LALRINLIANA SAILO CHUAN MNF PARTY A ZAWM FEL TA - TIMES OF MIZORAM

Breaking

Home Top Ad

Post Top Ad

LALRINLIANA SAILO CHUAN MNF PARTY A ZAWM FEL TA

Nilainia MLA atanga a ban hnuah vawiin khan MPCC Gen Secy hlui Pu Lalrinliana Sailo chuan MNF Party a zawm a.

Congress Party in an hnawhchhuah, an party Sr Vice President Pu R Lalzirliana MLA erawh dan in a la dan avangin MNF Party hi a la zawm ve lova, amaherawhchu MNF Party ah inhmang tan tawhin, vawiin inkhawmah pawh a tel a ni. 

Pu Lalrinliana chuan thusawiin, inthlan puan a nih hunah Congress chu pa hmei thingkhawn chim angin an chim dawn a ti a, an dawn tur ang ang inthlan puan hmaa dawn a nih hunah, Congress chhuahsan tum mi tam tak an awm a ti.

LALRINLIANA SAILO CHUAN MNF PARTY A ZAWM



NLUP chungchang sawiin, CLP Meeting an neihah NLUP pawisa ziaka dah Cheng Vaibelchhe 234, Nuai 80 chuang dah a ni a, a dawngtute mi Sing 4 Sang 5 Za Sawmthum Pakua awmin, chhungkaw pakhatah Sing 2 theuh belhkhawm chu Vbc 90, Nuai 27 leh Sing 8 a nih thu a sawi a, an buaipuina ah Vbc 90 vel dah ni ta se, Vbl 143 chuang la bang chu khawiah nge an dah tih zawhna a zawh thu leh an chhan theih loh thu a sawi a ni. Pu Lalrinliana chuan MNF-in an sorkar huna an tih tur an ziahna Socio Economic Development Programme (SEDP)-ah hnam damna a awm niin a sawi bawk a. Rorelna dik leh tha kenkawh an tumna kawngah te, thuneihna semzai kawngah te, Corruption umbo a nih theihna tura hmalak an tum dante chu rintlak a tih thu a sawi a. MNF chuan mipui leh ram tana tha tura an hriat chu an ti mai thin a ni, a ti bawk. 

Pu R.Lalzirliana chuan mihring chakna leh thiltihtheihna, chapona atang chuan ram leh hnam a kaikhawm theih tak tak lo a ni a ti a. Ram hruaitute'n Pathian leh Kohhran zahna awm lovin Mizoram-ah ro an rel mek a ni a ti a. Pu R.Lalzirliana chuan Zu an zawrh dawna Kohhran an rawn khan zu zawrh engtikah mah an remti thei ngai lovang' tiin an chhang a. Hetianga Kohhranin rem an ti lo chung hi zawrh ṭha a ti lo a, an zawrh luih tak thoah khan Kohhran ngaihdan an hriat sa tawh avangin 'Kohhran rawn leh kha ṭul a tih loh thu a sawi, niin a sawi.


Excise Minister hlui chuan,MNF-in zu zawrh an ti tawp ang, an tih chu a lungdum zawng tak a ni, a ti a, MLPC Act study team an din khan Committee term chhung kha tih reia inthlan hnan tir an tum a, amaherawhchu inthlan hmaa report peih tura a tih angin an peih a, Zu zawrh avang hian kum tin crore 70 vel sorkarin a lakluh laiin zu in avanga damdawi man leh inenkawl atan cheng vbc 240 vel an hmang tih a lo lang ta a ni a ti a. Zu zawrh avang hian mipuiin sum an chan nasa hle zawk a lo ni a. Zu zawrh avanga Drugs bo tura ngaih anih laiin nasa takin a pung zawk a, ṭhalai leh zirlaiin zu an inthar nasa em em a. Zu in avanga nun inthlahdah an pung a, zu zawrh avangin HIV/AIDS a pung nasa hle tih Health lama Doctor te'n an hrilh bawk a ni," a ti.

Study Team-te report avang hian zu khap burna dan hman leh an rawt ni a sawiin, Pu Lalzirliana chuan an zawrh dawn pawhin a ṭha lo a nih chuan an khap leh mai ang tiin mipui hnenah an sawi tho tawh avangin khap leh turin zahna tur a awm lo tiin a tang a, mahse, zu zawrh chu an chhunzawm ta zel tho a ni a ti.

He huna thusawitu dang MNF President Pu Zoramthanga chuan Congress Party chu an hotu lian tam takte nen tihdam theih an nih tak loh avangin ICU-ah an zawn lut ta a. ICU-a luhpui ve duh lo chuan an chhuahsan ta chum chum mai a, Zoram mipuiin Congress sorkar chu a bye bye liam mek ta a ni a ti. - AIR Aizaw

Post Bottom Ad