POLITICIAN TE BIHCHIANNA 24-NA by - V. Lalnunthara
LALRUATKIMA CHANCHIN: Aizawl West II Bialtu MLA, Pu Lalruatkima hi July ni 30, kum 1972 khan Mamit ah a lo piang a, a pa chu Upa Kapthanthuama (L) a ni. Thiamna lamah B.A (Honours) a ni a, a nupui Pi PB Biakthansangi (Pitei) D/o Pu PB Rosanga (Ex-Minister) nen Kanan Presbyterian Kohhran Biak In ah Inneiin, fanu hlir 5 an nei a, a nu ho in Kanan Veng ah chhungkua in hlim takin an cheng a ni.
Amah hi vantlang rawngbawlna lam ah a tui hle a, infiamna lam ti thei tak a ni bawk a ni. Football lar vanglai khan PWD S/C ah Khela in 1991-1998 chhung alo tel tawh thina,Mizoram Junior leh Senior Football Team ah a khel thin a ni. Khawtlang rawngbawlna YMA ah a inhmang hma hle a, kum 20 anih in Kanan Branch YMA Assistant Secretary a lo ni daih tawh a ni. Hemi hnu hian Kanan Branch YMA leh Aizawl West Joint YMA ah te Secretary a ni leh a, Kum 1999 ah Central YMA lamah lut chhoin Finance Secretary, Assistant Secretary leh General Secretary te a lo chelh tawh a ni.
Kum 1992 khan Hrangbana College ah SU Vice President niin, Mizo Zirlai Pawl General Headquarters ah kum 1997-1999 khan President a ni a, Mizoram Football Association ah Executive Member lo ni tawhin; Aizawl District Football Association Founder President a ni. Singapore, Indonesia, Bhutan, Nepal, France, Switzerland, Italy leh Germany-ah te a zin tawh a, Kut hnathawh ngaisang tak a ni bawk. Mahni intodelh tum tlat mi a ni a, High School a kal chhung zawngin mahni intodelhin sikul chawlh apiangin a inhlawh thin a, Bus Conductor ah te tang thin in, Nepal ah te pawh Sumdawngin a zin fo thin a ni. Tunah hian Eizawnna lamah Tank Lorry leh JCB-te neiin General Secretary, Mizoram Earthmover Owner's Association a ni mek a, Petrol Pump 2 a enkawl mek bawk a ni.
Politics ah lutin kum 2008 khan Aizawl West II ah MNF ticket in a ding a, hemi tum hian Brig. T. Sailo a hneh lo a, a tlak tuk atangin he bial hi tha thlah loa taima tak a vil zuiin Kum 2013 Inthlanpui ah hneh takin thlantlin a ni. MNF General Headquarters ah President MNYF leh General Secretary niin heng Inter State Party, Inter Party, NGO, Information & Public & IT-te hi a enkawl thin a, tun ah hian General Secretary i/c AMC leh Youth Affairs ah mawhphurhna chanvo chelh mek a ni. Assembly Committee hrang hrangah telin Assembly Committee sang leh pawimawh ber Chairman,Public Accounts Committee(PAC) Kum 2016-2018 chhung atan mawhphurhna pawimawh tak a chelh mek ani.
Pu Lalruatkima hi Thalai tam takin an ngaihsan a ni a, Opposition role hneh tak, MLA ni a sawrkar lam tih dik tawk loh ni a a hriatah huaisen taka hriattir a, a hnu a tawp leh daih thin a nia, a tawp thleng raka an tan theih tawh loh hnu thlenga mimal lutuk a mi beih duh lo mi a ni. Kristian chhungkua atanga seilian, Pathian tih mi a ni a, Mi rethei leh chhumchhia te dinhmun hrethiam tak niin, tanpui ngaite tanpui nasa tak a ni bawk. A bial chhungah chhiatni/thatni awm se, an chhhungkua a thil thleng ang mai a ngai a mi phungthlu tak a ni bawk.
Post a Comment