'Kan tling dawn' 'Kan Sorkar dawn' kan ti pung pung vek mai si a, mahni vawn Party zawn atangin Party tarmit vuahin Neutral rilru thlir thiam pha mang miah lovin hisap kan siam a, kan thla a muan lai tak a ni hlawm. LO TLA TA SE tih lam ve thunga Party lian deuhte awm dan tur ka mimal chhûtna ka tarlang vethung teh ang.



CONGRESS(INC) -
Mizoram election result 2018An ni Party hi Ruling an ni bawk a, thlir hmasa ber teh ang. Kumin inthlanah hian Sorkarna siam lovin tla ta se, hotupa ber Pu Hawla hian a thutiam nemnghetin Politics a chawlhsan zui nghal a rinawm a, AICC lamah MPCC President atanga banna a thehluh nghal ka ring. Hruaitu ber turah buai hatna a awm ang a, Pu Zodintluanga, Pu Lalthanzara, Pu CL.Ruala etc atangin inbei tawk tak tak President nihna inchuh thawm a awm maithei. MLA thlan tlin awmchhunte atangin beisei nei midang an awm ve thei bawk ang.



Heng boruak avanga hruaitu lawk Party chhuahsan an awm zung thei bawk. Kan rin aia an boruak a chhia a nih phei chuan thochhuak leh turin hun an mamawh viau maithei bawk. National Party an nih angin 2019 Inthlanpuiah hian Centralah Congress(UPA) an Sorkar hlauh erawh chuan Central zarah chuti takin an tla chhe lo thei bawk. BJP an Sorkar nawn leh a nih phei chuan MPCC hi an tho chhuak har tawh viau maithei.

MNF -
An ni hi kum 10 an Opposition tawh a, kum 5 dang Opposition nih leh a Party nung taka hruai chu thil hupphurhawm tak a ni tawh ang. An hruaitu lawk te, a bikin Pu Zorama, Pu Tawnluia te hi an rei tawh tih thawm a ri fo a, he boruak hi thalai zawk leh mithar lawmluhin engngemaw chen a hliah khuh. Mimal tak erawh chuan Pu Zorama te ho hi chu kan ning deuh fur tawh hlawm. Han tla chiah se an ni pahnih hian Politics an chawlhsan a rinawm tawh a, Hruaitu kawm inchuhna in rualkhat pet pet atangin a awm ve nghal ang. Dr.R.Lalthangliana, Pu Vanlalzawma, Pu K.Sangthuama te hi a khan pawl an ni tawh maithei. Mahse an thupui ber pakhat Rambuai Politics leh an buai fo thinna Vangvat kai leh kailo tih vel vang hian inhruipawhna a nasa hle ang.

MLA 10 pawh nei pha lova an tla anih ngat chuan an Party hi in awinung leh turin hun a duh viauin a rinawm a, tuna mi lawk tak tak an lawm luhte pawh hian an beisei loh taka zuziin Politics an vui liam mai a rinawm. Tho chhuak leh tur chuan an MLA neih ang chhunte an pawimawh hle tawh ang. Mihring thata tha Pu Vanlalzawma, Er Lalrinawma te ang hi chu Bial khat enkawl ah chuan an tha maithei, Party pumpui hruai tak tak tur leh khaiding turin michak ti a sawi theih an la ni lo. Kum 15 Opposition nih hnu a Ruling nih leh inbeisei chu a har viau tawh ang.

ZPM -
Party pahnih leh pawl hrang hrang inzawmkhawm an ni a, an tla a nih vaih chuan ZPM ang hian kal zui zel a harsa maithei. ZPM tuipuitu leh phuarkhawmtu hruaitu lawk a tla ah an tang a nih phei chuan a tling chhun MLA te chu an pawl mal te te a an kal leh a ngai maithei. Hemi hrereng hian Party khata inchhun fin duh lo pawh hi an ni maithei. MPC, ZNP leh Independent angin an din hmel a, an tla a nih a, ZPM thiah a nih pawhin a tling chhunte chu khitiang khian an kal hrang leh mai ang chu.



He pawl hi TLINAH an in nghat lian lehzual a, an tla a nih chuan ZNP leh MPC Party hi chu an tiltiak tawhin a rinawm. Pu Duhawma hian Politics a chawlhsan ve tawh a rinawm bawk a, ZNP chu a ral zui ve maiin a rinawm. MPC pawh hian Politician lo lutuk mi tha tak si President an neih hi tuarin awm a bar an awm zui tawhin a rin awm loh. ZEM te hian 2023 thlenga Active taka kal turin hruaitu naupang zawk an tlachham a, an chawl thup tawh ang. ZPM pawl hi CCF tih ang deuh khan tlak ruala tawp zui mai tur niin a ngaih theih. 2013 a ZNP boruak ang maia Neutral zawng zawngin an duh ta emaw tih tur leh Social Media zawng zawngah an sang ber chunga an Arte lukawn a nih vaih chuan mipui hian kan bawl phuan a tih theih tawh ang.

BJP -
Mizoramah hian Congress tih loh chu National Party lian an awm thei lo tluk a ni. Central a an vung vanglai pawh hian heti hi an dinhmun a ni. 'An Sorkar dawn' ti a sawi chi a ni lova, Chakma tamna ah hian MLA 2 te hi an nei pha ve angem? tih chauh hi a ni. An pawl len dan tawk ngaihtuah hian 2 an nei pha a nih chuan an lawm khawp ang. Central a an Sorkar avanga Mizorama an thaw lian ve vak thin hian Mizo thenga thawngah hian a thawk lem lo a, MLA an nri lo a nih phei chuan Central hian tuamhlawm zel tlakah an hmu lo hial maithei.



Preident a lar hle a, mipui hian an hruaitu lawk midang hriat kan nei teh chiam lo. Mizorama BJP Sorkar tur chuan Central ah hian kum 20 vel tal BJP hi an Sorkar a ngaih a rinawm. Chakma Voters ah an in nghat thui ber. MLA pahnih pawh lo nei se, Mizo mipuiah MBJP hi inchhuang vak thei an ni lo anga, MLA 2 nei chungin Chakma MLA an nih chuan Mizo te hian eng teh chiamah kan ngaih loh hmel. Central a an Sorkar chhung erawh chuan therhlo te te beisei erawh an awm ve reng a rinawm.

"Lo tla ta se" tih hmang hian in ngaihdan han sawi ve teh ule.

18th October

Post a Comment

Powered by Blogger.