October Ni 23, 2018 atanga neih tan     Mizoram Secondary School Games vawi 36-na chu vawiin chawhnu khan Chhangphut Field, Champhaiah khar a ni. Kharna programme-ah hian Pu K.Laldingliana, Director, School Education & Chairman, Mizoram School Games Committee chu Khuallian a ni a, Mizoram Secondary School Games vawi 36-na Flag zar pharh chu zawi muanga pawt thlain Games hi a khar a ni.


MIZORAM SECONDARY SCHOOL GAMES

Khuallian Pu K.Laldingliana chuan Mizoram Secondary School Games a tum khatna atana Aizawl pawna nghah chu thil huphurhawm tak ni mahse tluang tak leh hlawhtling taka zawh ani thei chu lawmawm a tih thu a sawi a. Zirna leh infiamna lamah theihtawpa tan lak mek a nih thu tarlangin, Higher Secondary School Games leh a dangte pawh a tahtawla neih a nih zel dawn thu a sawi a. Zirna  huam zau leh chhawrnahawm siam kawngah tanlak ani a, chumi tur chuan Physical education lamah hmalak zel a ni, a ti a. School Games buatsaih chuan naupang leh zirtirtute, hmun hrang hranga awmte inkarah inpawhna, inkawmngeihna  leh thawhhona tha a siam thin a ni, a ti bawk.

School Education Director chuan thalai tam tak ruihhlo leh a kaihhnawih laka  ral mekte chhanchhuak tur chuan thalai hrisel, lehkhathiam, thuawih leh mahni inthunun thei chherchhuah a pawimawh hle a ni, a ti a. Lehkhathiam tur chuan rilru leh taksa a hrisel that angai a, chumi hrereng chuan infiamna leh Physical Education lamah tha thawh a ni a, infiammi zirlaite chungah hmachhawp leh beiseina lian  tak neih a ni, a ti a. Mizo thalaite infiamna huangah khawvel hriat hlawh khawpin kan invawrh tawh thu leh Youth Olympic neih zawh takah Gold Medal hial dawng an awm tawh thu a sawi a. Zirlai naupang kalkhawmte chu Zirna ngaipawimawha taksa hrisel siam ngaipawimawh tel turin a chah nghal a ni.

Kharna programme hi Pu C.Lalbiakzauva, District Education Officer, Champhai chuan kaihruaiin kharna huna kalkhawmte lawmna thu a sawi a. Pu Vanlalsawma, Physical Education Officer & Secretary, Organising Committee-in report tlangpui a pe a. Mizoram Secondary School Games neih zawh taka tithate hnenah khuallianin lawmman trophy a sem a. Zai leh lam benglut tak takte ngaihthlaka thlirho a ni a. Pu C.Hualrikhuma, Deputy DPC, RMSA Champhaiin lawmthu sawina neiih  hun  a khar a ni.

Mizoram Higher Secondary School Games, 2018 vawiina hmawr bawk takah hian a pumpuiah Gold 12, Silver 6 leh Bronze 7 dawngtu Lunglei District an titha ber a, Champhai District ( G-10, S-8, B-7) chu pahnihna niin Aizawl District ( G-8, S-6,B-8) chu pathumna an ni a. Athletics (Boys) ah Gold 4 leh Bronze 1 dawngtu Aizawl District chu an titha ber a, Athletics (Girls) ah Lunglei District chu titha berin Gold 3 leh Siver 1  an dawng a. Lalmuansanga (G-3), Aizawl District chu Best Athlete (Boys) niin, Elisian Meidaii (G-3,S-1) Lunglei District chu Best Athelte (Girls) a ni.

Boxing (Boys)-ah Lunglei District (G-2, S-1, B-2) chu an champion a, Champhai District (G-2,S-1,B-1) chuan an dawt a. Football (Boys) ah a thlengtu Champhai District Champion-in Final-ah Kolasib District chu 1-0 an hneh a ni.

Judo (Boys)-ah Lunglei District (G-2,S-2,B-1) an champion a, Champhai (G-2, B-2) in an dawt a, Judo (Girls) inelna hunagah Lunglei District (G-4) thiam berin Champhai (G-1,S-2,B-2) pahnihna an ni a. Heng bakah hian October Ni 9-12, 2018 chhunga Thenzawla neihah Serchhip District chu Hockey-ah an champion a, Volleyball (Girls) ah Champhai an champion bawk a ni. Mizoram Secondary School Games, 2018 Medal dawn dan  kimchang chu a hnuaia tarlan ang hi a ni.

Sl.No
Name of District
Gold
Silver
Bronze
Total
1
LUNGLEI
12
6
7
25
2
CHAMPHAI
10
8
7
25
3
AIZAWL
8
6
8
22
4
SERCHHIP
2
5
7
14
5
KALASIB
1
6
6
13
6
MAMIT
1
3
7
11
7
SIAHA
0
0
4
4
8
LAWNGTLAI
0
0
3
3

TOTAL
34
34
49
117
Kumin School Games Champhai khawpuia nghahah hian Zirlai infiammi 359 leh anmahni buaipuitu Zirtirtu 41 an vaiin mi 400 an fuan khawm a, Thenzawla neih tak nen belh khawmin kumina tel zawng zawng zat chu Zirlai infiammi 529 leh Zirtirtu 57 an vaiin mi 586 an ni. - DIPR

Post a comment

Powered by Blogger.