Vawiin National Voluntary Blood Donation Day kha ram chhung hmun dangte rualin State chhung hmun hrang hrangah hman a ni.
National Voluntary Blood Donation Day hi Mizoram State AIDS Control Society (MSACS), Association for Voluntary Blood Donation leh blood bank-te huaihawtin hman a ni a, thisen pek rûnpui buatsaih nghal a ni.
Aizawlah chuan Hrangbana College Golden Hall-ah hman a ni a, National Health Mission (NHM) director Dr Lalrozama’n a hmanpui a, thu sawiin, kumin National Voluntary Blood Donation Day thupui, ‘Hlimna hi thisen pek atangin a awm’ tih chu thu dik a ni, a ti a. Thisen pe tur hian invawn thianghlim tlat a ngai a, ruihhlo leh mipat hmeichhiatna hmansual laka fihlim turin thian tha lo kalsan an ngai thin a, tih leh tih loh tur chin ramri fel tak insiam hi himna atan pawh a pawimawh a. Voluntary blood donation-ah Mizoram chu zaa za a nih theih nan tan lak zel a ngai a ni, a ti.
AVBD General Secretary Lalrinkima tarlan danin, sorkar kum hmasa 2017-18 chhung khan Mizoram pumah thisen unit 26,248 pek a ni a, chu’ng zinga unit 21,880, zaa 83.36 chu pek bik nei loa a thlawna pek a ni. Voluntary donation zinga unit 15,601 chu páwl hminga pek a ni a, unit 6,279 chu individual voluntary donation a ni thung.
Sorkar kum kal mekah thla nga chhungin thisen unit 11,461 pek a ni tawh a, chu’ng zinga unit 9,532 chu voluntary donation a ni a; blood donation camp tum 183 neih a ni tawh.
National Voluntary Blood Donation Day hawnna inkhawm zawhah Aizawl Civil Hospital Blood Bank leh Hrangbana College NSS bultumin zirlaite’n thisen an pe nghal a; thisen unit 200 pein, a petute hi mipa 134 leh hmeichhia 66 an ni.
District khawpui dangahte pawh hman a ni a, thisen pek rûnpui an huaihawt nghal bawk a. Lungleiah chuan zirlaite’n thisen unit 87 an pe a; Siaha-ah unit 27; Kolasib-ah Unit 54 an pe a; Serchhip-ah chuan Blood Bank-ah thisen dahkhawm sa a tam rih avangin hun remchangah hman a ni ang. - AIR News Aizawl
Post a Comment