhchhuahte leh inchhhung bungrua pawh an pahniha an lo thawhchhuah apiangte chu a huam vek a ni. Roluahtu, nu leh pa in luahtu ngei pawh nu leh poa an thih hnua an nupaa an thawhchhuah dun chu a huam vek a ni.

Nupa la indang lo, chhungte dang nena la awm chu a huam lo. Hmeichhia chuan a bungrua leh thuam, hmeichhe pual bik a chhuahpui vek thei.

Chang 80 UIRE 

Pasal nei laiin mipa dang ngai sela, Uire a ni. Uirena hi hmeichhe sualna chungchuang tak a nih av angin a man pek tawh zawng zawng lak kir leh vek tur a ni a, a bungrua leh a thuam zawng zawng a chan vek bawk ang. Pipute atangin,’vun inhlihsak’ em chu an ti ngai lo va, hak lai an chhuahpui thei.

Pasal sun, inkaichhuak lova pa dinhmun luaha fate enkawltu pawh, mipa laka a chetsual chuan Uire a ni. Chutianga uire chu, a faten emaw, a pasala chhungten emaw, a tu zawk zawk pawhin an hnawtchhuak thei. A faten hnawtchhuak lova awmpui zel an duh chuan an awmpui zel thei a, khumpui erawh chu a chang thei tawh lo.

Chang 81 PASAL AWM LOH HLANA CHHUAK

1) Hmeichhia, a pasal awm loh hlana mahni thua chhuak chu ‘Tlan’ a ni. A pasal lo hawn a, a kohva a haw duh loh chuan ‘Sumchhuah’ a ni. A pasalin a koh duh loh chuan a ‘Ma’ a ni

2) Hmeichhia, a pasal awm loh hlana a pasala chhungte nen inngeih loh vanga, a pasala chhungter chhuahtir chu a pasal lo haw leh hnua koh tur a ni. A pasalin a koh duh loh chuan a ma a ni. Kohva a haw duh loh chuan sumchhuah a ni. A pasal lo haw hmain a tu zawk emaw lo thi sela, mahni thua chhuak chu Sumchhuah a ni a, Pasal chhungte chhuahtir chu mak a ni.

Chang 82 ATNA AVANGA INTHEN 

Nupa tu emaw zawk lo a sela, inthen tura ngaih a ni lo. Kum thum (Thla 36) chhung chu inenkawl ngei ngei tur a ni. Amaherawhchu, kum 3 hnuah pawh a reh loh va, inthen loh theih a nih loh chuan, Peksa changa inthen theih a ni. Kum thum hmaa mipain a then chuan a ma a ni a. Hmeichhe chhungten loh theih lohna avanga an lak chhuah chuan Sumchhuah a ni.

Chang 83 NUPUI FANAU CHHUAHSAN

Nupui nei laiin nupui atan hmeichhe dang a duh zawk avangin inthenna thu pawtchata, a nupui a chhuahsan chuan ‘Nupui fanau chhuahsan’ a ni. Nupui fanau chhuahsantu chuan a chhuahsan ni atangin a in leh lo a chhuahsan chu a chang ang a, a fate ta a ni ang. Fa nei, a fate nu chu chang 102 a sawi angin a fate enkawltu a ni.

Fa nei lo an nih a, an in leh lo chu an nupaa an din a nih chuan, anupui ta a ni. Nupui fanau chhuahsantu chuan inthennna chu tichiang lo leh pawtchat lova nupui fanau a chhuahsan a, nupui fanau lakah a mawhphurhna pawh engmah ti duh lova kum thum (Thla 36) a awm chuan Nupui fanau chhuahsan a ni.
Note : In leh lo tih hian,chhungkuaa thil neih zawng zawng a huam.

C hang 84 NUPUI FANAU TLANBOSAN 

Nupui nei laiin nupui dang neih duh vang ni kher lovin, chhan awm lova a zinnaah emaw, a hnathawhnaah emaw, eng vang pawhin rei tak awm sela, a nupui fanau laka a mawhphurhna pawh engmah ti lo leh chin hriat lohva kum thum chhung a awm chuan ‘Nupui fanau tlanbosan’ a ni.

