Online News in MizoramSAVE CHITE LUI: Save Chite Lui Coordination Committee (SCLCC) buatsaihin thawhtanni khan Assembly Annexe Conference Hall-ah ‘World Rivers Day’ hman a ni a. Mizorama hman vawi khatna a ni.

Deputy Speaker Pu R. Lalrinawman hmanpuiin 'Ka Chite Lui, ka ram rohlu, ka humhalh ang' tih thupui a hman a ni.


Kum 2005 atang khan World Rivers Day hi September ni hnuhnung berah hman thin a ni a, Mizoramah chuan Pathianni a nih avangin October Ni 1-ah hman a ngai ta a ni, a ti a. Mi thahnemngai tak takin chite lui tihfaina leh chhanchhuahna kawngah an tha an seng nasa chu chhuanawm a tih thu a sawi a. Chite lui pawh lang hlei thei lo hial khawpin bawlhhlawh tam takin a chim nasa hman a, Save Chite Lui Coordination Committee hmalakna leh NSS leh school hrang hrang zirlaite bakah mi tlawmngaite avangin zawi zawiin chite lui pawn hma a sawn leh phah a ni, a ti a. Midang tih tur ringawta dah lovin mitin hian kan mawhphurhna theuhah kan ngaih a tul a ni tiin chite lui chhanchhuahna atana hmalakna The Chite Lui (Prevention and Control of Water Pollution) Act 2018 pawh Mizoram Legislative Assembly-ah pawm a ni tawh a ni, a ti a. Chite Lui humhalh chhoh zel a nih chuan thalaite tan pawh hawi thawvenna hmun nuam tak a ni thei a ni tiin thangtharte pawhin tui leh tuihna pawimawhna te an hriat a pawimawh a, an harh chho tan hret hret a ni, a ti.



Save Chite Lui hi kum 2017 khan kalpui tan a ni a, Save Chite Lui Coordination Committee chuan June 2017 atangin hma an la tan a. Action Plan Phase-I hi awareness campaign atana hman a ni ber a, Action Plan Phase-II hi department hrang hrang nena thawhhona tura ruahman a ni a, check dam siam te, lung rem te leh a kaihhnawih dang te siam tura ruahman a ni a, awareness campaign a tel zel ang. NSS leh zirlaiten thahnemngai takin Chite Lui hi an lo tifai tawh thin a. 

Save Chite Lui Coordination Committee chuan Chite Lui dung veng tu tur a ruai tawh bawk a ni. -AIR News Aizawl

Post a Comment

Powered by Blogger.