MPCC Vice President leh Home minister atanga bang ta Pu R.Lalzirliana chu MNF President Pu Zoramthanga chuan Hnam Runah a lawmlut ta

Chanchinthar 15/10/18: Vawiin khan Congress Party atanga hnawhchhuah Pu R Lalzirliana chu MNF Party in an lawmlut a, MPC MLA Pu Lalthanliana pawh an lawmlut a ni.

MNF President Pu Zoramthanga chuan, tunah zet chuan Congress kulhpui a chim ta a ti a, North East State an thatnaah tla fai vekin Mizoram chu a zik zuah awm chhun a ni a valhba an zip chho mek a ni, a ti. Congress sorkarin All Mizoram Sumo Permit kawng bik neia a siam, ruang phurh leh tul bik thilah pawh Office atanga phalna lak hmasak zel ngai chu ti bovin, a mamawh leh duhte chu All Mizoram Permit an pe zel dawn tih a sawi a, Police department leh Welfare hrang hrangte mamawh leh an harsatna hrang hrangte an sorkar hunah enawnin an chinfelsak ang, a ti. Kum 15 chhung sorkarin Lirthei chhiah a laklawk pawh tidanglamin, Lirthei neituten an huam leh duh ang zatin an ruahmansak dawn a ti a. Zu leh drug avanga boral an tam tawh lutuk chu an chhanchhuak ang a, hetiang avanga harsatna hrang hrang tuarte tan enkawlna leh chhanchhuahna tha zawk din a ni ang a ti.

Pu R.Lalzirliana pawhin thusawiin MNF a a luh chhan ber pakhat chu 'Rethei VIP' titu Chief Minister in kum 10 chhungin Saitual dist tuihpuitlinna turin hma a la duh lo a, District tihpuitlin anih chuan retheite ngaihsak an ni tihna a ni a, retheite ngaihsaktu tur MNF a zawm ta a ni a ti. 

Ramri humhalh ngam hotu huaisen a duh ni a sawiin, Bairabi ramri-a Ch.Chhunga ram chinah MZP-ten Zofate chawlhbuk an sak lai khan Home Minister a nih angin ramri humhalh nan leh MZP-te pui turin Police-te Silai chelek mai turin a chah a, mahse a hriat miah lohin CRPC 144 kha Chief Minister chuan a lo puantir hnan ni a sawiin, ramri humhalh ngamlo hotu zui hi a peih tawh lo niin a sawi a ni.

Congress sorkarah Kawng chhiate an haider lui tlat chu mipui a zah loh thlak hle a ti tih sawi bawkin a chhuahsan party khan hnathawh that erawh nei ve a a hriat thu a sawi bawk. 

Tuna NLUP cheng singnga Account-a lo lut tawhte chu an zalen tawh a. NLUP Nodal Minister hlui anihna angin kha bak dawn leh tur dang a awm tawh lo tih a hria a. Sorkar thara pek chhunzawm tur veka dah a ni tawh, a ti a. MNF sorkarah SEDP atangin a tul ang zelin an dawn chhunzawm tawh zawk dawn a ni, a ti bawk.

Pu Lalthanliana MLA pawhin thusawiin MPC chhuahsana MNF a zawm chu MPC party in pawi a la ti dawn chauh a ti a ni. - AIR News Aizawl