Khuangleng Helipad thar chu nimin khan Minister Pu Lal Thanzara’n a hawng.
Pu Lal Thanzara chuan Khuangleng khuain Helipad thar a nei chu a lawmpui thu leh ni chhinchhiah tlak, hmasawnna rahbi thar kaina ni pawimawh tak a nih thu a sawi a. Minister chuan kum 2012 August thla atanga Mizorama Helicopter Service a tan tawh chu District hrang hrang leh khaw pawimawh zual bikahte service-tir a nih thu sawiin, duh angin mipui mamawh a phuhruk zawh loh avangin sawrkar laipuiah dil belh leh mek a ni, a ti a. Helicopter service chu hlâwkna ûma kalpui ni lovin mipui rawngbawlna atana kalpui a nih thu leh rîkrum thilah leh dam lo na zual, nun chhan hmanhmawh ngaite tana tangkai tak a ni, a ti a. Khuangleng chu a khaw chheh velte tan lawi-len a remchan avangin Helipad hi siam a ni, a ti.
East Tuipui bialtu MLA Pu T. Sangkunga pawhin a bial chhunga Civil Helipad hmasa ber tur hawn a ni ta leh Pu Lal Thanzara’n a hun hlu tak senga a rawn hawng thei chu lawmawm a tih thu a sawi a. A bial chhunga PMGSY hmanga inkalpawhna kawng tam tak tihhlawhtlin leh sanction a nih theihna leh êng lama intodelhna tura Power Sub Station thar 3 hawn a nih theihna tura Pu Lal Thanzara puihnaah bial aiawhin lawmthu a sawi a ni.
Khuangleng hi Aizawl atangin minute 25 vel thlawk a ni a, damlo tan charter theih a ni ang a, Charter rate hi darkar khatah Cheng 80,000 a ni ang. -AIR News Aizawl
Post a Comment