Chumi hnuah a lo hawn leh pawhin, nupui chuan a lo duh tawh lo thei. A nupuiin a duh tawh loh chuan a in leh lo a chan ang a, a fate ta a ni ang. A fate nu chu chang 102 a sawi angin a fate ta a ni ang. An tuten pasal pawh lo nei sela, pusum kha a pu aiah an piin a tel thin. Fa nei lo an nih a, an in leh lo chu an nupaa din a nih chuan, a nupui ta a ni.

Chang 85 HMEICHHE BUNGRAW LAK 

Uirena tih lohah chuan, engti kawng pawhin nupa lo inthen sela hmeichhiain a bungrua a la kir leh vek thei. Hmeichhe bungraw laknaah mipa bungrua lo tel palh sela, in pek kir leh mai tur a ni a, rukru anga puh theih a ni lo. Bungrua lak hian mipa lam leh hmeichhe lam hriatpuitu fel tak an awm tur a ni.

Chang 86 ZANGZAW 

Mipa, vanduaina avanga mipa thei lo hi ‘Zangzaw’ a ni. Zangzaw chu inenkawl nan thla thum nghah tur ani. Thla thum thlenga nupui a pawl theih loh chuan, a nuipui chu peksachangin a kal thei a, thla thum nghak zo lova kal chu sumchhuah a ni. Hmeichhiain a pasal chu Zangzawah puh sela, a puhna chu a dik loh chuan, hmingchhiat man chawitir theih a ni. Chumi bakah mipain anupui chu a pawm duh loh chuan Sumchhuahin a kal tur a ni.

Chang 87 CHHUPING 

Hmeichhia, vanduaina avanga chhuping pasal pawl theih loh chu, inenkawl nan thla thum nghah tur a ni. Thla thum hnuah pawh pawl theih loh a la nih fo chuan, Peksachanga kaltir theih a ni. A pasalin thla thum tlin hmaa a chhuahtir chuan a ma a ni. A nupui pawhin thla thum a nghah duh loh chuan sumchhuah a ni.

Chang 88 NUPA INPAWL DUH LO 

Inneih atangin mipain a nupui pawl duh lo sela, thla khat chhung nghah tur a ni. Thla khat hnuah pawh a la pawl duh loh fo chuan, a nupui chu a chhuak thei a, a pasal chuan man zawng zawng a pe tla vek tur a ni. Chutiang bawkin hmeichhiain a pasal pawl a duh loh chuan thla khat hnuah a chhuak ang a, man zawng zawng a pe kir vek ang.

Chang 89 NUPUI TLAN KOHNA 

Hmeichhia, pasal nei lai chu eng vang pawhin a pasal hnena awm duh lovin ama chhungte hnen lamah awm se, Tlan a ni. Tlan kohna chu an tlan chhan a zirin Rs.5/- atang Rs.20/- thleng a ni thei a ni.

Chang 90 SAZUMEIDAWH 

Tlangvalin man awm lovin hmeichhia an chhungte remtihnain nupuiah neih duhin luhkhung sela, hun eng emaw chenah duh lovin chhuahsan leh ta se la, Sazumeidawh a ni. Chutiang Sazumeidawh chuan, eng pawh lo thawk chhuak mah se, a luhpui bak chu engmah a chhuahpui thei lo.

Chang 91 NUPA INTHEN FATE DINHMUN 

Mizote hi pipute atang rengin Pa lam atanga chi kal a nih avangin fate chu Pa ta an ni. Nupa an inthen chuan, an fate kum thum tling lo chu Nu hnenah an awm thin. Nu lam chuan hnute hne lai chu pa hnenah an hruai thin. Kum thum tling lo chu pain lakluih loh tur a ni a. Nuin pa hnenah a hruai loh pawhin fa chu pa ta a nih avangin enkawl thuah Pain mawh a phur. Kum thum tling tawh erawh chu, Pa hnena awm tur an ni a; nu hnena awm zawk an nih pawhin nuin chawm man a beisei thei lo. Fate enkawl thuah erawh chuan, englai mahin Pa a inthiarhlim thei lo Fatlum erawh chu nuin a tulpui peih chuan pain a chuh buai thei lo va, an fa dangte pawh an inbiakrem dan azirin Nuin a awmpui thei.

