NUPA NUN TIBUAI FO TU MOBILE PHONE HI HAN BIH CHIANG I LA

~ Rama Tualzik

Zan khat chu nupa tuak khat hi zanah hlim taka an mut tui lai takin an nu phone zawk chu SMS rawn thlengin a ri ral ral a.An pa chuan, "Nu-i, i phone a riin ka hria, a pawimawh em, han en teh" a ti a. An nu mutui lai chuan, "ka peih rih lo, pawimawh lo vang" a ti mai a, a hnu deuh chuan a rawn ri leh a. An pa zawk chuan phun nuah nuah pahin an ensak chu, a va phu chiang kher em! An nu phone-ah chuan tlangval pakhat hian, "Bawih, muhil tawh mi.. in pa awm em.. ngai lutuk che.." tih ang reng velte hi a rawn thawn a.

An pa thinlung chu a va puak keh darh chiang em ve le. An nu inbox an check chiang chu a rilru na lutuk leh zak hrehawm ti lutuk chu a țap ta tlawk tlawk a. An ințhen phah chu a ni ta der mai. An pa thinlung na lah sual lam kawng a zawh phah zui nen, a va pawi tak em !

Tun hnaiah pawh nu pakhat hian Fb leh Whatsapp velah phone chhass a nei a, vawi tam an pa'n a hauh hnu paw'n a sim thei lo va, tunah hian fa panga lai nei chungin an ințhen mek bawk. An pa thinrim chuan an nu Fb Account ațangin an nu chhass hote chu a vauin an nu chanchin chu nasa takin a post-in a chhuah chhe zui bawk a, a va pawi tehreng em !

Tlem lai deuh pawh khan Kohhran Upa lehnghal pawh Social media hi a atchilh ve tlat mai a, amah phei chu kum 70 dawn tawh ni chungin nula han chhaih vel hi a peihin phone chhass te hial zu nei a maw le. "Nupui a neih atan pawh ka ti chuang hlei nem" fiamthuin a la ti zui a, a zak miah lo zunia. Hengho hi tun hnaia thil thleng langsar ka hriat chianho an ni a, nangni paw'n hriat in ngahin ka ring.

Kawplai nei chung leh Nu/Pa ni chunga nula tlangval ngaihzawn ching te, nupui fanaute muthilh lai chuha nula chhaih ching te, mi nupui leh pasal an ni tih hre reng chunga mi chhungkaw tih chhiat hreh miah lo mihringte hi a tuartu tan chuan an va huatthlala awm dawn teh reng em!

Nula tlangval tam tak an awm laia pawm lai nei ber kher han ngaihzawn tlat mai hi ka hrethiam thei tlat lo.. Kawppui nei tawh lo leh ințhen tawhte hi chu thuhran daih a ni. Chu pawh chu an ințhen kan lawmpui ta zawk emaw tih hial tura lo khawsakpui zui duh tawkte pawh zu la awm lehzel a. He'ng ho hian nupui pasal an neih ve hunah an thiltih sual man hi chu an la hmu ve khawp ang mawle.

Nupa inthennaah hian thihna tih lohah chuan a nâ ber chu uire-na hi a ni. Chu chu mipa tan phei chuan 'chem lova lu lak' an sawi hi a dik khawp mai. Tun hnaiah pawh News-ah kan hmuin ka ring a, An nu uire lai a man a, a uire tupa chu a that a, pawnah an nu nen saruakin a ruang mipui hmuha a pho chhuah kha.

Mipate hi chu a kaw tawpah chuan thih hi an hreh lem lovin tualthah hial pawh a thinrim vawrtawpah chuan an pawisa lo fo țhin. Uire ngaihdam tate hian engtikah mah nupa nun hlim takin an hmang tawh ngai lo, an ti.

Sawi tur a tam mai, chu vangin nupui pasal nei kan nih tawh chuan kan kawppuite tana rinawm taka awm hi kan tum ber tur a ni. Mahni phone security lock leh password, kawppuite hrilh duh miah lo te, kawppuiten phone an check ang tih hlau reng renga awmte hi a takin va uire kher lo mah se, thinlung ber a uire tawh chuan Pathian ngaihah chuan ngaih melh pawh uire a nih avangin uire tlukpui tho an ni tih hriat a țha.

Social media, Facebook leh Whatsapp vel kan khawih ve duh a nih pawhin kawppui kan nei mek a ni tih hi kan status, DP leh Profile Picture, photos-ahte hian kan post țhinin kan tilang ngam tur a ni. Țhenkhat chu an account photo a an kawppui leh chhungkaw thlalak pakhat mah awm lo leh single ang mai a mahni thlalak chauh sexy deuh deuha dah țeuhte hi zu han awm a.

Mawi ka tih em em chu, an DP leh PP a mahni kawppui leh chhungkaw thlalak hmang te, mahni profile name a kawppuite hming nena inkawpa hmang dun nupa, a bikin hmeichhiate hi ka ngaisangin ka zah hliah hliah țhin.

Khawvel mit hmuhah an kawppuite an ti zahawmin an ti hmingțha hliah hliah bik. Mahni kawppuite zahpui ang ziazànga an hming leh thlalak vawikhat mah tilang ngam lo mihring hi chu mi dawihzep leh lepchiah tak an ni duh chàwk.

A tawp nan, thianghlim takin Mobile Phone leh Social media hi a hman theih a, a țha zawngin hman i tum hram hram ang u. Chumi avang erawh chuan kulmûk run tur tihna pawh a ni chuang lo.

Kan kawppuite mit tikham zawng leh thik turin i awm lo hram hram ang u. Nupa intih thinrim palh lai chuha Mobile phone a midang bia a nui leh awr awr thei si, biak zawh veleha kawppuite bula tûm leh vuau bawk si leh inrunluih nan te i hmang lo hram ang u.

Ka lawm e.

PS : Ka țhat bik leh fel bik em vanga ziak ka ni lo ania, tunlaiin nupa nun buai an tam em avanga kan țangkaipui hlauh beiseia ziak ka ni e, a kohhran sadài nek puarlo zawng leh kawppui te laka rinawm tak chung hian, hlim takin a tawk chauhin țhian a kawm theih reng a nia! Tu huatthu mah ka sawiloh hram ka beisei.