MNF PARTY ELECTION MANIFESTO 2018 - SAWHTHING LEH THLAI DANG HRALH DAN - TIMES OF MIZORAM

Breaking

Home Top Ad

Post Top Ad

MNF PARTY ELECTION MANIFESTO 2018 - SAWHTHING LEH THLAI DANG HRALH DAN

SAWHTHING LEH THLAI DANG HRALH DAN TUR RUAHMANNA THAR CHU


SAWHTHING LEH THLAI DANG HRALH DAN1. Sawhthing leh kan thlai thar dang Hmarcha,Chhawhchhi, Iskut , Hmunphiah leh a dangte hi kum tin a hralhna rate a danglam fova, a chang phei chuan Chhawhchhi leh Hmarcha chu rate that nghakin hun reife an dah tha ( stock) fo mai. Kum khat thlai hian thatna tak a nei a, Mizo mizia nen a inmil em em a, thei kumhlun Serthlum, Kuhva leh a dangte hi chu kum tam fe hnuah a thar chauh si a, chuvangin Thar rang thlai hi kan bansan mai hlei thei lo a ni. Tin, chhungkaw tam tak tan chuan kan dinhmun phak tawk a ni rih bawk a.



2. Engtinnge kan thlai thar chi hrang hrang hi man manhla zawka kan hralh theih ang tih hi ngaihtuah ngun a ngai khawp mai. Kan sawrkhar te hian nasa takin thlai thar hralhna hi an vei tawk lo nia ngaihna pawh a awm fo bawk. India ram hmun hrang hrang leh Central Sawrkar kalphung pawh lo thlir dawn ila.

3. Central sawrkar hian Fair Price Shop-a sem chhuah tur chi hrang hrang, buh, wheat, Coconut, Tel, Dailuah, etc. chingtuten an thlai thar man a tlak hniam thulha venna Minimum Support Price Scheme an nei thin a, chu bakah State hrang hrangten kuthnathawktute thlai thar chi hrang hrang, kuhva, sawhthing, vaimim, bekang, hmunphiah leh a dangte pawh a hralhna man a tlak hniam lutuk venna leh tanpui nan Market Intervention Scheme a awm bawk a. Heng scheme-te hi i lo bih zui lawk ang. Central Sawrkar-a Agriculture Ministry hnuaiah Commission for Agriculture Cost and Price a awm a, chu Commission chuan ngun taka thil hrang hrang, thlai thar nana senso ngai zawng zawngte, ram chhung leh ram pawna thlai thar tam dan leh a rate leh thil dang tam tak hre chungin Thlai thlan bik, a chunga kan tarlan takte rate tur an bituk ta a. He Rate hi thlai chin tak tak hma deuhin an ti chhuak thin. Minimum Support Price awmzia chu thlai thar chhuah nana senso zawng zawng bakah 150%-a sang hi hman mek a ni a. Hriatthiam awl zawk nan entirna lo pe ila :- Buhfai Quintal khat thar chhuah nan Rs. 2000/- senso ngai ta se, Minimum Support Price chu Rs. 3000/- per Quintal a ni dawn tihna a ni ang. Hei hi a “Rate hre saa thlai chin” awmzia pakhat a ni phawt a. A dang leh “Market Intervention Scheme ( MIS)”- State thenkhatten an hman, kan ramah pawh kan hman tawh thin hi lo luhchilh leh lawk ila. Thlai chin hmaa Rate bituk lawk loh, thlai thar chhuah tawh si, a hralhna man nasa taka a lo tlakhniam a, kuthnathawktuten an tuar nasat lutuk chhawk nan he Scheme hi hman a ni. Sawhthing leh Iskut man tlawm lutuk phuhruk nan kan ramah pawh hman tawh thin a ni a; heta sum senso tulte chu Central leh State sawrkarin 75:25-in an intumsem thin a ni.

SAWHTHING LEH THLAI DANG HRALH DAN4. Minimum Support Price (MSP) leh Market Intervention Scheme (MIS) chung chang :

