Pu Lalrinliana Sailo hian nimin khan Assembly Speaker Pu Hiphei hnenah a banna lehkha a thehlut a; amah ngeiin ziaka thehlut a nih angin Dan angin a banna hi Spekaer hian a lo pawmsak nghal a ni.
Banna lehkha a thehluh hnuah Pu Lalrinliana Sailo hian amah kawmtu chanchin thar thehdarhtute hnenah, Congress sorkar kal lai mekin sorkar thuvawn atana Amosa 5:24 ‘Rorelna dik chu luipui angin luang se la’ tih an thlan chu a taka kalpui a nih loh thu sawiin, sorkarin thuvawna a hman tak Bible châng chu ama thlan a ni, a ti a. Thuvawn tha tak nei mah se a takin rorelna dik chu luipui angin a luang ta si lo niin a sawi a. Rorelna an kalpui danah a lungawi loh thu leh a ban chhan pawh chu chu a nih thu a sawi.
Pu Lalrinliana Sailo hian MNF-a a luh tur thu sawiin, a luh hun tur erawh chu hruaitute thu a ni ang, a ti a. Inthlanpui chuh tura MNF ticket a chan dawn leh dawn loh pawh hruaitute thu a ni ang, a ti bawk.
Pu Lalrinliana Sailoin nimina banna a thehluhnaah hian MNF MLA 4-te bakah Home Minister atanga bang ta Pu R. Lalzirliana te’n an tawiawm a ni. - AIR News Aizawl
Post a Comment