Duhthlanna hmang thei an nih hnjuah chuan, an faten an awmna tur duh an thlang thei. An fate chu khawiah pawh awm se, nupui pasal neih thuah chuan pa chan leh mawhphurhna a ni reng.

Post a Comment

  1. Mipa phallo chung chhuak lui a koh chitin rêng a koh pawh a haw duh lova sum chhuah duh chuang silo hi eng dan a chinfel chi nge ni ang le?

    ReplyDelete
  2. Chang 91 fa in duhthlang thei dinhmun ading chuan aduhna athlang thei tih hi fa chu kum zat bithliah a awm em.kum 18 tlin hma chu a enkawltu nubulah a awm thei,pa in achuh thiang lo ti te an awm a

    ReplyDelete
  3. Chang 80 na, uirena sual hi dan in a hrem thei em? Entir nan kan nupui ten midang lakah fate hial lo pai tase

    ReplyDelete
  4. Naupang duhthlang thei hi kum eng zat chin nge ni ang le.

    ReplyDelete
  5. Naute hnute hne lai nu in aruih san reng mai avanga nupa iná¹­hen hi Pa in naute lak theihna dan kan nei em

    ReplyDelete
  6. Ka lo zawt ve lawk ang e pasal awmlo hlan a hmeichhia a chhuah a mahse fa lo keng leh hman si a hmeichhia in haw leh aduhthu asawipawh a mipa a ngawih thlat si chuan engtia titur nge le

    ReplyDelete
  7. In sak leh inchhung enkawlna pawh a nupui sum vek ni ta se, a pasal awm that duhloh vangin inthen se a nupui khan in chu a Chang thei em? a fate pawh an nu bulah vek awm tur ni se?

    ReplyDelete
  8. Pasal uire vangin nupuiin inthen lo duh ta se,a nupui khan an inneih chhung a a bungraw lei ang ang te,an intawm a a lei angte a chhuahpui dan a awm em???...an fate kum tling lo vek la ni ta se a hruai thei em??

    ReplyDelete
  9. Naupang in duh a thlang thei tih hi kum engzat chin ge le

    ReplyDelete
  10. Pasal fanau te chhuahsan a, haw duh tawh silo, koh pawh a haw duhlo hi danin eng angin nge a chinfel ang le?

    ReplyDelete
  11. Pasal fanaute chhuahsan a,haw duh tawhlo hi danin engtin nge a chinfel ang?

    ReplyDelete
  12. hmeichhia eng emaw avangin lo inti thiam lovin lo TLAN sela chumi atlan chhung chuan Mipa lo ngaiin lo hmeichhiat mipat na lo hmang sela, a pasal chuan hre lovin ko leh sela ( in nei leh sela) chumi hnu ah Pa chuan anupui in atlan laiin mipa angai ani tih lo hre chhuak chauh sela engtiang a rorel tur nge ni ang

    ReplyDelete
  13. Hmenichhia eng emaw avang in lo inti thiam lovin lo TLAN sela chumi a Tlan chhung chuan Mipa dang lo ngaiin hmeichhiat mipat na lo hmang sela a pasal chuan hre lovin ko leh sela ( innei leh sela) chumi hnu ah A pasal (Pa ber) chuan a nupui in a tlan laiin Mipa dang a ngai ani ttih lo hre chhuak chauh sela engtiang a Rorel tur nge ni ang.

    ReplyDelete
  14. Mipa in hmeichhia nupui atan luhkhungin, pakpa chhung khung ah awm se, a nupui man chu pek a ngai em

    ReplyDelete
  15. This comment has been removed by the author.

    ReplyDelete

Powered by Blogger.