Civic Right awmzia hre lo tan Politics sawi ve loh a him kan ring
Aizawl South III 25.10.2018 : Ni 23.10.2018 a Aizawl South III Block II Congress Conference Samlukhai a neihah MPYCC hruaitu ten Aizawl South III biala MNF Official Candidate Prof.F.Lalnunmawia chungchang a sawi dan hi a zahthlak kan tiin, thudiklo hmanga mipui rilru hruai kawi tumna niin kan hria a. Tun hnuah chuan sim tawh se kan duh hle a ni. India ramin Professor te a dahsan dan leh Civic right awmzia hre ve lo tan chuan politics hi sawi ve tawh lo turin thurawn kan pe duh bawk a ni.
India ram puma University leh College zawng zawngte enkawltu 'University Grant Commission' (UGC), New Delhi in Committee a din Professor Yashpal-a kaihhruai Task Force in "Report On Code of Professional Ethics for University and College Teachers" a thehluh, Dated 27th December, 1988 a UGC Meeting-in a pawm tak, Preamble No-II ah, "University leh College zirtirtute chanvo (rights) chiang takin a tarlang a. Chutah chuan heng zirtirtute hi India khua leh tuite chanvo pangngai leh politics-a zalenna pumhlum (full civic and political rights) pek an nih thu a chuang a ni. He Notice No.F.1-4/87(PS-Cell), 17th February, 1989 hi India rama University Vice Chancellor leh College Principal zawng zawngte thawn vek an ni. He Order hi India ram pumah vawiin thlengin a la danglam lo.
UGC hnuaia awm Mizoram University inkaihhruaina Dan (ordinance) OE-7, Clause-8(IV)A-ah pawh UGC thu zawmin Mizoram University leh a zawmpui Pachhunga University College-a zirtirtute chu India Parliament emaw, State Legislature leh District Council Election-in Extraordinary Leave kum 10 aia reilo a pe thei ang tih a chuang bawk a ni. Hei hian he University hnuaia zirtirtu thawk nghet (permanent teacher) te dinhmun - 'Politics-a an tel zalenna' chiang takin a tarlang a ni. Amaherawhchu, Mizoram University a pian hmain North Eastern Hill University (NEHU) hnuaia zirtirtu engemaw zatin UGC Dan behchhanin Political Leave an lo la tawh a ni.
He Dan zulzui hian Mizorama sorkarna siam tawhah heng mite- Pi Lalhlimpuii, Dr.J.V.Hluna, Dr.R.Lalthangliana, Dr.Lalzama, Sanghmingthanga H.Pautu, Pu Lalchamliana leh Dr.H.Lallungmuana te pawh University phalna neiin an lo tel tawh a. He Dan tlawhchhan vek hian tun dinhmunah Political Party hrang hrangah (PRISM tiamin) University leh College zirtirtute an inhmang mek a ni. University leh College-a zirtirtute politics-a an tel phalna Dan tobul dik tak chu Professors-te hi India-in a mithiam neihte an nih avangin, ram inrelbawlna (politics) ah an telin ram hmel danglamna leh hmasawnna nasa tak thlen thei tura ngaih an nih avangin, Politics-a tel phalsak an ni a, hamthatna leh chanvo danglam bik pek tum vang a ni lo. Ram hmasawnna tur beiseina avang chauha tel phalsak an ni zawk.
Hetiang hi thil awmdan a ni a. Kan bialin mithiam, India ram pum huap pawha mi chhuanawm MNF in Candidate kan nei hi kan vannei hle a. Kan thlang tling anih chuan kan bial chhung mai ni lo, Mizoram pum tan pawh nasa taka Malsawmna thlentu a nih kan ring tak zet a ni.
Issued by Media & Publicity Department
Mizo National Front
Aizawl South III Constituency
Post a Comment