Lei min avanga khaw kar kawngah i lo tang ve tawh anih ngai chuan minute 5 rei zia i hre chiang viau ang a, lei min thian fai tura JCB nghah chhung a rei duh zia leh a lo thlen a JCB Operator hmelthat zia i hre fiah viau ang.

PU LALHMUNSIAMA


Tui taka i mu lai zing dar 2 vela an kaihthawh che a thawh a harsat zia pawh i hria tiraw? Hna thawk tura inkaihthawh phei chuan thophang tak chunga hnathawhnaa liam nghal tur chuan mi chhel tak i nih a ngai ngei ang.

Tukin khan Pu Lalhmunsiama PWD Highway Division JCB operator chuan a hnathawhna lamah a nunna a chan a, "R.I.P" tia comment lama han thlahliam mai hi a uiawm a, nupui fanaute chawmna atana midangte tanpuia mahni hna thihchilhtu ngaihsanawmna hi thailan loh atan chuan uiawm ka ti mang e.

Hmanah kan in rawng hnawihtu kan makpa a tlak hlum tumin a vuinaah a vuitu UPC Pastor chuan, "Mi dangte tana nun hlantute leh mahni hnathawhnaa thi te hi thih dana ka ngaihsan berte an ni," a ti a, ka han ngaihtuah chiang a, dik ka ti viau mai. Tukina nunna chantu Lalhmunsiama pawh hian huaisen takin a hna a thih chilh a, mi ngaihsanawm tak a ni.

Tarlan tawh angin nizanah Khamhar leiminin kawng a dang ping a, loh theih lohna avanga zana zin khualzin engemawzat leh ruang phur motor te he leimin hian a dang a. Pu Lalhmunsiama mutui lai chu he kawng clear anih theih nana JCB khalh turin kaihthawh a ni a. Working Hour a ni lo a, zan muttui lai tak a ni a, chhuanlam han siam mai pawh a chakawm viau ang. Mahse Pu Lalhmunsiama chuan tlawmngai takin a rizai a tlawh hlim a, a han inphihharh hnuah mi zawng zawng deuh thaw tui taka kan la muthilh laiin midangte tanpuia a hna thawk turin thimtham hnuaiah a inkhalh chhuak ta a. A hma lawka a thil tawn tur chu engmah a hre lo.

Leiminna hmun a thleng a, leimin zawng zawng thenfai hmain a rang thei ang bera khualzin tangkhang, helai hmuna darkar engemawzat lo tang tawhte an kaltlang thuai theih nan motor tlan theihin lei chu a han hnawl liam phawt a.

Khualzin tangkhangte an liam fel ta maw tihah a zualpui thianfai zui tura hna a han thawk leh chu kawng tlang lei nemin a JCB a zo ta lo a, muangchangin an liam thla ta a, duh se chu a zuangthla hman niin mita hmutu ten an sawi. Helai takah hian Pu Lalhmunsiama huaisenna, a fakawmna, a chhuanawmna, a ngaihsanawmna a hmuh theihin ka hria.

JCB kha Pu Lalhmunsiama mimal ta a ni lo va, sorkar ta a ni. Lum vang vangin insawh sawm vek pawh nise sorkar chuan a dang a lei thei a, a lei leh mai ang tih pawh Pu Hmuna hian a hre chiang viauin a rinawm. Mahse JCB operator anih angin khawl tha taka enkawl a, tha taka hnathawh a, him taka khalh haw leh chu a tihtur a kova tla a ni tih a hrechiang hle a, a theihtawp chhuahin JCB liam tur thunun a tum a, JCB in a liam pui a, a nunna a chan ta.. A hnaah a va rinawm em!

PWD hian a nupui hi IVth Grade hna tal pe se tuman kan thik awm lo e. Kan naupan laiin Lawng captain chu lawng a pil pawhin lawng a chhuahsan ve a thiang lo tiin min hrilh thin a, lawng captain kan ngaisang thei hle. Pu Hmuna hian a office a JCB hi a hrechiang hle a, a himna atan theihtawp a chhuah hi a ropui hle mai. An sawi angin khatia zawimuanga JCB a liam lai khan a zuang thla hmang ngei ang. Mahse a enkawl lai JCB chu khama a liam mai loh nan phatsana zuanchhuah san mai lovin rinawm takin a theihna zawng zawng a chhuah a, a tha tawp thlengin JCB chhanhim anih theih nan a tang ral thak a, a nunna hial a chan phah ta a ni a, a va han chhuanawm em!

Pa a ni a, a nupui leh a fate pahnih chawm nan JCB a enkawl a, a nupui fanaute a chawmna ngei JCB hmangin midangte tanpui nan zan rei sawi lovin a thawk chhuak a, khualzin riltam leimina tangkhangte tanpuiin hna a thawk a, mindangte a tanpuina lamah a chesual a, a thi a, a nupui fanaute a kalsan ta. Midangte himna atana nun hlantu hi "PASALTHA" tih a phu khawpin ka hria.
Ka ti mah mah em aww!

-Written - Gilbert Renthlei

Post a comment

Powered by Blogger.