Zawngtah ei mi ka ni lova, mahse, a ei mite chuan ha hipin Zawngtah tuizia an sawi ka hre thin. Kan thianpa Peter Lallianzuala (Fam) chuan vawi khat chu Thlan kan laihnaah Zawngtah a duhzia fiamthu ti takin a sawi a, “Krismas thlen hun nangnin in thla hlel a, kei chuan Krismas hun aiin Zawngtah mu pum hun ka nghakhlel daih zawk” a ti! Pa pakhat chuan, “Thingpui hmehah Cake intih aiin Zawngtah mu hmeh ka duh zawk,” tih a sawi ka hre bawk! A duh tan chuan a tui hle ni tur a ni.
Zawngtah hi Mizote chauhvin kan lo ei bik lova. S.E Asia ram Thailand leh Malaysia ramah pawh an lo ei nasain, an Shopping Mall ah te pawh a rah hun lai ni lovin, an dah thata an zawrh hmuh leh lei tur a awm thin a ni. Chutiangin Europe rama Asian Market ah zawrh an ching bawk.
Tunlai hi Zawngtah rah hun a lo ni leh ta. Zawngtah hmanga SUMDAWNNA lian tham ti duh tan, din chhuah theihna tur kawng a awmin alang. Mizoram leilungah Zawngtah chu an tha duh tlang pui a, a zuar thinte pawhin an chuktuah huan vela an chin rah atangin an zuar tlangpui niin alang.
Mizote hi hnam tlemte kan ni a, kan tlem tham avangin thil tam ti hma leh hre hma zet mai kan lo ni a; chutih rualin Aizawl pa leh Lunglei pa “tam” tih a lo inang lo leh zel pek a nih chu! A Mizo nawl pui hrim hrimin tam tham kan tih pawh eng tih thu loh a nih teh lul nen.
Zawngtah chu eizawnna ngel ngheta hmang duh tan, sorkar tanpuina kher beisei lovin ram neite chuan Zawngtah kung 10,000 chuang hmun siam tur a ni a, chumi rah te chu Foreign market tinzawnin leh India ram Metropolitan City a Super Market-Shopping Mall targetin zawrh chhuah tin zawn tur a ni. Zawngtah hi vawn that a nih chuan a dah that rei theihin, rei tak awm mahse, a tuina (taste) a hloh lem lo, an tih avangin Zawngtah mu pack that emaw, a um (pickle)na khawl tenau dinin, ram dang thlenga thawn chhuah theih dan a awm ngei ang.
Kan mihausa te hian Motor chhuak thar apiang lei tum emaw, Resort-Swimming Pool, etc siam ringawt zawnga intih hmuh lovin, sumdawnna ngelnghet ang chi, Industry tenau emaw, Entrepreneur lam awm a, Zoram hmasawnna leh din chhuahte kan ngaihtuah a hun tawh a ni.
Mihausa 4/5 intel khawmten Rs nuai 100 tel investment tiin, Shopping Mall ang chi te pawh din chhohna chang hriat a, than harh a tul tawh a ni. Aizawla “Bazaar India” or “Vishal Mega-Mart” inti emaw ni ang te kha, na chang hria sela Mizoram mihausa te tih ve theih vek thil a ni. A ngaihna hria mi faten hma an lakin kan thik a, tlai khawhnuah kan sawisel leh chiam mai thin a! Mizote zingah Industrialist emaw, Entrepreneur ang chi te hi kan awm chhoh a hun ve ta hle.
Politics chu ram leh hnam siamna hmanraw tha tak a ni a, mahse, politics khel a, Politician ni kherlo pawhin “Mizo Hnam leh Ram” hi a hmangaih theih a ni. Entirnan, Mihausa 4/5 intel khawm khan joint venture siamin Shopping Mall te han din rup sela, chumi atana thawktu mi 40/50 a lo ngai anga, chungah chuan thawktu/ Staff atan Mizo ngei lain, unemployment nasa takin a solve theih phah anga, eizawnna mumal neilo mi 40/50 in hna thawh tur an lo neih pawh chu thil hlu tak leh tangkai tak a ni dawn a ni.
Ram dang, hnam dang zingah pawh hetianga sumdawnnaa bul tan, hlawhtling chho ta hi tam tak awmin, millionaire/ billionaire nih phah pawh an awm sup asin. Enge i ngaihve dan, Aw ka Unau !
~ CT Lalrinawma
Post a Comment