MNF Party chuan Kuthnathawktute harsatna sukiang turin ruahmanna tam tak a duang chhuak tawh a, SEDP bu hi ngun taka kan chhiar chuan Thlai chin dan, thlai thar sawngbawl leh a hralhna tur dap chhuah dan kan hmu a, chumi zinga thenkhat Sawhhthing/Aieng/ Hmarcha/Hmunphiah, etc lo thlurbing ila.Thlai chin tur leh a chinna hmun tur kan thlang lawk ang a, chung thlai thlan bikte thar chhuah nana senso tur zat tlangpui – a hmun vah, mangkhawh leh chang kham, thlai chi man, a enkawlzuina, thalai sengkhawm leh a hralhna hmun phurh thlenna leh senso ngai dangte chhut chhuah a ni ang a, MSP leh MIS ruangam hmang tangkaiin Thlaithar hralhna rate kan bituk sa vek dawn a, tute sawi dan anga Rs. 50/- in sawhthing kan lei dawn tih ngawt hi chu a kawnghmang lova, Entirnan :- Sawhthing Quintal khat thar chhuahna senso Rs. 1500/- ni ta se, Central sawrkarin MSP rate hman lai chu 150% a ni a, chu aia sang MNF sawrkar thar chuan 200% rate kan bituk ang a, Sawhthing Quintal khat hralhna man Rs. 3000/- a ni dawn tihna a nih chu. Chu Rate bituk aia a hniam chuan, a hniamna zat zel chu Sawrkarin a phuhruk ang. He Rate bituk sa aia market rate a that chuan Sawrkar inrawlh a ngai lo tihna a ni mai ang. Chu chang ni lovin, thlai thar leitu turte nen inremna kan siam lawk bawk ang . Hei hi Contract Farming lam hawi a ni a. A thatna chu market rate a tlak hniam pawhin inremna rate kha a ding tlat dawn a. Inremna Rate aiin Market rate lo sang ta se, kuthnathawktu khan a rate sang zar a zo ve thei lo thung a.

5. Hun engemaw chen atang khan Grape/ Sapthei/ Red oil Palm/ Hmunphiah leh a dangte sawrkharin a lo chintir tawh thin a, thlai chu a lo thar ta cheng a, a hralhna lamah kuthnathawktute nasa takin an buai ta thin hi an lainatawm em em a. Entirna thenkhat chu Grape, Sapthei, Red Oil Palm-te pawh hi an buaipui ang huin an hlawkpui lo deuh a ni awm e. Chuvangin Pathian leh mipui zara MNF kan sawrkar chuan heng harsatna hrang hrang sukiang tur hian theihtawp kan chhuah dawn a, Red Oil Palm leh a dangte pawh Factory phurh thlen man ( Transport subsidy ) kan pe ang. Grape chingtute pawh an harsatna sukiang turin sawrkar chu a inhuam thui hle dawn tih kan puang nghal bawk e.

6. Terminal Market te, Regulated Market leh Contract Farming-te nasa takin kan buaipui ang a, thlai chin tur bik leh a chinna hmun leh a hralhna hmunte uluk leh fimkhur takin kan ruahman ang a, hun reilote chhunga Zoram hmel a tha zawnga danglam turin hma kan la dawn a ni. Mi thenkhatten Sawhthing leh thlai dang man tlakhniamna chhan chu Congress leh MNF Sawrkarten thlai hralhna an khuahkhirh vang niin an sawi piap piap mai a. Hei hi sawifiah a tha awm e. Kum 1989 chho velah khan Iskut a lo thar tam ta hle mai a, Mizoram pawn lam atanga lei thintute Iskut lei lo turin an tangrual a, Thlai thartute an mangang khawp mai a.Chutiang bawkin Sawhthing lei thintuten an nawm an makin min bawl ta mai a ni. Thlai thartuten sawrkhar an nawrna avangin Price Support leh Market Intervention Scheme-te hman a ni ta bawk a. Chubakah kan rama thlai tharte pawn lam atanga thlai lo lutin a rate a tihhniam lutuk tur venna dan ni bawkin Sawrkarin “The Mizoram Agriculture Products ( Prohibition of Movement) Order siamin chu chu tun thleng pawh hian a tul hun apianga hman theih a la ni reng a. He Order hi kuthnathawktute hmakhua ngaih vanga siam a ni zawk a, Sawhthing leh thlai dang dang hralhna man hniamna chhan a ni lo tih i hre thar leh zawk ang u.

7. Kan ti ve thei: 
Ram changkang tawhten Buhbal/Thlai/Sa leh Sangha thar chhuaktute an duat hle thin a, Farm Subsidy tam tak an pek thin avangin mipuiten ei/in tur man sang lutuk lovin an lei thei thin. Keini pawh kuthnathawktuten dinhmun tha an chan ve theih nan an thil thar chhuah chi hrang hrang - Ei tur chi leh a dangte manhla taka an hralh theih nan Minimum Support Price te, Market Intervention Scheme te, Rebate te, Free Transport leh Input Subsidy chi hrang hrang hmangin tan kan la ang a. Nakum Mizoram Budget tur hi Cheng Vaibelchhe Sing chuang fe a ni tawh dawn a, Plan leh Non Plan tih te, Earmarked Sector pawhpen theih loh tihte a awm tawh bawk hek lo. State sawrkar thuneihna a sang tial tial a, Kuthnathawktute chanvo/ hamthatna uar zel hi kan Budgetah hian a leng em em a, a chunga kan sawi takte hi “KAN TI VE THEI” tih i ring ngam ang u.

Issued by MNF Publicity Monitoring Cell

Benjamin Lalngaihawma Ralte

Post Bottom Ad