PALAK BIALA CONGRESS CANDIDATE PUAN CHUNGCHANGAH MADC CONGRESS CHHUNGKUA A NGHING
MADC Mizoram

Hiphei aia K Riachho duhtute an thu khawm, MPCC-in AICC candidate list ennawn a tum loh chuan party a keh darh thei mai dawn niin an sawi

MIZORAM Pradesh Congress Committee (MPCC)-in Mizoram assembly bial pali-a official candidate tur a la puan lohte All India Congress Committee (AICC)-in nizan (October 24)-a a tihchian tak hnuah vawiin (October 25) khan Mara Autonomous District Council-a Congress member paruk, Palak biala K Riachho ding tura duhtute chu an thu khawm nghal a.

TFD thu dawn dan chuan, MDC parukte hian AICC-in ding tura a ruat tak Hiphei aiin IAS pension K Riachho chu Palak biala ding turin an duh zawk thu leh AICC thutlukna chu MPCC hotute’n ennawn an tum thu naktuk (October 26)-a Aizawla Congress Bhavan-a political session-ah an sawi chian loh chuan an dinhmun tur an tichiang ve thung dawn niin an sawi.



Hetih lai hian Hiphei chu TFD-in a bia a, ani chuan MDC parukte hian vawiin chhuna Congress Legislature Party meeting-ah Aizawl leh Delhi-a Congress hotute thutlukna chu an pawm thu an sawi leh niin thu a dawng niin a sawi ve thung.

Heng MDC-te zinga mite’n TFD an hrilh dan chuan, MPCC-in Palak biala Congress candidate tur AICC-in a puan hi ennawn a tum loh chuan party atanga hnawhchhuah emaw, party dang zawm mai an hnial lo va.

“Congress party keh darh chu kan duh bik lo va, mahse, keini aia thu zawk te’n a keh darh an pawi ti lo a nih chuan keini tan tih theih a awm lo,” tiin pakhat chuan a sawi.

TFD lo tarlan tawh angin, Palak bial huamchhunga Congress MDC 11 zinga parukte’n K Riachho chu Palak biala ding turin an duh a, pathumin Hiphei an duh a, a dang pahnih chuan midang ve ve an duh thung a. An candidate set duh dan hi MPCC president hnenah pawh October 12 khan ziakin an thlen a ni.

Hetih lai hian, October 24 zanah AICC chuan Palak bialah hian Hiphei ding tura ruat a nih thu leh Siaha bialah S Hiato, Tuichawng bialah Amit Kumar Chakma leh West Tuipui bialah Nihar Kanti Chakma te ding tura ruat an nih thu a puang a.

Hei hian Palak biala Congress chhungkuaah boruak a siam nghal a, Hiphei aia K Riachho ding tura duhtute chu vawiin khan an thu khawm ta nghal a ni.



MADC inthlan hnuhnung ber, 2017 May thla khan Congress-in seat 25-ah 17 a la a, MNF leh MDF tangrualin pasarih an la a. Mahse, a hnuah MDF chu BJP-ah an inchhung lut ta thung a nih kha.

Palak biala K Riachho ding tura duhtute hian an duh anga thil a kal loh chuan Congress keh darh mai thei chungchang an sawi ang hian party chhuahsan ta se chu MADC-ah Congress ni lo MDC 14 an awm laiin Congress MDC 11 an awm dawn ta tihna a ni.

https://www.frontierdespatch.in/

Post a Comment

Powered by Blogger.