- Dina, Khawzawl
District Capital chung chang hi Khawzawl hian kan buaipui nasa in kan bengvartu ber pawh a ni bawk a. Hmasawnna tam tak keng tel, sawi hnawm chi hauh loh, theihpalingkawha kan beih ngai tak pawh a ni. He District Capital avang hian inpuhmawhna leh mimal inhuatna pawh a thlen mawlh mawlh a ni ber mai. Chuvangin, hemi chung chang hi chiang zawk a kan hriat hi a tul takzetin ka hria.
A Tobul : Tun hnuah hian mi tam takin PC hun lai atanga lo inirh chho tawh niin an sawi a. Pu Thena khan Khawzawl hi khawpuia chei tlak leh khawpui pawimawh tak la ni tur in a sawi thin chu a ni awm e. Department pawh pawimawh tak tak a dah teuh hman reng a ni.
Hun a lokal zel a, kum 1993 a Congress a lo sawrkar khan ngawi reng in District siam belh tura ruahmanna a lo kal mup mup reng a. Khawzawl pawh hi chu ruahmanna ah chuan tel vein puan theih mai tura a hmawr an bawk tep tawh, Cabinet Minister te signature pek mai tawh tur ah a tam zawk in ngawi renga an signed laiin a hnuhnung lama sign ve tu kan bialtu MLA, Minister ni bawk Pu C.Vulluaia chuan a hriat rual rualin a ding lama signed chungin a kut lehlama phone la in District Capital kan nih tur thu Khawzawl min rawn hrilh nghal a. Kan lawm em em a, khawlaiah ri thei hrang hrang nen kan lawm a nih kha. Chutia kan lawm em em lai chuan Champhai lam an lo awm hle hle thei bik hauh lo mai. A rang a rang in Aizawl an liam thla a, harsatna an zuk siam a, sawrkar tan chuan buai a nih takah chuan file kal mek chu pending a lo ngai ta a ni. A hun hmaa puan chu MLA hi lawm viau pawh nise a pawi zo ta.
Chutiang a lo nih takah chuan Champhai chuan an thiam leh theih chitin reng in an bei ta char char a. Chutih laia Congress a kan Block President chuan, "Champhai in hmanrua hreiha hlang an hman chuan kei nin uipum tiat kan hmang ve thei" tiin CM hmuh phawt a ni a. (CM zuk dawrtute zinga tel, ziak thei awm chhun ka ni tain ka hria). CM hian pending a ngaih rih thu min lo hrilhfiah a. Amaherawh chu, Champhai beih dan kan hmuh in mihring ve tho an nih avangin an hneh mai ang tih hlauhthawnna kan nei a. A tum 2-na atan CM hi kan zuk hmu leh ta a. CM chuan kan President chu,"Laldinpui, in(Khawzawl) mipui tam takte hian District Capital hi in duh lo, in khua ni mahse nang aiin an rilru ka lo hre zawk," a lo ti a. Kan President hi a huai ve khawp mai, kawk chungin, "Pu Hawl, mipui hian kan duh, kan duh vek, ka hre zawk," a ti let ve salh2 a ni. CM chuan,"Chutiang taka in duh takzet a nih chuan nang ni chu Khawzawl a Party pakhat hruaitu ve mai in ni a, khawtlang ai in awh zo lova, han haw ula khawtlang ai awh zo ngei turin han inkokhawm ula, khawtlang ai awh zo ngei in min rawn hmu leh dawn nia," min lo ti ta a.
Tichuan, hawng chho nghal in VC te min ko khawm turin kan hrilh nghal a. VC te chuan kohna an han siam a, chutih lai chuan meeting kal turte chu MNF Block hruaitu pum 4 vel(an hmingte em chu mimal in tihchhiat theih thil a nih avangin sawi a rem lo ah ngai ila) chuan "CM tihdanglam theih a ni lo/ CM thu a ni lo/ Central thu a ni" ti tein an lo dang duh a. Inkohkhwm chu kan hlawhchham a ni der mai. Mahse ni thei ngang lova hria in Joint YMA in min ko khawm thei ang tiin min kokhawm turin kan ngen leh a, tutute emaw avang bawk chuan kan hlawhchham leh ta a ni. Chutianga kan hlawhchham tak thak si ah chuan Block Congress te chuan VC then khat leh YMA lam pawh phungbwm a sawmin Politics ah chuan a nghawng thei ber tur anga ngai in seal te kan khawn kual a, MNF, opposition party ber bawk chuan harsatna siam in min lo pe thei lo leh ta a. Kan khaw thenawm ten an thiam leh theihna zawng zawng hmanga an beih laiin hma kan la ve hlei thei ta der lo mai. CM in a thurawn ang pawha kan tih theih tak si lovah chuan, "In mentality in a la phak lo a ni" min ti ta a ni.
Chutiang a nih lai chuan Champhai chu an puang fel ta der mai ani. Kan lung a awi lova, kan ngui nghuai a ni ber mai. CM thu a ni lo titute khan thalai tam tak fuihpawrh zuiin hma an hruai a Office kan ti chhe ta mial mial a nih kha. Office tihchhiat a nih takah chuan kalna tur nei ta hek lo, Aizawl ah an sawn thla ta hlawm a. Rawn dah chho leh tura hma la zuiin office chhia repair na tur min lo pe a, repaired zuiin an rawn dah chho leh ta ani.
District Capital thar kalkawng : Chutiang a kan chan takah chuan kan lungngaih manganna hre ranin 1998 MLA Election dawnah chuan MNF hruaitu rualte chuan (a tawi zawngin),"Lungngai suh u, kan sawrkar veleh District Capital kan pe/function sak nghal ang che u" min ti ta mawlh mawlh a. Hnehna mipui in kan pe a ni.
MNF chu term hnih(kum 10) an sawrkar a, engmah tih ala awm lova. KNOGC ten nasa taka nawrin kum 10 an sawrkar na tawp dawn tepah District Capital ah chuan Un- gazzet in notification chu an chhuah ta hram a ni.
Hetiang hian vawiin ni kan thleng ta a ni.
Hemi chung chang hi kan sawi fova, kan indem kual a, thu dik hi tarlan tul hle in ka hria a ni. Thu hlui a ni a, sawi sawi a tul lo kan tih rualin politics ah chuan thuhlui a lo awm thei lo va. Thudik kan hriat hi a tul takzet zawk a ni.
A bak chu Party tin ten tuna Kan thu inchuh mek, District Capital function hi a ni ta a ni.
Post a Comment