CHHURBURA SIKTUITHIANG LEH CHHURBURA TUICHIK CHAMPHAIAH HAWN A NI

Nimin tlai khan Chhura Hmun Welfare Committee, Bethel Veng Champhaiten cheng nuai khat leh singhnih bawr vel senga an siam, Chhurbura Siktuithiang leh Chhurbura Tuichik chu  Pi Ethel Rothangpuii, Project Director, DRDA chuan ribbon chepchatin a hawng. He hunah hian Dr. Lallawmkima, DIPRO Champhai chu Khualzahawm a ni.

Khuallian Pi Ethel Rothangpuii chuan Chhura Hmun veng mipuite thawhhona tha tak leh sawrkar tibuai tlem thei ang bera Chhurbura Siktuithiang leh Chhurbura Tuichik an siam chu lawmawm a tih thu a sawi a. Mizo mipuiten khawtlang leh sawrkara mawhphurhna  neihte kan hriatfiah angaih thu sawiin, Chhura Hmun Welfare Committee-ten mahni kutkawih hmanga hna an thawk thin chu fakin Zoram mipuiten entawn se a duh thu a sawi a. Faina kawnga tan lak zel a pawimawh thu sawiin, Fai hi Pathian  anna leh hriselna atana pawimawh tak a ni, a ti a. Bawlhhlawh sawngbawl kawngah felfai zawka hmalaka, tawih thei leh theilo thliar hran zel a pawimawh thu a sawi a. Chhura Hmun Welfare Committee-te an kalzelna turah duhsakna a hlan a ni.

Khualzahawm Dr. Lallawmkima pawhin Chhura Hmun Welfare Committee-te hnathawh chu chhuanawm tiin, thil hawn thar takte chu Veng chhung mai bakah Champhai khawpui chhawr theih tur a ni, a ti a. Welfare Committee in veng chhung tihhmasawn, ruihhlo do, infiamna chawinung leh tanpui ngaite tana luanchhuahna an nei thin chu a fak a, khawtlang mipuite chu tawiawm tlat thin turin a chah a. Chhurbura Siktuithiang leh Chhurbura Tuichik hawn takte chu uluk taka enkawl turin a chah nghal bawk a ni.

Hawnna program Chhura Hmun, Champhai Bethel Veng a neih hi Pu Lucas Thangmangliana, Chairman, Chhura Hmun Welfare Committee chuan a kaihruai a. Pu F. Lalhriatpuia, Secretary, Chhura Hmun Welfare Committee-in report pein pawl hmalak tawhna leh hmachhawpte a tarlanga. Pro Pastor T. Sawmliana'n hunserh a hmanga, Pu PC Lalchuangkima, Committee Member, CWC-in lawmthu sawina neiin hun a khar a. Program zawh hnu hian veng chhunga hnathawhte leh hmachhawpte khuallian hian a en nghal a ni.

Chhura Hmun Welfare Committee hi inkaihhruaina mumal tak neiin August Ni 1, 2010 khan din a ni a. Tun dinhmunah Chhungkaw 114, In ding zat 107 leh Mihring 424 an awm mek a ni. Welfare Committee kaltlang hian veng chhung hmasawnna hrang hrangte thawh a ni tawh a, hmachhawp hrang hrang an nei bawk. Ruihhlo do kawngahte, infiamna chawinung kawngah leh tanpui ngaite tanpui kawngah  hma an la  thin a ni. - DIPR